(ភ្នំពេញ)៖ ប្រិយមិត្តទស្សនិកជន ប្រាកដជាជ្រាបច្បាស់រួចមកហើយថា ចំណងស្នេហ៍រវាងតារាកំប្លែង វ៉ាន់ នីឡា ជាមួយអតីតគូដណ្ដឹងលោក ផន រង្សី បានបញ្ចប់ និងចែកផ្លូវគ្នាដើររៀងៗ ខ្លួនយូរណាស់មកហើយ ប៉ុន្ដែហាក់ដូចជានៅតែពាក្យពេចន៍ លេចឮចេញពីមាត់មហាជន មិនសាបសូន្យទាល់តែសោះ ទៅលើតារាកំប្លែងវ័យក្មេង វ៉ាន់ នីឡា ថានាងជា «មេម៉ាយខាន់ស្លា» ខណៈថ្មីៗនេះនាងកំពុងតែ បង្ហាញភាពស្និទ្ធស្នាល ជាមួយបុរសវ័យក្មេងម្នាក់ទៀត ដែលគេសង្ស័យជាគូស្នេហ៍ថ្មីរបស់នាង។ យ៉ាងណាមិញ ដោយអត់ទ្រាំនឹងពាក្យលេចឮថា ជាស្ត្រីមេម៉ាយខាន់ស្លា ពីមជ្ឈដ្ឋានខាងក្រៅមិនបាន កូនស្រីសំណព្វចិត្តរបស់លោកតា វ៉ិចទ័រ រូបនេះ បានបញ្ចេញប្រតិកម្មឆ្លើយតបទៅវិញ និងហាក់បង្ហើបឲ្យដឹងពីមូលហេតុ ដែលធ្វើឲ្យនាង និងអតីតគូដណ្ដឹង ឈានដល់ផ្លូវបំបែក ចែកផ្លូវគ្នាដើរទៀតផង។
ដោយយោងតាមគណនីហ្វេសប៊ុក របស់កូនស្រីសំណព្វចិត្ត របស់លោក សុវណ្ណ រិទ្ធី ហៅលោកតា វ៉ិចទ័រ កញ្ញា វ៉ាន់ នីឡា បានបញ្ចេញប្រតិកម្មឆ្លើយតប ទៅពាក្យថា នាងជាមេម៉ាយខាន់ស្លា ដែលមានអត្ថន័យយ៉ាងដូច្នេះថា «តើមានមនុស្សស្រីប៉ុន្មាននាក់ ដែលចង់មានឈ្មោះជាមេម៉ាយខាន់ស្លា? សប្បាយមែនទេ ដែលដើរនិយាយពីខ្ញុំ ថាខ្ញុំមេម៉ាយខាន់ស្លា សុខចិត្តផ្ដាច់ពាក្យទៅមានប្រុស? អ្នកដឹងច្បាស់ហើយមែនទេ? ពេលខ្ញុំភ្ជាប់ពាក្យថា ខ្ញុំស្រឡាញ់គេ ដោយសារគេមានឡានល្អ មានលុយ ពេលខ្ញុំផ្ដាច់ពាក្យ ទៅស្គាល់អ្នកផ្សេង គេជាមនុស្សធម្មតា មិនឡូយឆាយ មិនចេះតែងខ្លួនហើយនៅក្មេង ថាខ្ញុំនឹងស្រឡាញ់ពួកពាល បាតសង្គម ហើយសល់ពេលចឹងធ្វើម៉េចទៅបានត្រូវ ស្រឡាញ់អ្នកមានក៏ខុស ស្រឡាញ់អ្នកធម្មតាក៏ខុស ហើយខ្ញុំសុំផ្ដាំ មុននឹងបើកគម្របមាត់និយាយ យកខួរមកគិតសិន ចាំនិយាយ (គិតឲ្យបាន១០០សិនចាំនិយាយ) ខ្ញុំឈឺចាប់ជិតនឹងឆ្កួតដោយសារពាក្យ (គូដណ្ដឹង) ឈឺគ្រាំហើយ»។
តារាកំប្លែងវ័យក្មេងរូបនេះ បានបញ្ជាក់បន្តទៀតថា «មុននឹងបញ្ចប់គេក៏បាននិយាយថា បងស្ដាយដែលបាត់បង់មនុស្សស្រីដូចអូន បងមិនដែលមើលឃើញ ទង្វើល្អរបស់អូន គិតតែការងារមិនដែលខ្វល់ នឹងមនុស្សស្រីម្នាក់នេះ បើសិនមានឱកាស បងនឹងកែខ្លួន ធ្វើមនុស្សល្អសម្រាប់អូន ហើយអ្នកដែលមិនដឹងរឿងនៅឲ្យស្ងៀម ទៅកុំលូតាមគេ»។
គួរឲ្យដឹងផងដែរថា ចាប់តាំងពីប្រកាសចែកផ្លូវគ្នាមក វ៉ាន់ នីឡា ក៏ដូចជាខាងអតីតគូដណ្ដឹង លោក ផន រង្សី មិនបានទម្លាយនូវមូលហេតុធ្វើ ឲ្យពួកគេមិនអាចរួមរស់ ក្លាយជាគ្រួសារតែមួយបានទេ ខណៈទើបតែកាលពីថ្មីៗនេះ វ៉ាន់ នីឡា ហាក់បង្ហើបឲ្យដឹងពីដើមចម នៃរឿងបែកបាក់របស់ពួកគេ ឲ្យប្រិយមិត្តទស្សនិកជនបានដឹង៕
