(ភ្នំពេញ)៖ ក្នុងរយៈពេល ៤ខែឆ្នាំ២០២៣នេះ ទំហំពាណិជ្ជកម្មរវាងកម្ពុជាជាមួយអន្តរជាតិសម្រេចបានជាង ១៥ពាន់លានដុល្លារ ធ្លាក់ចុះជាង ១៤ភាគរយ បើធៀបនឹងរយៈពេលដូចគ្នាកាលពីឆ្នាំ២០២២ ដែលមានជាង ១៧ពាន់លានដុល្លារ។ នេះបើយោងទិន្នន័យពីអគ្គនាយកដ្ឋានគយ និងរដ្ឋាករ។
តាមទិន្នន័យដដែលនេះចាប់ពីខែមករា ដល់ខែមេសា ឆ្នាំ២០២៣ កម្ពុជាបាននាំចេញទំនិញសំខាន់ៗ ទៅកាន់ទីផ្សារអន្តរជាតិក្នុងតម្លៃ ជាង ៧.២ ពាន់លានដុល្លារ ធ្លាក់ចុះ៤.៩% ខណៈកម្ពុជាបាននាំចូលទំនិញមកវិញក្នុងទឹកប្រាក់ប្រមាណ ៧.៩ពាន់លានដុល្លារ ថយចុះ២១.១%។
សម្រាប់ទំនិញសំខាន់ៗ ដែលកម្ពុជានាំចេញរួមមាន សម្លៀកបំពាក់នាំចេញក្នុងតម្លៃ ២.១ ពាន់លានដុល្លារ, ម៉ាស៊ីន និងឧបករណ៍អគ្គិសនី ប្រមាណ ៩៧៩លានដុល្លារ, គុជខ្យងធម្មជាតិឬចិញ្ចឹម ត្បូងថ្មមានតម្លៃ នាំចេញបានជាង ៣០០លានដុល្លារ , ស្បែកជើង តម្លៃជាង ៤៣៦លានដុល្លារ រួមនឹងទំនិញសំខាន់ៗផ្សេងទៀត។
ចិនជាប្រទេសនៅនៅលេខរៀងទី១ ដែលសម្រេចបានទំហំពាណិជ្ជកម្មជាមួយកម្ពុជាច្រើនជាងគេ ដែលមានចំនួនជាង ៣.៨ពាន់លានដុល្លារ ស្របពេលអាមេរិក ស្ថិតនៅលេខរៀងទីពីរ សម្រេចបាននូវទំហំពាណិជ្ជកម្មជាមួយកម្ពុជា ប្រមាណ ២.៥ពាន់ដុល្លារ។ ចំណែកវៀតណាម នៅលេខរៀងទី៣ បន្ទាប់មកថៃ ជប៉ុន សិង្ហបុរី ឥណ្ឌូណេស៊ី និងប្រទេសផ្សេងៗទៀត៕
