(ភ្នំពេញ)៖ ក្រុមហ៊ុនអាកាសចរណ៍ AirAsia ដែលជាក្រុមហ៊ុនអាកាសចរណ៍ល្បីមួយ នៅក្នុងតំបន់នោះ បានបញ្ជាក់ពីការបើកសាខានៅប្រទេសកម្ពុជា នាដើមឆ្នាំ២០២៣ឆាប់ៗខាងមុខនេះ ដោយយកឈ្មោះថា AirAsia Cambodia ដែលជាសាខាទី៥ ក្នុងតំបន់អាស៊ាន ហើយហ៊ានអះអាងថានឹងនាំភ្ញៀវទេសចរមកកម្ពុជាឱ្យបាន ៣-៤លាននាក់ក្នុងមួយឆ្នាំ។

ក្នុងជំនួបពិភាក្សាជាមួយលោក ជា បូរ៉ា រដ្ឋលេខាធិការក្រសួងទេសចរណ៍ នាថ្ងៃទី៨ ខែធ្នូ ឆ្នាំ២០២២ លោក Tony Fernandes អគ្គនាយក្រុមហ៊ុន Capital A (ប្ដូរពី AirAsia Group) បានឱ្យដឹងថា ក្រុមហ៊ុនរបស់លោកកំពុងដំណើរការបង្កើតសាខានៅប្រទេសកម្ពុជា ដោយដាក់ឈ្មោះថាក្រុមអាកាសចរណ៍ AirAsia Cambodia។

លោក Tony បានបន្តថា នៅថ្ងៃទី៩ ខែធ្នូ ឆ្នាំ២០២២ ក្រុមហ៊ុនរបស់លោកនឹងចុះអនុស្សរណៈនៃការយោគយល់គ្នាជាមួយក្រុមហ៊ុនក្នុងស្រុក ដែលធ្វើឡើងនៅរាជធានីភ្នំពេញ ដើម្បីឈានទៅការបង្កើតក្រុមអាកាសចរណ៍ AirAsia Cambodia នៅប្រទេសកម្ពុជា ឱ្យបាននាពាក់កណ្ដាលខែមករា ឆ្នាំ២០២៣ខាងមុខនេះ។

អគ្គនាយក្រុមហ៊ុន Capital A បានបន្តថា កម្ពុជានឹងក្លាយជាប្រទេសទី៥ក្នុងតំបន់អាស៊ាន ដែលមានទីស្នាក់ការរបស់ក្រុមហ៊ុនអាកាសចរណ៍ AirAsia បន្ទាប់ពីប្រទេសម៉ាឡេស៉ី ឥណ្ឌូណេស៉ី ហ្វីលីពីន និងប្រទេសថៃ។ ក្រៅពីនេះក្រុមហ៊ុនអាកាសចរណ៍ AirAsia ក៏មានស្នាក់ការនៅក្រៅតំបន់ដែរ ដូចជានៅប្រទេសជប៉ុន និងឥណ្ឌា។

ក្នុងជំនួបនៅទីស្ដីការក្រសួងទេសចរណ៍នោះ លោកអគ្គនាយក AirAsia បានបញ្ជាក់ដែរថា ក្រុមហ៊ុនលោកមានគម្រោងទាក់ទាញភ្ញៀវទេសចរ និងអ្នកដំណើរចូលមកប្រទេសកម្ពុជាឱ្យបាន៣-៤លាននាក់ក្នុង១ឆ្នាំ ដោយជំហានដំបូងក្រុមហ៊ុនគ្រោងដាក់ដំណើរការយន្តហោះចំនួន ៤គ្រឿងដែលជាប្រភេទ​ Airbus A321 ដោយតភ្ជាប់គោលដៅក្នុងតំបន់អាស៊ាន ជប៉ុន ឥណ្ឌា និងចិន ព្រមទាំងគោលដៅក្នុងស្រុកផងដែរ ដូចជាភ្នំពេញ-សៀមរាប ភ្នំពេញ-ព្រះសីហនុ។

បើតាមការបញ្ជាក់របស់អគ្គនាយក AirAsia គោលដៅអាទិភាពក្នុងការតភ្ជាប់ជើងហោះហើរត្រង់មកកម្ពុជា គឺប្រទេសក្នុងតំបន់អាស៊ាន។ លើសពីនេះ ក្រុមហ៊ុនអាកាសចរណ៍ AirAsia ក៏មានចំណាប់អារម្មណ៍តភ្ជាប់ជើងហោះហើរត្រង់ពីប្រទេសចិនមកកម្ពុជា និងពីប្រទេសឥណ្ឌាមកកម្ពុជាផងដែរ។ គួរជម្រាបថា កម្ពុជាមិនទាន់មានជើងហោះហើរត្រង់ជាមួយប្រទេសឥណ្ឌានៅឡើយទេ ដូច្នេះនៅពេលមានការឯកភាពនិងដំណើការជើងហោះហើរត្រង់ជាមួយគ្នានាពេលខាងមុខនោះ ក្រុមហ៊ុនអាកាសចរណ៍ AirAsia នឹងដើរតួជាផ្នែកសំខាន់ក្នុងការដឹកជញ្ជូនភ្ញៀវទេសចរតាមផ្លូវអាកាស។

