(ភ្នំពេញ)៖ អ្នកជំនួញ អ្នកដឹកជញ្ជូន និងអ្នកជំនាញសេដ្ឋកិច្ច បានលើកឡើងថា គម្រោងជីកផ្លូវទឹកតភ្ជាប់ពីទន្លេ ទៅកាន់សមុទ្ររបស់កម្ពុជា គឺជាគម្រោងប្រវត្តិសាស្រ្ត និងជាផ្លូវគមនាគមន៍យុទ្ធសាស្រ្តរយៈពេលវែង សម្រាប់កំណើនសេដ្ឋកិច្ចរបស់កម្ពុជា ដែលនឹងផ្តល់អត្ថប្រយោជន៍យ៉ាងច្រើន ជាពិសេសជំរុញឱ្យការដឹកជញ្ជូនទំនិញកាន់តែលឿន ផ្ទុកចំនួនបានច្រើន និងមានតម្លៃសមរម្យ។
កាលពីថ្ងៃទី១៩ ខែឧសភា ឆ្នាំ២០២៣ នៅក្នុងកិច្ចប្រជុំគណៈរដ្ឋមន្ត្រី សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអនុញ្ញាតឱ្យសិក្សាស៊ីជម្រៅ ចំពោះគម្រោងជីកផ្លូវទឹកតភ្ជាប់ពីទន្លេ ទៅកាន់សមុទ្ររបស់កម្ពុជា ដែលជាគម្រោងដ៏មានសារៈសំខាន់សម្រាប់ការដឹកជញ្ជូនទំនិញ ដោយគ្រោងចំណាយថវិកាប្រមាណ ១,៧០០លានដុល្លារ និងចំណាយពេល៤ឆ្នាំ។
ឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានប្រាប់បណ្តាញព័ត៌មាន Fresh News ថា ការបង្កើតផ្លូវទឹកតភ្ជាប់ពីទន្លេ ទៅកាន់សមុទ្រនេះ គឺជាផ្លូវទឹកប្រវត្តិសាស្រ្តថ្មីមួយទៀត សម្រាប់កម្ពុជាក្នុងការដឹកជញ្ជូនទំនិញ ទៅកាន់ទីផ្សារអន្តរជាតិ។
លោកគូសបញ្ជាក់ថា គម្រោងផ្លូវទឹកថ្មីនេះ នឹងធ្វើឱ្យដឹកជញ្ជូនទំនិញទៅកាន់ទីផ្សារអន្តរជាតិ កាន់តែងាយស្រួល មានតម្លៃសមរម្យ ជួយដល់ការកាត់បន្ថយថ្លៃដើមទំនិញរបស់កម្ពុជា លក់នៅលើទីផ្សារអន្តរជាតិ ដែលធ្វើឱ្យទំនិញរបស់កម្ពុជា កាន់តែមានភាពប្រកួតប្រជែងនៅលើទីផ្សារ។
លោកបញ្ជាក់បន្តថា «គម្រោងនេះនឹងផ្តល់ផលប្រយោជន៍សំខាន់ណាស់ សម្រាប់ប្រជាជនកម្ពុជា ក៏ដូចជាសេដ្ឋកិច្ចរបស់កម្ពុជា។ វាជួយរក្សាបានទឹកសម្រាប់កសិកម្ម ការចិញ្ចឹមសត្វ ធ្វើស្រែចម្ការ និងជាផ្លូវដឹកជញ្ជូនដ៏សំខាន់ មិនត្រឹមតែផ្លូវទឹកទេ ខ្ញុំឃើញថាគម្រោងនេះក៏មានផ្លូវគោកអមជាមួយផ្លូវទឹកទៀត ដូច្នេះវាជាច្រកការដឹកជញ្ជូនដ៏សំខាន់មួយទៀត ទៅកាន់ច្រកអន្តរជាតិ ដោយកន្លងមកផ្លូវទឹករបស់យើងកាត់តាមទន្លេមេគង្គ ឆ្លងកាត់វៀតណាម មានការលំបាកច្រើន ចំណាយទាំងពេលវេលា ថវិកាច្រើន ក្នុងការធ្វើបែបបទ ឆ្លងកាត់ប្រទេសវៀតណាមទៅកាន់សមុទ្រ និងទីផ្សារអន្តរជាតិមានការលំបាក ដូច្នេះបើយើងមានផ្លូវទឹកនេះ នឹងជួយសម្រួលកាត់បន្ថយពេលវេលា និងថវិកាសម្រាប់ និងកាត់បន្ថយថ្លៃដើមបានយ៉ាងច្រើន ក្នុងការប្រកួតប្រជែងទីផ្សារអន្តរជាតិ សម្រាប់ទំនិញកម្ពុជា»។
លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់ បានលើកឡើងដែរថា នេះជាគម្រោងប្រវត្តិសាស្រ្តថ្មីមួយ សម្រាប់ប្រទេសកម្ពុជា ដែលនឹងផ្តល់អត្ថប្រយោជន៍ដល់ការដឹកជញ្ជូនទំនិញតាមផ្លូវទឹក ព្រមទាំងផ្តល់ផលចំណេញដល់វិនិយោគិន ម្ចាស់ឧស្សាហកម្ម សិប្បកម្ម និងរោងចក្រផ្សេងៗ ដែលនឹងធ្វើឱ្យសេដ្ឋកិច្ចកម្ពុជាកាន់តែរីកចម្រើន។
លោកបន្តថា ការដឹកជញ្ជូនទំនិញតាមផ្លូវទឹក គឺជាមធ្យោបាយដ៏ពេញពេញនិយម ក្នុងការប្រើប្រាស់ជាងគេនៅក្នុងពិភពលោក ដោយសារដឹកបានឆ្ងាយ ផ្ទុកទំនិញបានច្រើន និងមានតម្លៃសមរម្យ។ បន្ទាប់ពីកម្ពុជាមានផ្លូវទឹកភ្ជាប់ពីទន្លេទៅកាន់សមុទ្រនេះ នឹងធ្វើឱ្យដឹកជញ្ជូនទំនិញកាន់តែងាយស្រួល កាត់បន្ថយថ្លៃដឹកជញ្ជូនឱ្យទាបជាងបច្ចុប្បន្ន និងចំណេញពេលវេលាដឹកជញ្ជូន ខណៈបច្ចុប្បន្ននេះ ក្នុងការដឹកទំនិញទៅកាន់ទីផ្សារអន្តរជាតិត្រូវចំណាយពេលច្រើន។ ជាក់ស្តែងការដឹកជញ្ជូនទំនិញពីភ្នំពេញ ទៅកាន់ខេត្តព្រះសីហនុ ត្រូវចំណាយច្រើនម៉ោងទម្រាំទំនិញបានទៅដល់កប៉ាល់ ប៉ុន្តែនៅពេលមានផ្លូវទឹកថ្មីនេះ ការដឹកជញ្ជូនត្រឹមតែខេត្តកណ្តាលប៉ុណ្ណោះ។
លោកបន្តថា «នៅពេលយើងមានផ្លូវទន្លេ កាត់ទៅសមុទ្រ បានតាមរយៈគម្រោងរបស់រាជរដ្ឋាភិបាលនេះ ប្រសិនសិក្សាបានជោគជ័យ នឹងធ្វើឱ្យសេដ្ឋកិច្ចកម្ពុជារីកចម្រើនកាន់តែខ្លាំង ព្រោះថាវាផ្តល់ភាពងាយស្រួលខ្លាំងមែនទែន សម្រាប់ការដឹកជញ្ជូន ដោយសារយើងមានដងទន្លេ ដែលតភ្ជាប់បានជាមួយសមុទ្រ ដែលធ្វើឱ្យការដឹកជញ្ជូន មិនថាវិស័យកសិកម្ម វិស័យវាយណភណ្ឌកាត់ដេរ និងការដឹកជញ្ជូនទំនិញផ្សេងៗនឹងអាចផ្តល់ភាពងាយស្រួល មានតម្លៃល្អ ព្រមទាំងងាយស្រួលក្នុងការបំពេញបែបបទផ្សេងៗ»។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជ្យបណ្ឌិតសភាកម្ពុជា បានឱ្យដឹងថា គម្រោងជីកផ្លូវទឹកតភ្ជាប់ពីទន្លេ ទៅកាន់សមុទ្ររបស់កម្ពុជា ជាគម្រោងដ៏អស្ចារ្យមួយមិនធ្លាប់មាននៅកម្ពុជា និងជាផ្លូវគមនាគមន៍យុទ្ធសាស្រ្ត រយៈពេលវែងសម្រាប់កំណើនសេដ្ឋកិច្ចរបស់កម្ពុជា។
