(ភ្នំពេញ)៖ អតីតតារាសម្ដែងជើងចាស់ ល្បីឈ្មោះមួយរូប និងជាសាស្ត្រាចារ្យ នៃមហាវិទ្យាល័យសិល្បៈនាដសាស្ត្រ គឺលោក នូ យុទ្ធិរិទ្ធ បានទទួលមរណភាពទៅហើយ កាលពីម៉ោង១រំលងអាធ្រាត្រយប់មិញនេះ ដែលដំណឹងនៃការទទួលមរណភាពរបស់លោក បានធ្វើឲ្យមហាជន ក៏ដូចជាអ្នកសិល្បៈ មានការស្លុតចិត្តយ៉ាងខ្លាំង និងបានចូលរួមរំលែកទុក្ខ ដ៏ក្រៀមក្រំមួយនេះ។ អតីតសិល្បករជើងចាស់ លោក នូ យុទ្ធិរិទ្ធ បានទទួលមរណភាព ដោយសារជំងឺគាំងបេះដូង នៅមន្ទីរពេទ្យកាល់ម៉ែត កាលពីវេលាម៉ោងជិត១ រំលងអធ្រាត្រ ឈានចូលថ្ងៃទី ២៧ ខែតុលា ឆ្នាំ២០១៨ ។
ដោយយោងតាមគណនីហ្វេសប៊ុកខាងលើ បានសរសេររៀបរាប់ទាំង អារម្មណ៍យ៉ាងសោកសៅថា «បងប្រុស នូ យុទ្ធិរិទ្ធ តារាសម្តែង និងជាសាស្ត្រាចារ្យ មហាវិទ្យាល័យសិល្បៈនាដសាស្ត្រ បានទទួលមរណភាព ដោយជំងឺគាំងបេះដូង នៅមន្ទីរពេទ្យកាល់ម៉ែត កាលពីវេលាម៉ោងជិត១ រំលងអធ្រាត្រឈានចូលថ្ងៃទី ២៧ ខែតុលា ២០១៨ សព្វតម្កល់នៅវត្តកោះក្របី។ សូមឲ្យដួងវិញ្ញាណក្ខន្ធ បងប្រុសបានទៅកាន់សុគតិភព»។
តាមរយៈដំណឹង នៃមរណភាព ដែលពោរពេញទៅដោយទុក្ខសោកយ៉ាងក្រៀមក្រំ និងសោកស្ដាយ របស់សម្ដែងជើងចាស់ លោក នូ យុទ្ធិរិទ្ធ បានធ្វើអ្នកលេងបណ្ដាញសង្គម រួមទាំងអ្នកសិល្បៈ បាននាំគ្នាចូលរួមរំលែកទុក្ខ ព្រមទាំងបួងសួង ឲ្យវិញ្ញាណក្ខន្ធលោក ទៅកាន់សុខគតិភព ផងដែរ។
គួររំឮកផងដែរ លោក នូ យុទ្ធិរិទ្ធអតីតតារាសម្ដែងល្ខោនបាសាកដ៏ល្បីនាឆ្នាំ១៩៨៥ ក្នុងរឿងទឹករាំផ្ការាំនិងល្ខោនយីកេរ៏នាពេលនោះផងដែរ៕