(កូរ៉េ)៖ កាលពីថ្មីនេះៗ លោក ឡុង ឌីម៉ង់ ឯកអគ្គរាជទូតខ្មែរប្រចាំនៅប្រទេសកូរ៉េខាងត្បូង បានធ្វើការវាយតម្លៃខ្ពស់ថា ក្នុងចំណោមក្រុមតារាសម្ដែងកម្ពុជាដែលបានមកច្រៀងក៏ដូចជាសម្ដែងលើទឹកដីប្រទេសកូរ៉េខាងត្បូង ក្នុងអាណត្តិរបស់លោកកាន់នេះ មានតែក្រុមតារាចម្រៀងលោក ព្រាប សុវត្ថិ ទេ ដែលមានចំនួនអ្នកទៅទស្សនាច្រើនជាងគេ ដែលការចូលរួមទស្សនា ពីសំណាក់ បងប្អូននៅកូរ៉េ មានរហូតដល់ទៅ ជិត២ម៉ឺននាក់ឯណោះ ដែលនេះជាលើកទីមួយហើយ ដែលមានចំនួនអ្នកចូលទស្សនា ច្រើនសន្ធឹកសន្ធាប់ ដែលកន្លងមកមិនធ្លាប់មានឡើយ។
ដោយលោក ឡុង ឌីម៉ង់ បានថ្លែងប្រាប់ឲ្យដឹងថា នៅក្នុងអាណត្តិ ដែលលោកបានមកកាន់តំណែងជាអគ្គរាជទូត នៅកូរ៉េខាងត្បូង ជាង២ឆ្នាំ ៤ខែមកនេះ គឺមានតារាខ្មែរមកសម្ដែង ជាច្រើនក្រុមណាស់ ហើយមុនពេលដែលលោកមកកាន់ តំណែងនៅទីនេះក៏មានដែរ។ ទន្ទឹមគ្នានេះដែរ លោក ឡុង ឌីម៉ង់ បានធ្វើការរៀបរាប់ឈ្មោះតារាចម្រៀង និងតារាសម្ដែង ដែលធ្លាប់មកសម្ដែង នៅក្នុងប្រទេសកូរ៉េ ដែលត្រួសៗ ក្នុងនោះ រួមមានដូចជា តារាកំប្លែង នាយកុយ, នាយក្រឹម, លោក ខេមរៈ សិរីមន្ត, កញ្ញា ឱក សុគន្ធកញ្ញា, អ្នកនាង មាស សុខសោភា, លោក ខេម, លោក ឆន សុវណ្ណរាជ, អ្នកនាង ខាត់ សុឃីម, លោក នេនទុំ, ពូឃ្លាំង, លោក ដួង វីរៈសិទ្ធ និងរួមមានតារាល្បីៗ ជាច្រើនដួងទៀត។ ជាក់ស្ដែង ចុងក្រោយនេះ មានក្រុមចម្រៀង លោក ព្រាប សុវត្ថិ ដែលដឹកនាំដោយ ឧកញ៉ា ឡេង ណាវ៉ាត់ត្រា មានគ្នាជាង៤០នាក់ រួមមានដូចជា កូនទាំង៣របស់លោក បូករួមទាំងប្រពន្ធម្ដាយ ព្រមទាំងក្រុមរាំផង មានគ្នាជាង២០នាក់ នៅមានលោក ឆាយ វិរៈយុទ្ធ និងក្រុមរាំ កញ្ញា ពេជ្រ សោភា និងក្រុមរាំ កញ្ញា រ៉ា ប៊ី និងក្រុមរាំ លោក ប៉ែន ចំរ៉ុង នាយ ពែកមី និង លោក គុយ លី ជាដើម ដែលទើបបញ្ចប់ការសម្ដែងកាលពីពេលថ្មីៗនេះផងដែរ។
ដោយឡែក ជុំវិញចំនួនអ្នកមកគាំទ្រ ក៏ដូចជាចូលរួមទស្សនា ឯកអគ្គរាជទូតដដែល បានបែងចែកកម្មវិធីជា២ដាច់ពីគ្នា ក្នុងនោះ កម្មវិធីថ្នាក់ជាតិទូតអ្នករៀបចំ និងកម្មវិធីក្រុមហ៊ុនឯកជន ឬសមាគមអ្នករៀបចំ។ លោកបានថ្លែងបន្តថា កន្លងមកទូតខ្មែរ នៅកូរ៉េធ្លាប់បានរៀបចំ ធ្វើមហាសង្ក្រាន្ត២ឆ្នាំជាប់គ្នាក្នុងនោះមានបងប្អូនខ្មែរ នៅទៅនោះ មកទស្សនាមានចន្លោះ១៣ ០០០ ទៅ ១៥ ០០០នាក់ ដែលចំនួននោះ គឺលើសក្រុមហ៊ុនឯកជនធ្លាប់ធ្វើកន្លងមក ត្បិតអីកម្មវិធីមានសម្បូរបែប ទាក់ទងវប្បធម៌សិល្បៈច្រើនទម្រង់ ដែលខ្មែរនៅទីនេះចង់ឃើញ។ ចំពោះក្រុមហ៊ុនឯកជនអ្នករៀបចំវិញ ឯកអគ្គរាជទូតរូបនេះថ្លែងថា កន្លងមកមានតារាច្រើន ក្រុមណាស់បានមករៀបចំការប្រគំតន្ត្រីជាបន្តបន្ទាប់ ប៉ុន្តែបើប្រៀបធៀប លើការគាំទ្រវិញ លោកសូមវាយតម្លៃដោយខ្លីថា ក្រុមលោក ព្រាប សុវត្ថិ មានអ្នកមកទស្សនាច្រើនខ្លាំងលើស ក្រុមផ្សេងៗទៀត។
លោក ឌី យ៉ាម៉ង់ បានលើកឡើងបន្តថា កម្មវិធីប្រគំតន្ត្រីដែលសិល្បករខ្មែរ តែងតែមកធ្វើនៅប្រទេសកូរ៉េភាគច្រើន គឺធ្វើនៅរដូវបុណ្យភ្ជុំបិណ្ឌ ចូលឆ្នាំ និងបុណ្យធំ របស់កូរ៉េ ហើយទីតាំងដែលធ្វើនោះគឺនៅភាគខាងជើង និងភាគខាងត្បូងទីក្រុងសេអ៊ូល។ សម្រាប់ភាគខាងជើងអាចមានអ្នកទស្សនាចន្លោះ ពី៨ពាន់នាក់ទៅជាង១ម៉ឺននាក់ ចំណែកភាគខាងត្បូងវិញ មានចន្លោះ៣ទៅ៥នាក់៕