(ភ្នំពេញ)៖ តារាចម្រៀង ពូកែខាងលេងទឹកមុខ ក្រម៉ិចក្រម៉ើម អ្នកនាង ទូច ស្រីលក្ខណ៍ ត្រូវបានគេសម្គាល់ថា នាងជាតារាមួយរូប មានជីវិតរស់នៅពោរពេញ ទៅដោយសុភមង្គល និង កក់ក្តៅ នៅក្នុងគ្រួសារ។ មួយវិញទៀត នាងត្រូវបានគេចាត់ទុក ជាតារាដែលចូលចិត្ត ការសម្តែងបែបសប្បាយៗ និងភាពក្រម៉ិចក្រម៉ើម ទៅកាន់មហាជន ឲ្យមានអារម្មណ៍សប្បាយរីករាយ តែមិននឹកស្មានថា ធាតុពិតរបស់តារាចម្រៀងស្រីរូបនេះ កំពុងតែធ្លាក់ខ្លួនចូលទៅក្នុង «ជំងឺបាក់ទឹកចិត្ត» ដែលជាជំងឺមួយ ដ៏កាចសាហាវ និងគួរឲ្យខ្លាចបំផុត។
ជាក់ស្ដែង កាលពីពេលថ្មីៗនេះ តារាចម្រៀង ទូច ស្រីលក្ខណ៍ បានបង្ហោះសារមានអត្ថន័យថា «ពីមួយថ្ងៃទៅមួយថ្ងៃខ្ញុំកាន់ពិបាក ជំងឺបាក់ទឹកចិត្តវាកាន់តែធ្វើឲ្យខ្ញុំពិបាកទៅៗ អ្នកគេមើលមកខ្ញុំថាខ្ញុំសប្បាយ តែពេលខ្លះខ្ញុំលួចយំក្នុងចិត្ត។ ស្អែកខ្ញុំត្រូវជួបលោកគ្រូពេទ្យ ខាងផ្លូវចិត្ត សង្ឃឹមថា ខ្ញុំនឹងប្រសើរឡើងបន្ទាប់ពីជួបគាត់ហើយ»។
តាមរយៈសារបង្ហាញពីការបាក់ទឹកចិត្ត ពីសំណាក់តារាចម្រៀង អ្នកនាង ទូច ស្រីលក្ខណ៍ បានធ្វើឲ្យមិត្តរួមអាជីព ក៏ដូចជាអ្នកគាំទ្រ និងទស្សនិកជនជាច្រើន មានការភ្ញាក់ផ្អើលយ៉ាងខ្លាំង ព្រោះស្ទើរមិនជឿថា ទូច ស្រីលក្ខណ៍ កើតមានជំងឺបែបនេះនោះទេ និងបានចូលរួមលើកទឹកចិត្ត ក៏ដូចជាលើកពាក្យសរសើរ និងជូនពរឲ្យ តារាចម្រៀងស្រីរូបនេះ ឆាប់ជាសះស្បើយ ពីជំងឺនេះផងដែរ។
ជាការកត់សម្គាល់ នេះមិនមែនជាលើកដំបូងឡើយ ដែលមានអ្នកសិល្បៈធ្លាប់ជួបជំងឺបាក់ទឹកចិត្ត ខណៈកាលពីកន្លងទៅ មានតារាជាច្រើនក៏ធ្លាប់រងសំពាធផ្លូវអារម្មណ៍ កម្រិតធ្ងន់ធ្ងរ ពោលគឺកើតមានជំងឺបាក់ទឹកចិត្ត ប៉ុន្តែក៏បានធូរស្បើយ វិញផងដែរ៕
