(ភ្នំពេញ)៖ ផ្សារទំនើបអាស៊ីមួយដែលមានឈ្មោះថា ហ្ស៊ួនហ្វា (Shun Fat Supermarket) មានសាខាចំនួន២៦ នៅរដ្ឋ កាលីហ្វ័រញ៉ា ណេវ៉ាដា និងតិចសាស់ បានបង្ហាញចំណាប់អារម្មណ៍ និងជំហរយ៉ាងច្បាស់លាស់ក្នុងការទទួលផលិតផលកសិកម្មកែច្នៃ និងផលិតផលចំណីអាហារពីកម្ពុជា​ ដែលជាឱកាសសម្រាប់អ្នកផលិតចំណីអាហារកែច្នៃរបស់កម្ពុជា ត្រូវពង្រឹងសមត្ថភាពដើម្បីនាំចេញផលិតផលកែច្នៃទៅកាន់សហរដ្ឋអាមេរិក។

ការបង្ហាញបំណងក្នុងការនាំចូលផលិតផលកសិកម្មកែច្នៃ និងផលិតផលចំណីអាហារពីកម្ពុជាទៅដាក់លក់នៅក្នុងផ្សារទំនើបមួយនេះ បន្ទាប់ពីគណៈប្រតិភូធុរកិច្ច និងវិនិយោគិនកម្ពុជាបានទៅទស្សនកិច្ចទៅសហរដ្ឋអាមេរិក ​កាលពី​ថ្ងៃទី០៧ ដល់ថ្ងៃទី១៣ ខែវិច្ឆិកា ឆ្នាំ២០២៣ នៅទីក្រុងឡុងប៊ិច រដ្ឋកាលីហ្វ័រញ៉ា និងបានទាក់ទងដោយផ្ទាល់ជាមួយម្ចាស់ផ្សារទំនើបអាស៊ីមួយនេះ។

ថ្លែងក្នុងសន្និសិទសារព័ត៌មាន នាថ្ងៃទី២៤ ខែវិច្ឆិកា ឆ្នាំ២០២៣ ក្រោយពីត្រឡប់មកពីសហរដ្ឋអាមេរិកវិញ លោកបណ្ឌិត ហោ សេរីវឌ្ឍន៍ ប្រធានក្រុមប្រឹក្សាភិបាលសមាគម IDI និងក្រុមហ៊ុន IDC បានមានប្រសាសន៍ថា ម្ចាស់ផ្សារទំនើបមួយដែលជាទីផ្សារបោះដុំ និងរាយ ​ដែលកន្លងមកបានបញ្ជាទិញទំនិញពីចិន​ វៀតណាម ថៃ បង់ក្លាដេស ឥណ្ឌា ជាដើម សម្រាប់ដាក់លក់ក្នុងផ្សារទំនើបរបស់ខ្លួន បានបង្ហាញបំណង និងជួយបើកផ្លូវដល់​ផលិតផលខ្មែរ នាំចូលទៅលក់នៅទីផ្សារនេះ​។

​លោកបានគូសបញ្ជាក់បន្តថា «គាត់ថា ​ឱ្យតែមានផលិតផលពីកម្ពុជាគាត់ចង់ទិញ ព្រោះអីគាត់ថា នឹងអាចជំនួសនៅខាងវៀតណាម និងថៃនៅថ្ងៃអនាគត។ នេះជា​អ្វីដែលគាត់ចង់សហការជាមួយយើង ដើម្បីមករកផលិតផលពីកម្ពុជារបស់យើង។តែយ៉ាងណាចំណុចដែលពិបាក គឺតម្លៃរបស់យើងនៅខ្ពស់ជាងគេបន្តិច​ ប៉ុន្តែវាក៏ជាចំណុចល្អមួយដែលកម្ពុជាជាផលិតផលថ្មីគេចង់សាក។ គាត់ថាមានអីដែលអាចនាំចូលបាន គាត់នឹងជួយបើកផ្លូវឱ្យ។ នេះគឺបង្ហាញឱ្យឃើញពីអ្នកដែលចង់បញ្ជាទិញផលិតផល ដែលគេចង់បានរបស់យើងពិតប្រាកដ ហើយក៏មានអ្នកបញ្ជាទិញផ្សេងៗទៀត ​បានជួបចរចាដែរ»។

