(សៀមរាប)៖ បណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុក ជាអគ្គនាយកនៃធនាគារអភិវឌ្ឍន៍ជនបទ និងកសិកម្ម (ARDB) នៅថ្ងៃទី២៥ ខែមិថុនា ឆ្នាំ២០២៣ បានបន្តអញ្ជើញចុះសំណេះសំណាល សួរសុខទុក្ខ និងផ្សព្វផ្សាយគោលការណ៍ឥណទានគាំទ្រ ដល់ខ្សែច្រវាក់ផលិតកម្មស្វាយចន្ទី នៅសហគមន៍កសិកម្មនៅឃុំលំទោង ស្រុកអន្លុងវែង ខេត្តឧត្តរមានជ័យ និងសហគមន៍កសិកម្ម នៅឃុំឃុនរាម ស្រុកបន្ទាយស្រី ខេត្តសៀមរាប។
ក្នុងឱកាសនេះ, បណ្ឌិតបានអនុញ្ញាតឱ្យអ្នកជំនាញដាំដុះស្វាយចន្ទី ធ្វើបទបង្ហាញអំពីបច្ចេកទេស ស្តីពីការដាំដុះស្វាយចន្ទី ឱ្យទទួលបានជោគជ័យ និងបានទិន្នផលខ្ពស់ ជូនដល់បងប្អូន ដើម្បីជាដើមទុន និងធ្វើការកែប្រែទម្លាប់ពីការដុះតាមគ្នា ដោយគ្មានបច្ចេកទេសទៅជាការដាំដុះ ឱ្យទទួលបានជោគជ័យ។
លោកបណ្ឌិតបានធ្វើការណែនាំ លើកទឹកចិត្តដល់បងប្អូនកសិករ ដាំដុះស្វាយចន្ទីគួររៀបចំពិនិត្យ និងសិក្សាលម្អិតពីផែនការដាំដុះ បច្ចេកទេសក្នុងការថែទាំ និងប្រមូលផល និងសិក្សាស្វែងយល់ ពីបញ្ហាប្រឈមមួយចំនួន នៃការដាំដុះស្វាយចន្ទី។ ក្នុងនោះបងប្អួនគួរសួរ នូវសំណួរមួយចំនួនមានដូចជា គួរដាំនៅពេលណា? គួរចំណាយលើអីមុនគេ ហើយបន្ទាប់អីទៀត? គួរដាក់ជីនៅពេលណា ជីប្រភេទណាខ្លះហើយដាក់របៀបណា? គួរថែទាំយ៉ាងម៉េច? គួរថែរក្សាដីរបៀបណា ហេតុអ្វីត្រូវថែរក្សាដី? គួរតែងមែកពេលណា របៀបណា ? ចុងក្រោយតើប្រមូលផលយ៉ាងម៉េច?
បន្ថែមលើនេះ លោកបណ្ឌិតបានធ្វើការណែនាំ ឱ្យបងប្អូនគួរផ្លាស់ប្តូរផ្នត់គំនិតកែប្រែ ពីការធ្វើកសិកម្មចិញ្ចឹមឆ្នាំងបាយ ឱ្យក្លាយជាការធ្វើកសិកម្មបែបទំនើបវិញ ដោយត្រូវចេះតាមដានតំលៃកសិផលនៅលើទីផ្សារ និងត្រូវចេះតាមដានព័ត៍មានព្យាករណ៍អាកាសធាតុ ក៏ដូចជាកែប្រែទម្លាប់ ពីការដាំដុះដំណាំតែមួយមុខ ឱ្យឆ្លៀតចិញ្ចឹមសត្វបន្ថែម និងចេះកែប្រែដីសម្រាប់ដាំដុះ ឱ្យទទួលបានទិន្នផលខ្ពស់។ មួយវិញទៀតវាប្រសើរជាការទុកដីទំនេរចោល គួររកដំណាំប្រភេទណា ដែលអាចដាំដុះរយៈពេលខ្លី ប៉ុន្តែមានទីផ្សារ និងមានតម្រូវការ ដែលជួយកែប្រែដីកុំឱ្យខូច ឬអន់ថយគុណភាពផងដែរ។ ហើយបងប្អូន ត្រូវចេះជ្រើសរើសដំណាំដាំតាមរដូវកាល ដោយបងប្អូនអាចធ្វើការសិក្សារៀនសូត្របន្ថែម ជាពិសេសក្នុងបរិបទសម័យទំនើបនេះ បងប្អូនអាចរៀនបានតាមរយៈបណ្ដាញសង្គម និងយូធូប (Youtube) ជាដើម ដើម្បីទទួលបានចំណេះដឹងបន្ថែម។