បើតាមការបន្ថែមរបស់លោក Tony យន្តហោះប្រភេទ​ Airbus A321 គឺអាចដឹកជញ្ជូនអ្នកដំណើរប្រមាណ២០០នាក់ ហើយប្រសិនបើអ្នកដំណើរ ទៅមកចេញចូលកាន់តែមានកំណើន នោះក្រុមហ៊ុននឹងបន្ថែមចំនួន យន្តហោះមកទៀតដែរ។

លោក ឈុន មករា ប្រធាននាយកដ្ឋានគ្រប់គ្រងទីភ្នាក់ងារទេសចរណ៍​ ដឹកជញ្ជូន​ និងមគ្គុទេសក៍ទេសចរណ៍​ បានឱ្យដឹងថា ក្រសួងទេសចរណ៍មានក្ដីសង្ឃឹមថា ការវិនិយោគរបស់ក្រុមហ៊ុនអាកាសចរណ៍ AirAsia នឹងនាំមកនូវកំណើនភ្ញៀវទេសចរបន្ថែមទៀត ឱ្យចូលមកទស្សនាកម្ពុជា ពិសេសបានចូលរួមផ្សព្វផ្សាយពីគោលដៅរបស់កម្ពុជា ទៅកាន់ពិភពលោកបន្ថែមទៀត។

លោក ឈុន មករា បានបន្តថា ក្រុមហ៊ុនអាកាសចរណ៍ AirAsia នេះ គឺមានយន្តហោះប្រភេទ Airbus A321 សរុបដល់ទៅជាង២០០គ្រឿង។ ម្យ៉ាងទៀតថ្លៃសំបុត្រយន្តហោះរបស់ក្រុមហ៊ុនអាកាសចរណ៍នេះ ក៏មានតម្លៃសមរម្យ ខណៈភ្ញៀវទេសចរនិងអ្នកដំណើរក៏និយមច្រើនដែរ ដូច្នេះក្រសួងពិតជាមានការរំពឹងទុកខ្ពស់ ចំពោះការជំរុញចលនាភ្ញៀវទេសចរអន្តរជាតិ ចូលមកកម្ពុជា។

បើតាមលោកអគ្គនាយក Tony Fernandes អ្វីដែលជាបញ្ហាសម្រាប់ក្រុមហ៊ុនអាកាសចរណ៍ AirAsia គឺក្រុមហ៊ុនតែងតែ ត្រូវការព្រលានយន្តហោះដាច់ដោយឡែក តួយ៉ាងដូចនៅប្រទេសថៃ គឺមានព្រលានយន្តហោះដនមឿងមួយ គឺសម្រាប់តែយន្តហោះរបស់ក្រុមហ៊ុនអាកាសចរណ៍ AirAsia ប៉ុណ្ណោះ ខណៈកម្ពុជានៅមិនទាន់មានព្រលានយន្តហោះ សម្រាប់ក្រុមហ៊ុនអាកាសចរណ៍ AirAsia ដាច់ដោយឡែកនៅឡើយ។ បញ្ហាផ្សេងទៀត គឺពន្ធព្រលានយន្តហោះមានតម្លៃថ្លៃជាងប្រទេសជិតខាង និងថ្លៃប្រេងឥន្ធនៈក៏មានតម្លៃខ្ពស់ជាងប្រទេសផ្សេងដែរ។ តែទោះជាយ៉ាងណា ក្រុមហ៊ុននៅតែជម្នះបើកឱ្យមានសាខា របស់ខ្លួននៅកម្ពុជា។

អ្វីដែលពិសេសចំពេលមានតម្រូវការនោះ គឺថាកម្ពុជាកំពុងផ្សព្វផ្សាយ «ឆ្នាំទស្សនាកម្ពុជា» ដើម្បីអបអរសាទរការឈានឆ្ពោះព្រឹត្តិការណ៍ប្រកួតកីឡាស៉ីហ្គេម និងអាស៊ានប៉ារ៉ាហ្គេមឆ្នាំ២០២៣ ដូច្នេះក្រុមហ៊ុនអាកាសចរណ៍ AirAsia ក៏បានសន្យារៀបចំយន្តហោះ ១គ្រឿងសម្រាប់ឱ្យភាគីកម្ពុជា បិទផ្ទាំងរូបភាពរចនាអំពីការផ្សព្វផ្សាយទាក់ទាញភ្ញៀវទេសចរ ឱ្យចូលរួមក្នុងព្រឹត្តិការណ៍កីឡាអន្តរជាតិទាំង ២នេះដែរ៕