(ភ្នំពេញ)៖ បន្ទាប់ពីប្រធានាធិបតីសហរដ្ឋអាមេរិក ដូណាល់ ត្រាំ ប្រកាសដំឡើងពន្ធលើការនាំចូលទំនិញរបស់កម្ពុជារហូតដល់៤៩% លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា បច្ចុប្បន្ននេះ ក្រុមការងាររបស់ក្រសួងសេដ្ឋកិច្ច និងហិរញ្ញវត្ថុ បាននិងកំពុងធ្វើការវាយតម្លៃយ៉ាងហ្មត់ចត់ចំពោះការកំណត់អត្រាពន្ធថ្មីនេះ​​ ដើម្បីរកដំណោះស្រាយ​ ក្នុងការធានាថាសេដ្ឋកិច្ច​កម្ពុជាបន្តមានភាពប្រកួតប្រជែង។

នៅព្រឹកថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសានៅសហរដ្ឋអាមេរិក លោក ដូណាល់ ត្រាំ ​បានសម្រេច​កំណត់ពន្ធគយ​លើ​ទំនិញ​នាំ​ចូល​ពី​កម្ពុជាប្រមាណ៤៩% ដែល​កម្រិត​ខ្ពស់​​មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។​ បើតាមលោកត្រាំ ការដំឡើងពន្ធនេះ នឹងចូលជាធរមាននៅថ្ងៃទី៩ ខែមេសា ឆ្នាំ២០២៥ខាងមុខនេះ។

ជុំវិញករណីនេះ លោក មាស សុខសេនសាន បានបញ្ជាក់ប្រាប់បណ្តាញព័ត៌មាន Fresh News នៅថ្ងៃទី៣ ខែមេសា ឆ្នាំ២០២៥នេះ យ៉ាងដូច្នេះថា «ក្រុមការងារបានពិនិត្យហើយពីកម្មវិបាកនៃការដំឡើងនេះ បន្ទាប់មកយើងនឹងមានវិធានការជាក់លាក់ និងហ្មត់ចត់បំផុត ដើម្បីជាដំណោះស្រាយ ធ្វើយ៉ាងម៉េចឱ្យធានាឱ្យសេដ្ឋកិច្ចរបស់យើងបន្តមានភាពប្រកួតប្រជែង និងប្រសើរ សម្រាប់កំណើន និងការងាររបស់ប្រជាពលរដ្ឋ»

​លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានប្រាប់បណ្តាញព័ត៌មាន Fresh News ដែរថា ករណីនេះ ​នឹងអាចមានដំណោះស្រាយក្នុងការចរចា ព្រោះការដំឡើងពន្ធនេះ អាមេរិកខ្លួនឯងក៏ប្រឈមមុខផងដែរ។

លោកបានពន្យល់ផងដែរថា ការដំឡើងពន្ធនេះ គឺដោយសារឱនភាពជញ្ជីងពាណិជ្ជកម្មរវាងកម្ពុជា និងសហរដ្ឋអាមេរិក ដោយកម្ពុជា បាននាំចេញទៅសហរដ្ឋអាមេរិកក្នុងតម្លៃជាង៩ពាន់លានដុល្លារ ​នៅពេលដែលយកមកចែកនឹង១០.៥ ពាន់លានដុល្លារ ស្មើនឹង៩៧% ហើយយក៩៧%ចែកនឹង២ គឺស្មើនឹង៤៩%។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅឆ្នាំ២០២៤ កម្ពុជា-សហរដ្ឋអាមេរិក សម្រេចបានទំហំពាណិជ្ជកម្ម ១០.១៨ពាន់លានដុល្លារ កើនឡើង១១.២% ក្នុងនោះកម្ពុជានាំចេញទៅសហរដ្ឋអេមេរិក ក្នុងតម្លៃ ៩.៩ពាន់លានដុល្លារ កើនឡើង ១១.៤% ខណៈអាមេរិកនាំចូលកម្ពុជាវិញក្នុងតម្លៃ ២៦៤.១៤លានដុល្លារ។ តាមរយៈទិន្នន័យនេះ បានបង្ហាញថា សហរដ្ឋអាមេរិក គឺជាប្រទេសដែលនាំចូលទំនិញពីកម្ពុជាច្រើនជាងគេ បន្ទាប់ពីសហរដ្ឋអាមេរិក គឺវៀតណាម ចិន ជប៉ុន និងកាណាដា។

លោក Casey Barnett​ ប្រធានសភាពាណិជ្ជកម្មអាមេរិកប្រចាំនៅកម្ពុជា (AmCham Cambodia) បានសរសេរនៅលើបណ្តាញសង្គមហ្វេសប៊ុកនាព្រឹកនេះថា ​​ចំពោះការប្រកាសដំឡើងពន្ធ ៤៩% សម្រាប់ទំនិញកម្ពុជា​នេះ ប្រសិនបើកម្ពុជាមិន​បាន​ដោះស្រាយ​យ៉ាង​ហ្មត់ចត់​ក្នុង​សប្តាហ៍នេះទេ នោះ​នឹង​បំផ្លាញ​សេដ្ឋកិច្ច​កម្ពុជា និង​បង្កើតឱ្យ​មាន​វិបត្តិ​សេដ្ឋកិច្ច​យ៉ាង​ជ្រៅ បណ្តាលឱ្យបាត់បង់​ការងារ​រាប់​សែន​នាក់ បង្ករអស្ថិរភាព​សង្គម និង​លំហូរ​ចេញ​មូលធន​យ៉ាង​ឆាប់រហ័ស។

លោកបានលើកឡើងបន្ថែមទៀតថា «កម្ពុជានាំចូលទំនិញពីសហរដ្ឋអាមេរិកត្រឹមតែ៣៥០លានដុល្លារប៉ុណ្ណោះ វានឹងត្រូវចំណាយតិចតួចដល់រដ្ឋាភិបាលកម្ពុជាក្នុងការអនុញ្ញាតឱ្យទំនិញទាំងអស់របស់សហរដ្ឋអាមេរិកត្រូវបាននាំចូលដោយគ្មានពន្ធ និងផ្តល់អាជ្ញាប័ណ្ណយ៉ាងឆាប់រហ័សដល់អាជីវកម្មរបស់សហរដ្ឋអាមេរិកដូចជា Starlink ជាដើម។ រដ្ឋាភិបាល​កម្ពុជា​ត្រូវ​ធ្វើ​កាយវិការ​ដ៏​ក្លាហាន រហ័ស»

សម្រាប់អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ដរាបណា វិធានការនេះ មិនទាន់ចូលជាធរមាន យើងមិនទាន់អាចវាយតម្លៃពីផលប៉ះពាល់បានបាននោះទេ។

តែយ៉ាងនេះក្តី លោកបានលើកឡើងថា បើទោះបីជា អាមេរិកដំឡើងពន្ធក៏ដោយ ប៉ុន្តែកម្ពុជានៅមានទីផ្សារផ្សេងទៀតដូចជា ចិន កាណាដា ខណៈកម្ពុជាក៏មានប្រព័ន្ធអនុគ្រោះពន្ធ EBA GSP កិច្ចព្រមព្រៀងពាណិជ្ជកម្មសេរីជាមួយចិន កូរ៉េ អេមីរ៉ាតអារ៉ាប់រួម និងកិច្ចព្រមព្រៀង RCEPជាដើម​៕