(ភ្នំពេញ)៖ ពិតជារឿងមួយដ៏គួរឲ្យតក់ស្លុត ខណៈថ្មីៗនេះ តារាចមៀងប្រុសល្បីឈ្មោះ លោក ខេមរៈ សិរីមន្ត បានបង្ហាញសារប្រាប់មហាជនឲ្យដឹងពីស្ថានភាព របស់តារាចម្រៀងស្រី កញ្ញា ខេមរៈ ស្រីពៅ ជាប្អូនស្រីថា ស្ថានភាពជំងឺរបស់តារាចម្រៀងស្រីរូបនេះ កាន់តែធ្ងន់ធ្ងរ និងត្រៀមបញ្ជូនទៅវះកាត់ ក្នុងពេលឆាប់ៗខាងមុខ ដែលដំណឹងនេះបានធ្វើឲ្យមហាជន ជាពិសេសអ្នកគាំទ្រនាងផ្ទាល់មានការព្រួយបារម្មណ៏ជាខ្លាំង។
ជាក់ស្ដែង យោងតាមគណនីហ្វេសប៊ុក របស់លោក ខេមរៈ សិរីមន្ត បង្ហោះនូវរូបថតមួយសន្លឹក របស់កញ្ញា ខេមរៈ ស្រីពៅ ព្រមទាំងសរសេររៀបរាប់ថា «ជាច្រើនឆ្នាំមកនេះ ប្អូនស្រីដ៏កំសត់ម្នាក់នេះមិនដែលចង់ឃើញ Fan ដែលគាំទ្រគាត់ពិបាកចិត្ត ព្រោះតែស្ថានភាពជំងឺរបស់គាត់ឡើយ គាត់ចង់ឃើញ Fan គាត់ រីករាយគ្រប់ពេលវេលា...តែក្នុងនាមខ្ញុំជាបងប្រុសរបស់គាត់ ចង់ប្រាប់បងប្អូនទាំងអស់គ្នាថា នៅពេលខាងមុខនេះគាត់ត្រូវឆ្លងកាត់ការវះកាត់ ដ៏គ្រោះថ្នាក់មួយ...ខ្ញុំជាបងប្រុសជូនពរប្អូនឲ្យឆ្លងផុតពេលវេលាដ៏លំបាកនេះ បើបងប្អូនស្រឡាញ់នឹងគាំទ្រគាត់ ជូនពរគាត់ឲ្យឆ្លងផុតគ្រោះនេះផង ដើម្បីគាត់មានសុខភាពល្អ មកបំពេញការងារសិល្បៈវិញណា»។
តារាចម្រៀង ខេមរៈ សិរីមន្ត បានបង្ហាញឲ្យដឹងទៀតថា តារាចម្រៀង ខេមរៈ ស្រីពៅ នឹងត្រូវទទួលការវះកាត់ ដ៏គ្រោះថ្នាក់ក្នុងពេលឆាប់ៗខាងមុខនេះ ប៉ុន្តែទោះជាយ៉ាងណាក្ដី លោក មិនបានបង្ហើបប្រាប់ឲ្យដឹងពីប្រភេទជំងឺ របស់ខេមរៈ ស្រីពៅ ដែលត្រូវជាប្អូនស្រី បង្កើតរបស់ខ្លួននោះទេ ពោលគឺលោកបានត្រឹមតែបង្ហើប ប្រាប់ពីស្ថានភាពជំងឺរបស់នាងតែប៉ុណ្ណោះ។
គួររំឭកផងដែរថា កាលពីថ្មីៗកន្លងទៅនេះ តារាចម្រៀងស្រីដែលធ្លាប់ ទទួលបានការគាំទ្រខ្លាំង កញ្ញា ខេមរៈ ស្រីពៅ បានប្រកាសប្រាប់មហាជន នៅទំព័រហ្វេសប៊ុករបស់ខ្លួនថា នាងនឹងវិលចូលប្រឡូក ក្នុងវិស័យសិល្បៈជាថ្មី ក្រោយពីបាត់មុខអស់រយៈពេលជាង៣ឆ្នាំមកនេះ។ តែមិនបញ្ជាក់ថា នាងមានជំងឺនៅជាប់ខ្លួននោះទេ ទើបតែថ្មីៗនេះ នាងត្រូវបានលោក ខេមរៈ សិរីមន្ត ទម្លាយឲ្យដឹងថា នាងមានជំងឺជាប់ខ្លួន ដែលត្រូវវះកាត់ ហើយអាចប្រឈមមុខនឹងគ្រោះថ្នាក់ថែមទៀតផង៕