(ក្រុងហ្កាន់ឌីណាហ្កា)៖ រដ្ឋមន្ត្រីហិរញ្ញវត្ថុនិងទេសាភិបាលធនាគារកណ្តាលរបស់ក្រុមប្រទេស G20 បានបើកកិច្ចប្រជុំកាលពីថ្ងៃចន្ទអំពីកិច្ចព្រមព្រៀងរៀបចំបំណុលឡើងវិញ កំណែទម្រង់ធនាគារពហុភាគី និងហិរញ្ញវត្ថុ ដើម្បីដោះស្រាយការប្រែប្រួលអាកាសធាតុ ខណៈដែលមេដឹកនាំទាំងនេះមានគោលបំណងជំរុញសេដ្ឋកិច្ចពិភពលោកដែលកំពុងធ្លាក់ចុះ។ នេះបើយោងតាមទីភ្នាក់ងារព័ត៌មាន AFP។

ទីភ្នាក់ងារព័ត៌មាន AFP បានរាយការណ៍ថា រដ្ឋមន្ត្រីក្រសួងហិរញ្ញវត្ថុឥណ្ឌាលោកស្រី Nirmala Sitharaman ដែលជាប្រធាននិងជាម្ចាស់ផ្ទះកិច្ចប្រជុំកំពូលក្រុមប្រទេស G20 នៅទីក្រុងហ្កាន់ឌីណាហ្កា ប្រទេសឥណ្ឌាបានចាប់ផ្តើមកិច្ចប្រជុំជាមួយនឹងការប្រាប់មេដឹកនាំហិរញ្ញវត្ថុអំពី «ទំនួលខុសត្រូវដែលយើងមាន... ដើម្បីដឹកនាំសេដ្ឋកិច្ចពិភពលោកឆ្ពោះទៅរកកំណើនដ៏រឹងមាំ និរន្តរភាព តុល្យភាព និងបរិយាបន្ន»។

លោកស្រី Sitharaman បានថ្លែងទៅកាន់អ្នកសារព័ត៌មានរួមជាមួយរដ្ឋមន្ត្រីក្រសួងរតនាគារសហរដ្ឋអាមេរិកលោកស្រី Janet Yellen ថា គន្លឹះនៃរបៀបវារៈរយៈពេលពីរថ្ងៃនឹងជា «ការសម្របសម្រួលការយល់ស្របចំពោះបញ្ហាដែលមិនអាចដោះស្រាយបានដែលទាក់ទងនឹងការកើនឡើងបំណុល»។

លោកស្រី Sitharaman បានបន្ថែមថា កិច្ចពិភាក្សាក៏នឹងផ្តោតផងដែរលើ «បញ្ហាសកលសំខាន់ៗ ដូចជាការពង្រឹងធនាគារអភិវឌ្ឍន៍ពហុភាគី និងការធ្វើសកម្មភាពសម្របសម្រួលអាកាសធាតុ»។

លោកស្រី Yellen បានមានប្រសាសន៍ថា៖ «ពិភពលោកកំពុងសម្លឹងមើលក្រុមប្រទេស G20 ឱ្យបង្កើតវឌ្ឍនភាពលើបញ្ហាប្រឈមសំខាន់ៗដូចជាការប្រែប្រួលអាកាសធាតុ និងជំងឺរាតត្បាត ដែលជាផ្នែកនៃការងាររបស់យើងដើម្បីពង្រឹងសេដ្ឋកិច្ចពិភពលោក»។

លោកស្រីក៏បានលើកឡើងពីការងារដោះស្រាយវិបត្តិបំណុលក្នុងចំណោមប្រទេសក្រីក្របំផុតរបស់ពិភពលោកផងដែរ ដោយលោកស្រីបានកត់សម្គាល់វឌ្ឍនភាពនៃការរៀបចំបំណុលឡើងវិញនៅក្នុងប្រទេសសំប៊ី ដែលលោកស្រីបានពិភាក្សាអំពីបញ្ហានេះក្នុងពេលធ្វើទស្សនកិច្ចនៅទីក្រុងប៉េកាំងក្នុងខែនេះ។

លោកស្រី Yellen បានថ្លែងកាលពីថ្ងៃអាទិត្យថា កិច្ចព្រមព្រៀងរបស់សំប៊ីបានចំណាយពេល «យូរពេកក្នុងការចរចា»។ លោកស្រីបានបន្ថែមថា លោកស្រីសង្ឃឹមថា ការដោះស្រាយបញ្ហាបំណុលសម្រាប់ប្រទេសហ្គាណា និងស្រីលង្កាអាចត្រូវបាន «បញ្ចប់ឆាប់រហ័ស»។ នេះបើយោងតាមទីភ្នាក់ងារព័ត៌មាន AFP៕