(ភ្នំពេញ)៖ រាជរដ្ឋាភិបាលកម្ពុជា បានកំណត់ពិតាននៃការខ្ចីបំណុលសាធារណៈពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេស ដោយក្នុងបរិការណ៍សេដ្ឋកិច្ចបច្ចុប្បន្ននេះ កម្ពុជាអាចបានក្នុងរង្វង់ ១.៧ ទៅ ២ប៊ីលានអេសដេអ៊ែ ឬប្រមាណ (២.៣ ទៅ២.៧ ប៊ីលានដុល្លារ) ក្នុងមួយឆ្នាំ ហើយកម្ចីនោះត្រូវតែយកមកប្រើសម្រាប់វិនិយោគលើវិស័យហេដ្ឋារចនាសម្ព័ន្ធសាធារណៈ ដែលមានប្រសិទ្ធភាពសេដ្ឋកិច្ចខ្ពស់ប៉ុណ្ណោះ។ នេះបើយោងតាមយុទ្ធសាស្រ្ត ស្តីពីការគ្រប់គ្រងបំណុលសាធារណៈ ២០២៤-២០២៨ ដែលរាជរដ្ឋាភិបាលទើបតែបានដាក់ចេញ។
តាមរយៈឯកសារនេះ បានបញ្ជាក់ថាផងដែរថា ក្នុងករណីកាលៈទេសៈចាំបាច់ កម្ចីបរទេសអាចបង្កើនដល់២.៥ ប៊ីលានអេសដេអ៊ែ ឬប្រមាណ ៣.៣៧ ប៊ីលានដុល្លារក្នុងមួយឆ្នាំ។ តែយ៉ាងណា រាជរដ្ឋាភិបាលបានកំណត់ថា កម្ចីបរទេសមិនអាចលើសពី ១០ប៊ីលានអេសដេអ៊ែ ឬប្រមាណ១៣.៥ ប៊ីលានដុល្លារឡើយ។
ទន្ទឹមគ្នានេះ ការបោះផ្សាយលក់មូលបត្ររដ្ឋ ក្នុងប្រទេសត្រូវស្ថិតក្នុងរង្វង់ ៥០០ប៊ីលាន ទៅ ១ទ្រីលានរៀល (ឬប្រមាណជាង១២០ទៅ២៤០លានដុល្លារ) ក្នុងមួយឆ្នាំ។ ក្នុងកាលៈទេសៈចាំបាច់ អាចបង្កើនដល់ ១.២ទ្រីលានរៀល (ឬជិត៣០០លានដុល្លារ)ក្នុងមួយឆ្នាំ ប៉ុន្តែមិនត្រូវលើសពី ៤ទ្រីលានរៀល (ឬប្រមាណ ១ប៊ីលានដុល្លារអាមេរិក) ក្នុងរយៈពេល៥ឆ្នាំនេះ។
យោងតាមយុទ្ធសាស្រ្ត ស្តីពីការគ្រប់គ្រងបំណុលសាធារណៈ ២០២៤-២០២៨ បានបញ្ជាក់ថា ចំពោះហិរញ្ញប្បទានដែលកៀរគរ តាមរយៈការខ្ចីពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេស ត្រូវប្រើប្រាស់សម្រាប់វិនិយោគលើវិស័យហេដ្ឋារចនាសម្ព័ន្ធសាធារណៈ ដែលមានប្រសិទ្ធភាពសេដ្ឋកិច្ចខ្ពស់ ជាពិសេសការបង្កើនផលិតភាពផលិតកម្ម, ការជំរុញការតភ្ជាប់, និងការលើកកម្ពស់សមត្ថភាពប្រកួតប្រជែង ដូចជា៖ ផ្លូវថ្នល់, ស្ពាន, ប្រព័ន្ធស្រោចស្រព, អគ្គិសនី, កំពង់ផែ, ការផ្គត់ផ្គង់ទឹកស្អាតនៅទីប្រជុំជន, ប្រព័ន្ធប្រព្រឹត្តិកម្មទឹកកខ្វក់, ការបណ្តុះបណ្តាលវិជ្ជាជីវៈសម្រាប់ជំរុញការអភិវឌ្ឍវិស័យ ឧស្សាហកម្ម, ឡូជីស្លឹក, ឌីជីថល ជាដើម។ ទន្ទឹមនេះ គម្រោងវិនិយោគហេដ្ឋារចនាសម្ព័ន្ធសាធារណៈ ទាំងនោះ ត្រូវមានស្តង់ដារ និងគុណភាពខ្ពស់ ស្របតាមគោលការណ៍គ្រឹះនៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិ នៅក្នុងដំណាក់កាលថ្មី ពិសេសធានាបាននូវចីរភាពសេដ្ឋកិច្ច, សង្គម, បរិស្ថាន, និងភាពធន់ទៅនឹងការប្រែប្រួលអាកាសធាតុ។ បន្ថែមលើនេះ, ចំពោះគម្រោងណា ដែលអាចបង្កើតចំណូលដោយផ្ទាល់ ត្រូវអនុវត្តតាមយន្តការឱ្យខ្ចីបន្ត ឬយន្តការផ្សេងទៀត ដែលមានកំណត់ក្នុងលិខិតបទដ្ឋានគតិយុត្តជាធរមាន។
ចំពោះទុនបានពីការបោះផ្សាយលក់មូលបត្ររដ្ឋក្នុងប្រទេស ត្រូវប្រើប្រាស់ជាអាទិភាពសម្រាប់ ហិរញ្ញប្បទានគម្រោងវិនិយោគសាធារណៈ ស្របតាមច្បាប់ស្តីពីមូលបត្ររដ្ឋ និងលិខិតបទដ្ឋានគតិយុត្ត ពាក់ព័ន្ធជាធរមាន ព្រមទាំងត្រូវគោរពតាមគោលការណ៍ចីរភាពបំណុលសាធារណៈ។
សូមជម្រាបផងដែរថា គិតត្រឹមត្រីមាសទី១ ឆ្នាំ២០២៤នេះ កម្ពុជាមានសន្និធិបំណុលសាធារណៈសរុបចំនួន ១១.០៩ប៊ីលានដុល្លារអាមេរិក ក្នុងនោះ ៩៩.១២% ត្រូវប្រមាណ ១១ប៊ីលានដុល្លារអាមេរិក ជាបំណុលសាធារណៈក្រៅប្រទេស និង ០.៨៨% ត្រូវនឹងប្រមាណ ៩៨លានដុល្លារអាមេរិក ជាបំណុលសាធារណៈក្នុងប្រទេស។
ចិនជាប្រទេសដែលផ្តល់កម្ចីច្រើនជាងគេដល់កម្ពុជា ដែលមានចំណែក ៣៦% មានទឹកប្រាក់ប្រមាណ ៣.៩៩ពាន់លានដុល្លារ, ចំណែកជប៉ុន មានចំណែកប្រមាណ ១១% មានទឹកប្រមាណជាង ១.២១ពាន់លានដុល្លារ, កូរ៉េ ៥% ប្រមាណ ៥៥០លានដុល្លារ, បារាំង ៥% មានទឹកប្រាក់ ប្រមាណ ៥៥០លានដុល្លារ ព្រមទាំងបំណុលមរតកមានចំនួន ៦% ដែលមានទឹកប្រាក់ ៦៦០លានដុល្លារ, ចំណែកបំណុលពហុភាគីវិញ កម្ពុជាជំពាក់ធនាគារអភិវឌ្ឍន៍អាស៊ី ២១% ដែលមានចំនួនទឹកប្រមាណ ២.៣២ពាន់លានដុល្លារ, ធនាគារពិភពលោក ១២% ប្រមាណ ១.៣៣ពាន់លានដុល្លារ និងពហុភាគីផ្សេងទៀត ៣% ប្រមាណ ៣៣០លានដុល្លារ៕
ចុចអានទីនេះ៖https://t.me/freshnewsasia/199411
