(ភ្នំពេញ)៖ លោកទ្រី តារាវុធ ត្រូវបានគេដឹងថា កំពុងមានទីផ្សារសិល្បៈខ្លាំងនា ពេលបច្ចុប្បន្ន ខណៈភាពយន្តភាគច្រើន ដែលលោកសម្តែង គឺបានគ្រងតំណែងជាតួឯកជាបន្តបន្ទាប់។ លើសពីនេះ ដោយសារតែសមត្ថភាពផ្នែកសិល្បៈ រួមផ្សំទាំងរូបសម្បតិ្តពីធម្មជាតិផងនោះ បានធ្វើឲ្យតារាប្រុសរូបនេះ មមាញឹកខ្លាំង បើទោះបីជាលោក ត្រូវបានគេដឹងថា ជាតារាជំនាន់ក្រោយក៏ពិតមែន។ ងាកមករកភាពយន្ត «ឯណាខ្មោច» ដែលជាស្នាដៃសម្តែងថ្មីនេះ លោកក៏បានគ្រងតំណែងជាតួឯក ខណៈបច្ចុប្បន្នរឿងនេះ បានថតចប់សព្វគ្រប់អស់ហើយ គឺគ្រោងតែដាក់បញ្ចាំងតែប៉ុណ្ណោះ។ លោក ទ្រី តារាវុធ មានក្តីរំពឹងយ៉ាងខ្លាំង ថាមានទស្សនិកជនគាំទ្រច្រើន ចំពោះស្នាដៃរឿង «ឯណាខ្មោច» នេះ។
ថ្លែងប្រាប់ Khmertalking កាលពីពេលថ្មីៗនេះ លោក ទ្រី តារាវុធ បាននិយាយថា ចំពោះរឿង «ឯណាខ្មោច» គឺថតចប់អស់ហើយ តាំងពីមុនភ្ជុំបិណ្ឌមកម្ល៉េះ ខណៈក្នុងរឿងនេះ លោកសម្តែងជាតួឯក និងមានអត្តចរិតជាបុរសម្នាក់ ដែលក្លាហានមិនខ្លាចខ្មោច ប្រៀបបាននឹងវីរៈបុរសម្នាក់អ៊ីចឹង។
លោកថា ចំពោះរឿងនេះ គឺមានការរំពឹងខ្ពស់ថា មានទស្សិកជនគាំទ្រច្រើន ព្រោះភាពយន្តនេះប្លែក និងល្អ ខណៈរាល់បច្ចេកទេសសម្តែង និងប្លង់ថត គឺមានការសម្រិតសម្រាំងខ្លាំង។ លើសពីនេះ ក្នុងនាមជាតួសម្តែងរឿងនេះផ្ទាល់ និងធ្លាប់សម្តែងរឿងជាច្រើនរួចមក គឺរឿងនេះ មានសង្ឃឺមថា មានអ្នកគាំទ្រច្រើនជាងរឿង «កំណត់ហេតុនាងនាថ» ទៀត។
យ៉ាងណាមិញ ងាកមករឿងរ៉ាវស្នេហាវិញ ទស្សនិកជនភាគច្រើនធ្លាប់និយាយថា លោក ទ្រី តារាវុធ មានទំនាក់ទំនងជាមួយកញ្ញា សួង ស៊ីធឿន ដែលជាតារាសម្តែងដូចគ្នា ទោះអ្នកទាំងពីរបានបដិសេធរួចហើយក្តី។ អ្វីដែលចាប់អារម្មណ៍ថ្មីៗនេះ កញ្ញា សួង ស៊ីធឿន បានថតរូបជាមួយបុរសម្នាក់ យ៉ាងស្និទ្ធប្រៀបបាននឹងគូស្នេហ៍ ដោយលោក ទ្រី តារាវុធ ផ្ទាល់បានិយាយថា «សម្រាប់លោកផ្ទាល់មិនបានដឹងទេ ថាកញ្ញា សួង ស៊ីធឿន នឹងបុរសម្នាក់នោះ មានទំនាក់ទំនងអ្វី គឺដឹងត្រឹមតែថា ទំនាក់ទំនងលោក និង សួង ស៊ីធឿន ជាមិត្តរួមការងារសិល្បៈនឹងគ្នា តែប៉ុណ្ណោះ»។
ពាក់ព័ន្ធរឿងនេះ លោក ទ្រី តារាវុធ សង្កត់ធ្ងន់ថា «ចំពោះទស្សនិកជន ដែលតែងតែនិយាយថា លោកនឹង សួង ស៊ីធឿន មានទំនាក់ទំនងស្នេហ៍ជាមួយគ្នា ក៏មិនអាចហាមឃាត់បានដែរ ព្រោះគេឃើញអ្វីគេនិយាយហ្នឹង តាមតែមើលឃើញ ខណៈលោកដឹងខ្លួនឯងច្បាស់ថា លោកនឹងនាងត្រឹមតែដៃគូក្នុងសិល្បៈ ដូចដែលអ្វីបានបកស្រាយពីមុនមក»៕