​លោកបានលើកឡើងថា សហរដ្ឋអាមេរិក គឺជាទីផ្សារធំជាងគេ បានដែលនាំចូលនូវទំនិញពីកម្ពុជា ប្រមាណ៤០%នៃការនាំចេញសរុបរបស់កម្ពុជា ប៉ុន្តែភាគច្រើនបាននាំចូលនូវទំនិញដូចជាសម្លៀកបំពាក់ ទំនិញផលិតពីស្បែក ទំនិញធ្វើដំណើរ កាបូប គ្រឿងម៉ាស៊ីន ឧបករណ៍អគ្គិសនី និងស្បែកជើង ប៉ុន្តែមិនទាន់មានផលិតផលម្ហូបអាហារបែបកែច្នៃនាំចូលទៅកាន់ទីផ្សារអាមេរិកនៅឡើយទេ។ ​

លោកសង្កេតឃើញថា បញ្ហាដែលរាំងស្ទះ ដល់ការនាំចេញផលិតផលកសិកម្មរបស់កម្ពុជាទៅកាន់ទីផ្សារសហរដ្ឋអាមេរិក ដោយសារខ្វះការទំនាក់ទំនងរវាងអ្នកផលិតកម្ពុជា និងអ្នកបញ្ជាទិញរបស់អាមេរិក​, អ្នកផលិតមួយចំនួនមិនទាន់យល់ពីស្តង់ដារផលិតផលដែលអាចនាំចូលទៅកាន់សហរដ្ឋអាមេរិកបានស៊ីជម្រៅ, បញ្ហាមួយទៀត គឺការចុះបញ្ជីការនាំចេញផលិតផល។

​តាមរយៈដំណើរទស្សនកិច្ចរបស់គណៈប្រតិភូធុរកិច្ច និងវិនិយោគិនកម្ពុជាទៅកាន់សហរដ្ឋអាមេរិក លើកទី៣នេះ ក្រុមធុរកិច្ចកម្ពុជា បានឈ្វេងយល់បានច្រើន ពីស្តង់ដារផលិតផលនាំចូលទៅអាមេរិក ក៏ដូចជាការសិក្សាយ៉ាងស៊ីជម្រៅពីនិតិវិធីនៃការនាំចេញផលិតផលកែច្នៃទៅកាន់ទីផ្សារអាមេរិក។ ​ហើយបាន IDI នឹងចូលរួមជាមួយស្ថាប័នផ្សេងៗ​ ជំរុញនូវការវិនិយោគ ដើម្បីអាចនាំចេញទៅបាននាពេលខាងមុខ។

​​លោក ចាប សុភ័គ ប្រធាននាយកប្រតិបត្តិរបស់ក្រុមហ៊ុន ID Capital PLC បានឱ្យដឹង បន្ទាប់ពីបានទៅទស្សនកិច្ចនៅ​ផ្សារទំនើបអាស៊ី​ ហ្ស៊ួនហ្វា ម្ចាស់ផ្សារនេះបានចាប់អារម្មណ៍ច្រើនទៅលើ អង្ករ ផ្លែឈើស្រស់ ទឹកផ្លែឈើកែច្នៃដែលរបស់ទាំងនេះ ផលិតករខ្មែរសុទ្ធតែអាចធ្វើបាន ។

