(ភ្នំពេញ)៖ គួរឲ្យចាប់អារម្មណ៏ ដែលបទចម្រៀង «អ្នកណាកែចិត្តបង» ច្រៀងតារាចម្រៀងស្រីវ័យក្មេង និងជាអតីតបេក្ខភាព Cambodian Idol រដូវកាលទី៣ ញឹម សួនសោភាទេពី ដែលមានអ្នកចូលទស្សនារហូតដល់ទៅជិត ២០លានដង នៅលើបណ្ដាញសង្គម YouTube នោះ នៅថ្ងៃនេះបានចេញជា Full MV ហើយ។
ពិតជាមិនធម្មតាមែន សម្រាប់បទ «អ្នកណាកែចិត្តបង» ក្រោយពីមានអ្នកទស្សនាជិត ២០លានដងរួចមក ត្រូវបានអ្នកនិយមស្ដាប់បទច្រៀងខ្មែរ សម្ដែងការភ្ញាក់ផ្អើល ព្រោះតែមានអ្នកទស្សនាច្រើនលើសលប់ជាងចម្រៀងដទៃ ហើយអាចនិយាយបានថា ជាប្រវត្តសាស្ត្ររបស់បទចម្រៀងខ្មែរ ដែលមានអ្នកចូលមើលច្រើនដង ពោលគឺប្រៀបដូចទៅនឹងបទល្បីលំដាប់ពិភពលោកដូចជា កូរ៉េ និងអាមេរិក ទៅហើយ។
បទចម្រៀងមានចំណងជើងថា «អ្នកណាកែចិត្តបង» ជាបទចម្រៀងបែបមនោសញ្ចេតនាស្នេហា ចាក់ដោតអារម្មណ៍យុវវ័យឲ្យលន្លង់លន្លោច តាមចម្រៀងមួយនេះ ជាពិសេសនោះចំពោះ MV បទចម្រៀងផ្ទាល់ ដែលទើបនឹងបញ្ចេញក្ដៅៗនៅពេលនេះ (ថ្ងៃទី០៤ ១០ ២០១៨) ក្រោយពីទទួលបានការចាប់អារម្មណ៍ និងមានការគាំទ្រខ្លាំង មិនត្រឹមតែកំសត់ និងមានសាច់រឿងល្អទស្សនា ហើយនោះថែមទាំងមានការចូលរួមសម្ដែងពីសំណាក់តារាល្បីៗ មានដូចជាកំលោះសង្ហាលោក ណាខុន, កញ្ញា ទីពី និងកញ្ញា គីម សៀវឡាម ដែលសុទ្ធសឹងតែជាតួសំខាន់ក្នុងបទចម្រៀងនេះ។
គួរបញ្ជាក់ថា កញ្ញា ញឹម សួន សោភាទេពី ជាតារាចម្រៀងស្រីវ័យក្មេង ដែលកំពុងតែឆក់យកបានប្រជាប្រិយភាព និងការគាំទ្រខ្លាំង ពីសំណាក់ទស្សនិកជន ខណៈដែលនាងតែងតែមាននូវបទចម្រៀង ដើម្បីកំដរអារម្មណ៍ទស្សនិកជនជាពិសេសមិត្តយុវវ័យ។ ជាក់ស្ដែងដូចចម្រៀង «អ្នកណាកែចិត្តបង» ដែលជាបទចម្រៀងបែបមនោសញ្ចេតនាដំបូងរបស់នាង គឺទទួលបានការគាំទ្រខ្លាំង ភ្លូកទឹកភ្លូកដី ស្ទើរមិនគួរឲ្យជឿ៕