លោកលើកឡើងថា តាមរយៈផ្លូវទឹកថ្មីនេះ នឹងជំរុញនូវកំណើនការដឹកជញ្ជូនតាមផ្លូវទឹក ដោយជំនួសនូវការដឹកជញ្ជូនតាមផ្លូវគោក ដែលចំណាយពេល និងថវិកាច្រើន រួមទាំងធ្វើឱ្យខូតខាតផ្លូវដែលត្រូវចំណាយថវិកាជាតិច្រើន ក្នុងការជួសជុស និងកែលម្អ។ មិនតែប៉ុណ្ណោះ គម្រោងផ្លូវទឹកនេះ ថែមទាំងបានជួយកាត់បន្ថយគ្រោះថ្នាក់ចរាចរណ៍ និងផលប៉ះពាល់បរិស្ថាន ព្រមទាំងផ្តល់អត្ថប្រយោជន៍ដល់វិស័យកសិកម្មផងដែរ សម្រាប់ប្រជាកសិករដែលមានដីជាប់ដងព្រែកនេះ។
ជាមួយគ្នានេះ គម្រោងនេះ ក៏ចូលរួមចំណែកជួយដល់កំណើនវិស័យទេសចរណ៍ផងដែរ តាមរយៈការទាក់ទាញ ភ្ញៀវទេសចរជាតិ និងអន្តរជាតិ ដែលពួកគេចូលចិត្តធ្វើដំណើរកម្សាន្ត និងបទពិសោធន៍ថ្មី តាមរយៈការធ្វើដំណើរតាមដងព្រែកនេះ។
លោកបន្តថា «ចំណុចមួយទៀត អាចនឹងមានកំណើននៃការវិនិយោគមួយចំនួនដែរ មានន័យថាអ្នកវិនិយោគមួយចំនួន ដែលមានឧបនិស្ស័យក្នុងការវិនិយោគលើវិស័យកសិកម្ម វិស័យឧស្សាហកម្ម ឬវិស័យផ្សេងៗដែលជាប់ពាក់ព័ន្ធនឹងការជញ្ជូន ដែលជួយសម្រួលដល់ពួកគាត់ ក្នុងការដឹកជញ្ជូនចេញយកទៅលក់ ដែលមិនចាំបាច់ប្រើប្រាស់ការដឹកជញ្ជូនតាមរថយន្ត ឬរថភ្លើង ។ ចំណុចមួយទៀត ក្រៅពីការទាក់ទាញវិនិយោគទុន ក៏នឹងធ្វើតម្លៃអចនទ្រព្យ នៅតាមដងព្រែកនេះឡើងថ្លៃផងដែរ»។
សូមជម្រាបថា គម្រោងជីកផ្លូវទឹកតភ្ជាប់ពីទន្លេ ទៅកាន់សមុទ្ររបស់កម្ពុជាត្រូវបានដាក់ឈ្មោះថា «គម្រោងផ្លូវនាវាចរណ៍ និងប្រព័ន្ធភស្តុរភារកម្មទន្លេបាសាក់»។ គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ មានគោលបំណងពង្រីកនូវវិសាលភាពនៃការប្រើប្រាស់សក្ដានុពលលើការដឹកជញ្ជូនតាមផ្លូវទឹក សំដៅចូលរួមលើកកម្ពស់សកម្មភាពសេដ្ឋកិច្ច-សង្គម ឱ្យកាន់តែមានការរីកចម្រើនឈានទៅមួយកម្រិតថែមទៀត និងផ្ដល់ជាដំណោះស្រាយសមស្របលើបញ្ហាប្រឈម និងឧបសគ្គនានា នៃវិស័យដឹកជញ្ជូនតាមផ្លូវទឹក ដែលបាននិងកំពុងតែជួបប្រទះនាពេលបច្ចុប្បន្ន។ ការសិក្សាសមិទ្ធិលទ្ធភាពគម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់នេះ ត្រូវបានបែងចែកជាពីរដំណាក់កាល ដែលប្រើប្រាស់រយៈពេលសរុប ២៦ខែ រួមមាន៖ ដំណាក់កាលទី១ ការសិក្សាបឋម ប្រើរយៈពេល ១៤ខែ និងដំណាក់កាលទី២ ការសិក្សាសមិទ្ធិលទ្ធភាព ប្រើរយៈពេល ១២ខែ៕
