(ភ្នំពេញ)៖ ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងធ្វើឡើងនៅថ្ងៃទី២៣ ខែកក្កដា ឆ្នាំ២០២៣ស្អែកនេះ, ស្របពេលការបោះឆ្នោតខិតចូលមកដល់សង្កេតឃើញថា ពុំមានប្រជាពលរដ្ឋសម្រុកទៅដកប្រាក់ពីធនាគារ ដូចកាលពីអំឡុងពេលបោះឆ្នោតកាលពី១០ឆ្នាំមុននោះឡើយ។
ចាប់តាំងពីយុទ្ធនាការឃោសនាបោះឆ្នោតបានចាប់ផ្តើម កាលពីថ្ងៃទី១ ខែកក្កដា ឆ្នាំ២០២៣មក សកម្មភាពអាជីវកម្ម និងការវិនិយោគបានដំណើរការជាធម្មតា។
ថ្លែងប្រាប់បណ្តាញព័ត៌មាន Fresh News បណ្ឌិត អ៉ិន ចាន់នី ប្រធាននាយកប្រតិបតិ្ដ ធនាគារអេស៊ីលីដា ភីអិលស៊ី បានបញ្ជាក់ថា និយាយចំពោះការប្រែប្រួលលើវិស័យធនាគារ ក្នុងការបោះឆ្នោតក្នុងឆ្នាំ២០២៣នេះ ពុំមានការប្រែប្រួលអ្វីនោះឡើយ ចំពោះការដកប្រាក់របស់ប្រជាពលរដ្ឋ ក៏ពុំឃើញមានប្រជាពលរដ្ឋណាមួយ មកដកលុយចេញពីធនាគារឡើយ ពោលការបោះឆ្នោតឆ្នាំនេះ គឺខុសគ្នាខ្លាំងជាងការបោះឆ្នោតកាលពីឆ្នាំ២០១៨ និងឆ្នាំ២០១៣។ កាលពីឆ្នាំ២០១៨ កន្លងទៅត្បិតថាពុំមានប្រជាពលរដ្ឋដកប្រាក់ដូចឆ្នាំ ២០១៣ពិតមែន ប៉ុន្ដែស្ថិរភាពសាច់ប្រាក់បញ្ញើពុំមានការកើនឡើងនោះឡើយ។
លោកបន្ដថា កាលពីបោះឆ្នោតអាណ្តតិមុនៗ មានប្រជាពលរដ្ឋភ័យព្រួយច្រើន ជាក់ស្ដែងការបោះឆ្នោតក្នុងឆ្នាំ ២០១៣ ការដាក់ប្រាក់បញ្ញើធ្លាក់ចុះ ការបោះឆ្នោតឆ្នាំ២០១៨ ប្រាក់បញ្ញើមិនមានធ្លាក់ចុះ ក៏មិនមានកើនឡើង ពោលគឺរក្សាភាពនឹងធឹង។
បណ្ឌិត អ៉ិន ចាន់នី បានបញ្ជាក់ថា «ចំពោះការបោះឆោតឆ្នាំ២០២៣នេះ ពុំមានប្រជាពលរដ្ឋណាភ័យព្រួយមក ដកប្រាក់ចេញពីធនាគារឡើយ មិនតែប៉ុណ្ណោះកំណើននៃការដាក់ប្រាក់បញ្ញើសន្សំកើនឡើង ហើយកើនក្នុងកម្រិតមួយខ្លាំងថែមទៀតផង កំណើននៃប្រាក់បញ្ញើសន្សំជាមូលដ្ឋានគ្រឹះយ៉ាងសំខាន់ ក្នុងការវាស់ពីភាពទុកចិត្តក្នុងវិស័យធនាគារ និងហិរញ្ញវត្ថុ ក្នុងពេលបោះឆ្នោតជាតិ ដែលបង្ហាញឲ្យឃើញថា សាធារណជនជឿជាក់លើវិស័យធនាគារ»។
បណ្ឌិតបន្ដថា គិតចាប់ពីខែមករា ដល់ខែមិថុនា ឆ្នាំ២០២៣នេះ ប្រាក់បញ្ញើសន្សំមានចំនួន ៦ ៧៤៧លានដុល្លារសហរដ្ឋអាមេរិក មានកំណើប្រមាណ ៨.៧៥ភាគរយ នេះជាតួលេខដែលបង្ហាញពីភាពរឹងមាំ និងជំនឿជឿជាក់របស់ប្រជាពលរដ្ឋ លើវិសយធនាគារ។
បណ្ឌិត អ៉ិន ចាន់នី បានបញ្ជាក់បន្ថែមថា «ការកើនឡើងនៃប្រាក់បញ្ញើក្នុងអំឡុងពេលបោះឆ្នោតនេះ ក៏ជាការបង្ហាញពីជំនឿជឿជាក់លើស្ថិរភាពសេដ្ឋកិច្ច នយោបាយ និងសង្គកិច្ច ធ្វើឲ្យវិនិយោគិនក៏ដូចជាអតថិជន ជឿជាក់លើបរិយាកាសនយោបាយ ដែលមានស្ថិរភាពខ្លាំងនេះឯង ហើយក៏ផ្សារភ្ជាប់នឹងការប្រតិបត្តិរបស់ធនាគារ ព្រោះថា នៅពេលដែលមានការជឿជាក់លើធនាគារ ធ្វើឲ្យប្រាក់បញ្ញើសន្សំកើនឡើង ព្រោះមិនមានការព្រួយបារម្ភ ក្នុងការដកលុយយកទុកនៅផ្ទះ ដូចបោះឆ្នោតលើកមុនៗឡើយ បូករួមជាមួយនឹងវិស័យធនាគារ មានហេដ្ឋារចនាសម្ព័ន្ធ របស់ធនាគារមានចម្រុះ ដែលថាអាចប្រើប្រាស់បានគ្រប់ពេលវេលាគ្រប់ទីកន្លែង»៕
