(ភ្នំពេញ)៖ មន្រ្តី និងក្រុមហ៊ុននាំចេញរំពឹងថា ការនាំចេញមៀនប៉ៃលិនស្រស់របស់កម្ពុជា ទៅកាន់ទីផ្សាប្រទេសចិន នៅរដូវក្រោយនេះ នឹងកើនឡើងលើសរដូវកាលមុនពី៥ទៅ៨ដង ខណៈកសិករបានបង្កើនការផលិតច្រើនជាងមុន ស្របពេលមានទីផ្សារល្អ។
កាលពីរដូវកាលមុនកម្ពុជានាំចេញមៀនស្រស់ ទៅកាន់ប្រទេសចិន បានចំនួន ៣៤០០តោន។
លោក ភត់ សុផាន់បូរី ប្រធានក្រុមប្រឹក្សាភិបាលក្រុមហ៊ុន ពេជ្រចិន្តា ដែលជាក្រុមហ៊ុនសម្អាត កែច្នៃ និងវេចខ្ចប់ផលិតផលមៀនប៉ៃលិន បានប្រាប់បណ្តាញព័ត៌មាន Fresh News នៅថ្ងៃទី៥ ខែកក្កដា ឆ្នាំ២០២៣នេះ ថា បន្ទាប់ពីរដូវកាលប្រមូលផលមៀនប៉ៃលិនបានបញ្ចប់កាលពីថ្ងៃខែមេសា ឆ្នាំ២០២៣ ហើយនៅខែកញ្ញា ឆ្នាំ២០២៣នេះ ប្រជាកសិករនឹងចាប់ផ្តើមប្រមូលផលផ្លែមៀនប៉ៃលិននារដូវកាលថ្មី សម្រាប់ការផ្គត់ផ្គង់ក្នុងស្រុក និងនាំចេញ ជាពិសេសនាំចេញទៅកាន់ទីផ្សារប្រទេសចិន ដែលអាចនឹងកើនឡើងពី៥ទៅ៨ដង។
លោកបានលើកឡើងបន្តថា «យើងរំពឹងថានឹងមានអត្រាកើនឡើង អាចកើនឡើងខ្ពស់គុណនឹង៥ ទៅ៨ដងនៃឆ្នាំចាស់។ មូលហេតុដោយសារ នៅពេលកសិករគាត់មានទីផ្សារពិតប្រាកដ គាត់ចាប់ផលិតពេញលេញឡើងវិញ។ ជាក់ស្តែងនៅរដូវកាលមុន (ឆ្នាំ២០២២-២០២៣) កសិករមិនរំពឹងថាមានទីផ្សារនាំចេញទេ ដែលធ្វើឱ្យពួកគាត់មានការរារែកក្នុងការផលិតច្រើន ហើយការចុះអនុស្សារណៈ ក្នុងការទទួលបានសិទ្ធិនាំចេញទៅប្រទេសចិននៅខែកញ្ញា វាហួសរដូវកាលនៃការផលិតរបស់កសិករ ហេតុនេះហើយ ទើបកសិករងាកមកបង្កើនការផលិតនៅឆ្នាំនេះវិញ»។
លោកបន្តថា បន្ទាប់ពីកម្ពុជាទទួលបានសិទ្ធិនាំចេញទៅប្រទេសចិន កាលពីចុងឆ្នាំ២០២២ ទីផ្សារមៀនប៉ៃលិនល្អជាងមុន ហើយការនាំចេញផ្លែមៀនទៅប្រទេសចិន ក៏មានលក្ខណៈល្អប្រសើរ ខណៈនៅឆ្នាំនេះមានដៃគូនាំចេញមកពីប្រទេសចិនចាប់អារម្មណ៍មកទំនាក់ទំនង និងចាប់ដៃគូ ដើម្បីនាំចេញច្រើន។
សម្រាប់ក្រុមហ៊ុនរបស់លោក នៅរដូវកាលក្រោយនេះ គ្រោងនាំចេញប្រមាណ ១០០តោនក្នុងមួយខែ ដោយទទួលទិញពីកសិករ ដែលជាសមាជិករបស់សហភាពសហគមន៍មៀនប៉ៃលិនកម្ពុជា ។
លោកបន្តថា «យើងកំពុងតែធ្វើការផ្សព្វផ្សាយជាមួយកសិករ ដើម្បីយើងក្តោបទិន្នន័យពីការផលិតរបស់គាត់ កុំឱ្យខ្សែច្រវាក់ផលិតកម្មរបស់គាត់វាជាន់គ្នា នៅពេលដែលការប្រមូលផលជាន់គ្នានាំឱ្យខ្វះកម្លាំងពលកម្ម ព្រោះកន្លងមកយើងខ្វះខាតកម្លាំងពលកម្ម»។