មួយវិញទៀតដើម្បីទទួលបានជោគជ័យ, បណ្ឌិតបានស្នើដល់បងប្អូន គួរធ្វើការចងក្រងគ្នាជាសហគមន៍កសិកម្ម ឬបណ្តុំផលិតស្វាយចន្ទី ក៏ដូចជាដំណាំរួមផ្សំផ្សេងៗទៀតផងដែរ។
បណ្ឌិតណែនាំដល់បងប្អូន គូរត្រូវរៀបចំនូវ ផែនការណ៍ដាំដុះ, រៀបចំផែនការថែទាំ, ផែនការប្រមូលផល, រួមគ្នាកែច្នៃពាក់កណ្តាលសម្រេច និង ធ្វើការផ្សារភ្ជាប់ជាមួយទីផ្សារ តាមរយៈកិច្ចសន្យាកសិកម្ម ដើម្បីធានាស្ថេរភាពតំលៃលើទីផ្សារ និងជៀសវាងការទំលាក់តំលៃ ពីឈ្មួញកណ្តាល។
ឆ្លើយតបទៅនឹងកង្វល់របស់បងប្អូនកសិករ អំពីបញ្ហាក្វះខាតថវិកា ដើម្បីពង្រីកការដាំដុះ, បណ្ឌិតបានលើកទឹកចិត្តដល់បងប្អូន ក្នុងករណីបងប្អូន ចង់បានឥណទាន ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មស្វាយចន្ទី ឬដំណាំផ្សេងទៀត ឬពង្រីកការចញ្ចឹមសត្វ បងប្អូនអាចស្នើសុំឥណទានពីធនាគារ ARDB បានក្នុងអត្រាការប្រាក់ទាបសមរម្យ។
បណ្ឌិតបានបន្ថែមទៀតថា អត្រាការប្រាក់អនុគ្រោះសម្រាប់ការដាំដុះស្វាយចន្ទីនេះ គឺជាអត្រាការប្រាក់ដែលប្រមុខរដ្ឋាភិបាលផ្តល់ជូនដល់បងប្អូនប្រជាកសិករ ក្នុងការលើកទឹកចិត្ត និងជំរុញដើម្បី ពង្រីក និងរៀបចំខ្សែច្រវាក់ផលិតកម្មស្វាយចន្ទី សាងសង់ឃ្លាំងស្តុក លានហាល និងទិញម៉ាស៊ីនបកគ្រាប់ស្វាយចន្ទីពាក់កណ្តាលសម្រេចដែលមានស្តង់ដារខ្ពស់, ទិញជី ឬផលិតជីកំប៉ុសដែលមានគុណភាព និងទិញថ្នាំដែលអាចយកមកប្រើមិនប៉ះពាល់សុខភាពខ្លួន និងអ្នកដែលទទួលទានចុងក្រោយ និងថែទាំដោយយកចិត្តទុកដាក់ខ្ពស់ ដោយសំអាតស្មៅ ជ្រោយដី ដាក់ទឹក និងដាំរុក្ខជាតិការពារស្រទាប់ដី។
បណ្ឌិត កៅ ថាច ក៏បានអំពាវនាវផងដែរដល់បងប្អូនប្រជាពលរដ្ឋ ដែលមានសិទ្ធិបោះឆ្នោត សូមអញ្ជើញទៅបោះឆ្នោតជ្រើស តំាងតំណាងរាស្រ្ត នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នាកុំបីខាន៕
