(ភ្នំពេញ)៖ សមាគមសិល្បកខ្មែរ មានតារាសម្តែងស្រីអ្នកនាង ចន ច័ន្ទលក្ខិណា ជាប្រធានគ្រប់គ្រងអាណត្តិថ្មី កាលពីថ្ងៃទី០១ខែតុលា ឆ្នាំ២០១៨ បានអញ្ជើញសិល្បករជើងចាស់ចំនួន៥រូប ដែលមានជីវភាពខ្វះខាត និងបាត់បង់សមត្ថភាពការងារសិល្បៈ មកទទួលអំណោយសប្បុរសជន នៃមូលនិធីចាស់ជរា។
ចំពោះអំណោយ ដែលត្រូវបានប្រធានសមាគមសិល្បកខ្មែរ អ្នកនាង ចន ច័ន្ទលក្ខិណា ប្រគល់ជូនតារាសសិល្បៈជើងចាស់ ទាំង៥រូបខាងលើនេះ រួមមាន អង្ករ២ប៉ាវ, មី២កេះ, ត្រីខ២យូ និងថវិកាមួយចំនួនទៀត។ អ្នកនាង ចន ច័ន្ទលក្ខិណា បានលើកឡើងថា សិល្បកររៀមច្បងដែលបាត់បង់សមត្ថភាពការងារ សមាគមមិនទុកពួកគាត់ចោលនោះទេ គឺសមាគមតែងតែគិតដល់ពួកគាត់ជានិច្ច។
ប្រធានសមាគមសិល្បកខ្មែររូបនេះ បានបញ្ជាក់ថា សម្រាប់វត្តមានសិល្បកររៀមច្បងទាំង៥រូប ដែលទទួលអំណោយនាពេលនេះ រួមមាន លោកគ្រូ សាឡាត់ អាយុ៧៩ឆ្នាំ អ្នកចម្រៀងអាយ៉ៃឆ្លងឆ្លើយ ,លោក អ៊ុក សំអឿន អាយុ៦៩ឆ្នាំអ្នកចម្រៀងអាយ៉ៃឆ្លងឆ្លើយ, លោក សួស សងវាចា អាយុ៥០ឆ្នាំអ្នកចម្រៀងសម័យ, លោក ហ៊ុន សាវិន អាយុ៦៥ឆ្នាំ គ្រូភ្លេងបុរាណ និងរៀមច្បង ដួង ម៉ារ៉ី អាយុ៧១ឆ្នាំ អ្នកចម្រៀងបុរាណ។
ឆ្លៀតក្នុងឱកាសនេះដែរ សមាគមសូមគោរពថ្លែងអំណរគុណ ដល់សប្បុរសជនទាំងអស់ ដែលបានជួយឧបត្ថម្ភដល់ «មូលនិធិសិល្បករចាស់ជរា» ជាពិសេសសូមគោរពថ្លែងអំណរគុណដល់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ដែលបានឧបត្ថម្ភថវិកា ដើម្បីទ្រទ្រង់ដល់សិល្បករចាស់ជរាក្នុងរយ:ពេល ៥ឆ្នាំ។
លើសពីនេះសមាគមសិល្បករខ្មែរ សូមគោរពជូនពរសម្តេចទាំងពីរ និងសប្បុរសជនទាំងអស់ឲ្យមានសុខភាពល្អបរិបូរណ៌ កម្លាំងខ្លាំងក្លា ប្រាជ្ញាវាងវៃ អាយុយឺនយូរ ដើម្បីដឹកនាំកសាងនិងអភិវឌ្ឍន៍ប្រទេសជាតិ ឲ្យកាន់តែរីកចម្រើនថ្កុំថ្កើងរុងរឿងតទៅមុខទៀត៕