លោកលើកឡើងថា ទំនិញដែលដាក់លក់នៅក្នុងផ្សារនេះ ភាគច្រើនគឺជាទំនិញដែលនាំចេញពីថៃ និងវៀតណាម ហើយការណ៍ដែលគេចង់បានផលិតផលខ្មែរយកទៅដាក់លក់ ដោយសារតែវត្ថុធាតុដើមមួយចំនួនដែលថៃ និងវៀតណាមផលិត គឺនាំចេញពីកម្ពុជា ហេតុនេះហើយទើបម្ចាស់ផ្សារទំនើបអាស៊ីមួយនេះ ចង់ជួយជ្រុំជ្រែងធ្វើយ៉ាងណាឱ្យផលិតផលរបស់កម្ពុជានាំចូលទៅដាក់លក់ក្នុងផ្សារទំនើបនេះបាន​ ខណៈដែលតំបន់នោះ ក៏មានប្រជាពលរដ្ឋកម្ពុជារស់នៅច្រើនផងដែរ។

លោកបន្ត ថា «យើងសិក្សាមើលទៅ សហរដ្ឋអាមេរិក គឺជាទីផ្សារមួយដែលនឹងនរ និងជាទីផ្សារមួយធំ ហើយកម្ពុជាយើងគឺមានសក្តានុពលក្នុងការផលិតនិងកែច្នៃម្ហូបអាហារនេះហើយ​ ស្របពេលដែលការវេចខ្ចប់របស់កម្ពុជា ក៏អាចនឹងស្អាតជាងរបស់ប្រទេសជិតខាងផងដែរ។ ប៉ុន្តែបញ្ហាប្រឈម​ គឺការរបស់ផលិតរបស់ក្រុមហ៊ុន សហគ្រាស និងសិប្បកម្មរបស់កម្ពុជា មិនទាន់ដល់ស្តង់ដារដែលអាចនាំចេញបាន និងបញ្ហាមួយទៀត គឺការដឹកជញ្ជូន ដោយសារមិនទាន់មានការដឹកជញ្ជូន​ដោយត្រង់ពីកម្ពុជាទៅសហរដ្ឋអាមេរិក និងបរិមាណនៃការផលិតរបស់ផលិតផលខ្លះ មិនគ្រប់គ្រាន់តាមការបញ្ជាទិញ»។

លោកលើកទឹកចិត្តដល់ផលិតករខ្មែរដែលមានបំណងផលិតសម្រាប់នាំចេញ ឬផ្គត់ផ្គង់ក្នុងស្រុក ត្រូវពង្រឹងគុណភាពក្នុងការផលិតឱ្យមានស្តង់ដារ​។ តែយ៉ាងនេះក្តីលោកសង្កេតឃើញថា មានក្រុមហ៊ុនមួយចំនួនបំពេញបាននូវស្តង់ដារហើយ ប៉ុន្តែមានក្រុមហ៊ុនជាច្រើនទៀ​ត មិនទាន់អាចបំពេញបាននូវការផលិតតាមស្តង់ដារគុណភាពបាននៅឡើយទេ។

លោកបានគូសបញ្ជាក់ថា​ «ជាដំណោះស្រាយរបស់ IDI យើងនឹងបង្កើតជាមូលនិធិវិនិយោគមួយទៅលើវិស័យកសិកម្ម ដើម្បីគាំទ្រដល់ការពង្រឹងការផលិតផលិតផលទាំងនោះ។ ឧទាហរណ៍យើងបង្កើត ឬពង្រីកនូវរោងចក្រផលិតបន្ថែម បង្កើនការកែច្នៃ ព្រោះការច្នៃនេះពិតជាសំខាន់។ ពេលខ្លះបើយើងឱ្យអ្នកផលិត​ធ្វើខ្លួនក៏អាចជាបញ្ហាមួយដែរ។ អ៊ីចឹងយើងអាចនឹងមានជម្ឈមណ្ឌលកែច្នៃមួយដើម្បីដុសខាត់ឱ្យស្អាតឱ្យចេញជាផលិតផលមួយស្តង់ដារនេះក៏ជាចំណុចមួយដែលយើងត្រូវរៀបចំខ្លួន។ សម្រាប់ផលិតករមួយចំនួនដែលមិនចង់នាំចេញដោយផ្ទាល់ គឺយើងអាចជាអ្នកនាំចេញ ហើយមិនមែនតែសហរដ្ឋអាមេរិកទេ ថែមទាំងទៅបណ្តាប្រទេសដ៏ទៃ៕