(ភ្នំពេញ)៖ បន្ទាប់ពីទទួលបានដំណឹងថាសាលាឧទ្ធរណ៍ បានប្រកាសបដិសេធបណ្ដឹងទាស់ របស់លោក គុយ សិទ្ធិស័ក្ត ក្នុងសំណុំរឿង ទម្លាយរូបអាក្រាតរបស់នាងរួចមក ប្រធានសមាគមសិល្បករខ្មែរ អ្នកនាង ចន ច័ន្ទលក្ខិណា ដែលតែងតែចូលរួមរកយុត្តិធម៌ ជូនដល់សិល្បករ- សិល្បការិនីកម្ពុជា បានសម្ដែងនូវអារម្មណ៍សាទរ នៅពេលដែលដឹងដំណឹងថា កញ្ញា វ៉ាន់ នីឡា ទទួលបានពន្លឺយុត្តិធម៌ពី ពីសាលាឧទ្ធរណ៍ កាលពីថ្ងៃទី៣១ ខែតុលា ឆ្នាំ២០១៨នេះ។
អ្នកនាង ចន ច័ន្ទលក្ខិណា ប្រធានសមាគមសិល្បករខ្មែរ បានថ្លែងប្រាប់ឲ្យដឹងថា អ្នកនាងពិតជាសប្បាយរីករាយខ្លាំងណាស់ នៅពេលដែលទទួលបានដំណឹងថា សាលាឧទ្ធរណ៍ បានធ្វើការបដិសេធបណ្ដឹងរបស់លោក គុយ សិទ្ធិស័ក្ត យុត្តិធម៌មួយ នេះជាការផ្ដល់យុត្តិធម៌ សម្រាប់កញ្ញា វ៉ាន់ នីឡា ដែលជាជនរងគ្រោះ ហើយក្នុងនាមជាប្រធានសមាគមមួយរូប គឺតែងតែផ្ដល់នូវមេធាវី ទៅឲ្យកញ្ញា វ៉ាន់ នីឡា ដើម្បីការពារក្ដីទៅតាមផ្លូវច្បាប់ ក្នុងនាមជាអ្នកសិល្បៈដូចជាគ្នា។ ពាក់ព័ន្ធជាមួយនឹងរឿងរ៉ាវ មិនសមរម្យចំនួន ដែលកើតមានឡើងទៅលើអ្នកសិល្បៈ ហើយមិនសំខាន់តែចំពោះ កញ្ញា វ៉ាន់ នីឡា មួយរូបនោះទេ គឺខាងសមាគមតែងតែផ្ដល់មេធាវី ដើម្បីជួយកិច្ចការ តាមផ្លូវច្បាប់ ជួយរកយុត្តិធម៌ ជូនដល់អ្នកសិល្បៈជានិច្ច។
អ្នកនាង ចន ច័ន្ទលក្ខិណា បានថ្លែងយ៉ាងដូច្នេះថា «ខ្ញុំពិតជារីករាយ ដែលទទួលបានដំណឹងថា សាលាឧទ្ធរណ៍បានផ្ដល់យុត្តិធម៌ ជូនដល់ប្អូនស្រី វ៉ាន់ នីឡា ដោយបានបដិសេធបណ្ដឹង របស់លោក គុយ សិទ្ធិស័ក្ត ហើយបើសិនជាមានបញ្ហាអ្វីផ្សេងទៀត ឬក៏ចំណាត់ការផ្សេងៗបន្តទៀត ដែលត្រវឲ្យខាងសមាគមជួយជ្រោមជ្រែង គឺយើងនៅតែគាំទ្រ និងជួយផ្ដល់ជាមេធាវីបន្តទៀត បើសិនជារឿងរ៉ាវនេះ នៅតែបន្តទៅដល់តុលាការកំពូល»។
គួរបញ្ជាក់ថា អ្នកនាង ចន ច័ន្ទលក្ខិណា ដែលតែងតែជួយជ្រោមជ្រែង ផ្ដល់ជាមេធាវី ដើម្បីជួយរកយុត្តិធម៌ ដល់កញ្ញា វ៉ាន់ នីឡា សំរាប់ដំណើរការក្ដីនេះផងដែរ៕
