(ភ្នំពេញ)៖ កាលពីពេលថ្មីៗនេះ ក្រុមភាពយន្ត «ឈូករ័ត្ន» បានបង្កើតកម្មវិធីប្រកួតប្រជែង ខ្សែភាពយន្តខ្នាតខ្លី ដោយបើកឱកាសឲ្យសមិទ្ធិករគ្រប់រូប អាចដាក់ពាក្យ ចូលរួមប្រឡង បញ្ចេញស្នាដៃ សមត្ថភាព និងទេពកោសល្យ ដែលខ្លួនមានដាក់បញ្ចាំងនៅលើអេក្រង់ធំ ដើម្បឲ្យគណៈកម្មការ ត្រួតពិនិត្យ សុភវិនិច្ឆ័យ ទៅតាមសមត្ថភាពរៀងៗខ្លួន ហើយនៅទីបំផុត គេអាចរកមឃើញម្ចាស់ជយលាភីលេខ១ ហើយ គឺបានទៅលើខ្សែភាពយន្តភាគខ្មែរ មានចំណងជើងថា «ខ្យល់ខែកុម្ភៈ» ដែលត្រូវបានគណៈកម្មការមហោស្រពភាពយន្តខ្លីចតុមុខ និង មហាជនគាំទ្រ ត្រូវបានជ្រើសរើសជាភាពយន្តឆ្នើម ប្រចាំមហោស្រពលើកទី៧ ឆ្នាំ២០១៨។
«ខ្យល់ខែកុម្ភៈ» ជាការដឹកនាំសម្ដែងដោយលោក មុនី កាន់ដារង្គ ដោយត្រូវបានចំណាយពេលប្រមាណ១ខែ ក្នុងការសរសេរសាច់រឿង សម្ដែង និងបច្ចេកទេសនៃការកាត់ត ខណៈសាច់រឿងត្រូវបានក្រុមផលិត ធ្វើដំណើររហូតដល់ប្រទេសថៃ ឯណោះ។ ចំពោះដើមទុននៃការផលិត គឺចំណាយប្រាក់ប្រមាណជាង ៧០០០ដុល្លារ។ ដោយឡែកចំពោះអត្ថន័យក្នុងសាច់រឿង ជាស្នេហាបែបយុវវ័យ មានភាពជូរចត់បែកបាក់ ហើយអត្ថន័យនៅក្នុងរឿងនេះ គឺចុងក្រោយតម្រូវឲ្យមានការបែកបាក់គ្នា។
លោក មុនី កាន់ ដារង្គ បានបញ្ចេញទាំងអារម្មណ៍រំភើប រីករាយរបស់ខ្លួនថា នេះគឺជាលើកដំបូងហើយ ដែលខ្លួនទទួលបានពានបែបនេះ អាចនិយាយបានថា នេះជាជោគជ័យជំហានដំបូងរបស់ខ្លួន ក្នុងការឈានទៅរកគោលដៅថ្មីមួយទៀត។
លោក បាននិយាយថា «ខ្ញុំពិតជាមានទឹកចិត្ត សប្បាយរីករាយ និងរំភើបជាខ្លាំង ដែលខ្សែភាពយន្តរបស់ខ្ញុំបានជាប់ចំណាត់ថ្នាក់លេខ១។ អាចចាក់ផ្សាយនៅលើអេក្រង់ធំនេះហាក់បីដូចជាកិត្តិយសមួយសម្រាប់ខ្ញុំ ហើយពានរង្វាន់នេះកើតឡើងបាន ដោយសារតែមានការជួយជ្រោមជ្រែងពីមិត្តរួមការងារ ពោលគឺមិនមែនមានតែខ្ញុំម្នាក់នោះទេដែលធ្វើឲ្យការងារមួយនេះ ទទួលបានជោគជ័យ គឺបានចូលរួមការខិតខំប្រឹងប្រែងពីក្រុមការងារទាំងអស់គ្នា។ ដោយឡែកនៅថ្ងៃអនាគត ខ្ញុំនឹងខិតខំប្រឹងប្រែងជួយលើកស្ទួយវិស័យផលិតខ្សែភាពយន្តខ្មែរ ឲ្យកាន់តែមានភាពរីកចម្រើន ឲ្យអស់ពីសមត្ថភាព ហើយក្ដីស្រមៃរបស់ខ្ញុំ គឺចង់ក្លាយចង់ផលិតខ្សែភាពយន្តធំ ដើម្បីដាក់បញ្ចាំងនៅរោងកុន ក្នុងប្រទេសកម្ពុជា។ ដូច្នេះពេលនេះខ្ញុំកំពុងតែព្យាយាមផលិតខ្សែភាពយន្តខ្នាតវែង និងសរសេរសាច់រឿងខ្លីបន្ថែមទៀតផងដែរ»។
លោកបន្តថា «ខ្ញុំក៏មានបំណងជំរុញឲ្យផលិតករជំនាន់ក្រោយ ចូលរួមប្រកួតប្រជែង ខ្សែភាពយន្តខ្នាតខ្លី ដោយសារតែនេះ គឺជាពេលវេលាដ៏ល្អមួយ ដើម្បីអាចដាក់បញ្ចាំងខ្សែភាពយន្តរបស់ខ្លួននៅលើអេក្រង់ធំ»។ ដោយឡែកមុនពេលទទួលបានជោគជ័យ បុរសវ័យ ២៩ ឆ្នាំរូបនេះ ធ្លាប់សិក្សាខាងវិស័យភាពយន្ត និងធ្វើជំនួយការភាពយន្តរយៈពេល៦ឆ្នាំមកហើយ ដូច្នេះខ្លួនមានក្ដីស្រមៃបង្កើតខ្សែភាពយន្តដោយខ្លួនឯង។
គួររំឭកថាមហោស្រពភាពយន្តខ្លី ចតុមុខលើកទី៧ បានទទួលយកភាពយន្តខ្លី តាំងពីដើម ឆ្នាំ២០១៨មកម្ល៉េះ ដោយមានសមិទ្ធិករដាក់ភាពយន្តខ្លីមកមហោស្រពចំនួន ៣០១ចំណងជើង មានភាពយន្តខ្មែរចំនួន៣៩ចំណងជើង និងបរទេសចំនួន២៦២ចំណងជើង។ ក្នុងនោះដែរ គណៈវិនិច្ឆ័យ បានជ្រើសរើសរឿងក្នុងជុំប្រកួតប្រជែងទី១ ដែលមានភាពយន្តខ្លីខ្មែរ ចំនួន៦ចំណងជើង និងភាពយន្តខ្លីបរទេសចំនួន១២ចំណងជើង និងភាពយន្តខ្លីចំរុះផ្សេងទៀត ចំនួន៥៩ចំណងជើង សរុបមាន ចំនួន៧៧ ចំណងជើង ត្រូវបានចាក់បញ្ចាំង៕