លោកបន្ថែមថា បើទោះបីជាមៀនប៉ៃលិនមានទីផ្សារល្អ ប៉ុន្តែតម្លៃអាចនឹងមិនកើនឡើងជាងមុនច្រើននោះទេ។ តែយ៉ាងណាមិញ តម្លៃហាក់មិនទាន់កើនឡើងច្រើន ប៉ុន្តែស្រួលលក់ជាងមុន។
លោក ឈឹម វជិរា ប្រធានមន្ទីរកសិកម្ម រុក្ខាប្រម៉ាញ់ និងនេសាទ ខេត្តបាត់ដំបង បានប្រាប់បណ្តាញព័ត៌មាន Fresh News ដែរថា បន្ទាប់ពីកម្ពុជាចាប់ផ្តើមនាំចេញមៀនប៉ៃលិនទៅចិនកាលពីចុងឆ្នាំមុន នៅឆ្នាំនេះប្រជាកសិករនៅខេត្តបាត់ដំបង មានការថែទាំ និងពង្រីកការបញ្ជាឱ្យចេញផ្កាច្រើនជាងមុន។ លោករំពឹងថា អំឡុងពេលប្រមូលនៅរដូវកាលក្រោយនេះ នឹងទទួលបានទិន្នផលច្រើន ដែលសង្ឃឹមការនាំចេញទៅប្រទេសចិនចាប់ពីខែកញ្ញានេះ នឹងមានកំណើនជាងរដូវកាលមុន។
លោកបានឱ្យដឹងផងដែរថា កន្លងមកតម្លៃមៀនប៉ៃលិនប្រភេទលេខ១ ចន្លោះពី ៣៥០០រៀលទៅ ៤៥០០រៀលក្នុងមួយគីឡូក្រាម ប្រភេទលេខ២ និង៣ មានតម្លៃចន្លោះពី ២៥០០រៀលទៅ ៣០០០រៀល និងប្រភេទលេខ ៤មានតម្លៃ ១០០០រៀល ចុះក្រោម ក្នុងមួយគីឡូក្រាម។ តម្លៃនេះ គឺជាតម្លៃដែលកសិករសប្បាយចិត្ត។ ដោយឡែកតម្លៃសម្រាប់លក់ក្នុងស្រុក នាបច្ចុប្បន្ននេះ មានតម្លៃចន្លោះពី ២៣០០រៀលទៅ ២៥០០រៀលក្នុងមួយគីឡូក្រាម។
បើតាមប្រធានមន្ទីរកសិកម្មខេត្តបាត់ដំបងរូបនេះគិតត្រឹមត្រីមាសទី១ ឆ្នាំ២០២៣នេះ ចំការមៀនប៉ៃលិនក្នុងខេត្តបាត់ដំបង ដែលបានចុះបញ្ជីចំការ និងទទួលបានវិញ្ញាបនបត្រ អនុវត្តកសិកម្មល្អ (GAP) មានចំនួន១០៤ចំការ លើផ្ទៃដី១ ៤០៦ហិកតា និងមានក្រុមហ៊ុន ចំនួន៣ ដែលបានវាយតម្លៃជាប់ក្នុងការនាំផ្លែមៀនស្រស់ពីកម្ពុជាទៅចិន។
លោកបន្ថែមថា បច្ចុប្បន្ននេះសហគមន៍មៀនប៉ៃលិនស្រុករតនៈមណ្ឌល ដែលមានផ្ទៃដីចំការមៀនអនុវត្តកសិកម្មល្អ ២៥០០ហិកតា បាននិងកំពុងសហការជាមួយក្រុមហ៊ុនមកពីប្រទេសថៃ រៀបចំទីតាំងប្រមូលទិញ វេចខ្ចប់នាំផ្លែមៀនទៅក្រៅប្រទេសផងដែរ។
សូមជម្រាបថា កម្ពុជាបានចាប់ផ្តើមនាំចេញផ្លែមៀនប៉ៃលិនស្រស់ ទៅទីផ្សារប្រទេសជាលើកដំបូង កាលពីខែតុលា ឆ្នាំ២០២២ បន្ទាប់ពីការចរចាលក្ខខណ្ឌតម្រូវភូតគាមអនាម័យ បើកទីផ្សារអស់រយៈពេលជាង ៣ឆ្នាំរួចមក។
យោងតាមរបាយការណ៍ក្រសួងកសិកម្ម រយៈពេល៣ខែ ដើមឆ្នាំ២០២៣ កម្ពុជាបាននាំចេញផ្លែមៀនស្រស់ចំនួនជាង ៣ ៤២២ តោនទៅទីផ្សារប្រទេសចិន៕
