(ភ្នំពេញ)៖ លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានថ្លែងឲ្យដឹងថា ចំពោះការដំឡើងពន្ធរបស់សហរដ្ឋអាមេរិក លើទំនិញកម្ពុជា មិនពាក់ព័ន្ធនឹងបញ្ហានយោបាយនោះទេ ដូច្នេះសូមអំពាវនាវដល់ប្រជាពលរដ្ឋមេត្តាស្ងប់ចិត្ត ទុកពេលវេលាឲ្យរាជរដ្ឋាភិបាល និងក្រសួងពាណិជ្ជកម្មធ្វើកិច្ចការងារនេះ។

ថ្លែងប្រាប់អង្គភាពព័ត៌មាន Fresh News នៅថ្ងៃទី៣ ខែមេសា ឆ្នាំ២០២៥នេះ លោក ប៉ែន សុវិជាតិ បានថ្លែងឲ្យដឹងថា «ខ្ញុំសូមបដិសេដចំពោះរឿងនយោបាយ ចំពោះការដំឡើងពន្ធរបស់សហរដ្ឋអាមេរិកនេះ មិនពាក់ព័ន្ធនឹងរឿងនយោបាយនោះទេ ប្រសិនបើបងប្អូនភ្ជាប់រឿងនេះ ទៅរឿងនយោបាយជាការគិតខុសមួយ ព្រោះថា សហរដ្ឋអាមេរិកមិនមែនមានរឿងនយោបាយ ជាមួយប្រទេសទាំង១០០នោះទេ ដោយសារតែយើងសង្កេតឃើញថា សហរដ្ឋអាមេរិកដាក់អត្រាពន្ធមិនមែនតែប្រទេសកម្ពុជានោះទេ ប៉ុន្ដែបានដំឡើងពន្ធដល់ប្រទេសជាង១០០ប្រទេស រួមទាំងប្រទេសជាដៃគូនយោបាយរបស់ខ្លួន ដូចជាប្រទេសកាលណាដា និងបណ្ដាប្រទេសនៅក្នុងទ្វីបអាមេរិកឡាទិន ព្រមទាំងប្រទេសដៃគូនៅអឺរ៉ុបក្ដី ដែលត្រូវទទួលអត្រាពន្ធខ្ពស់»។

លោកបានបន្ដថា ប្រធានាធិបតី ដូណាល់ ត្រាំ បានប្រកាសហើយថានេះជាការដាក់ពន្ធក្នុងក្របខណ្ឌ ប្រកាសអាសន្នសេដ្ឋកិច្ច ដូច្នេះសូមកុំភ្ជាប់បញ្ហានេះទៅនឹងបញ្ហានយោបាយ មិនមានបញ្ហានយោបាយណាមួយកើតឡើងលើពាណិជ្ជកម្មនោះទេ នេះជាការគុណគូរពាណិជ្ជកម្មសុទ្ធសាត ដែលការទាមទារឲ្យមានការសិក្សា និងពន្យល់ទៅវិញទៅមក ដូចទៅនឹងការចរចារវាងអ្នកលក់ និងអតិថិជនយ៉ាងដូច្នេះដែរ។

លោក ប៉ែន សុវិជាតិ បានបញ្ជាក់ថា «ខ្ញុំសូមអំពាវនាវដល់ប្រជាពលរដ្ឋទាំងមូល និងឧស្សាហកម្មនាំចេញរបស់កម្ពុជា សូមមេត្តាស្ងប់ចិត្តសូមទុកពេលវេលាឱ្យរាជរដ្ឋាភិបាលកម្ពុជា ពិសេសក្រសួងពាណិជ្ជកម្ម ដើម្បីសិក្សា និងរៀបចំវិធានការជាក់ស្ដែង ដើម្បីជួយត្រឡបមកវិញ និងធានាឲ្យឧស្សាហកម្មរបស់យើងមានឧត្តមភាពសម្រាប់ការនាំចេញ និងជួយដល់កម្មករ-កម្មការិនី នៅតែមានការងារធ្វើក្នុងឧស្សាហកម្មនាំចេញនេះ»។

លោក ប៉ែន សុវិជាតិ បានបញ្ជាក់ថា ចំពោះទំនិញដែលបាននាំចេញទៅកាន់សហរដ្ឋអាមេរិកមានដូចជា សម្លៀកបំពាក់ វាយនភ័ណ្ឌ សំភារៈធ្វើដំណើរ សំបកកងរថយន្ដ, បន្ទះសូឡា, ស្បែកជើង, ប្រដាប់ប្រដាក្មេងលេង, គ្រឿងតុបតែងលម្អរ, បង្គុំខ្សែភ្លើង, គ្រឿងបន្លាសរថយន្ដ, ផលិតផលកសិកម្មមួយចំនួន និងផលិតផលធ្វើពីផ្លាស្ទិចមួយចំនួន។

សូមបញ្ជាក់ថា នៅព្រឹកថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសា នៅសហរដ្ឋអាមេរិក លោក ដូណាល់ ត្រាំ ​បានសម្រេច​កំណត់ពន្ធគយ​លើ​ទំនិញ​នាំ​ចូល​ពី​កម្ពុជាប្រមាណ៤៩% ដែល​កម្រិត​ខ្ពស់​​មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។​ បើតាមលោកត្រាំ ការដំឡើងពន្ធនេះ នឹងចូលជាធរមាននៅថ្ងៃទី៩ ខែមេសា ឆ្នាំ២០២៥ខាងមុខនេះ៕