(ភ្នំពេញ)៖ ធនាគារសហគ្រាសធុនតូច និងមធ្យមកម្ពុជា ម.ក (SME Bank) និងគ្រឹះស្ថានហិរញ្ញវត្ថុចូលរួមទាំង២២ បានសម្រេចបង្កើនទំហំទឹកប្រាក់កម្ចីក្រោមគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ (TRCS) ពី៤០ម៉ឺនដុល្លារអាមេរិក រហូតដល់ ៦០ម៉ឺនដុល្លារអាមេរិក។
ម្ចាស់អាជីវកម្មក្នុងវិស័យទេសចរណ៍ អាចស្នើសុំកម្ចីក្រោមគ្រោង TRCS ក្នុងទំហំប្រាក់រហូតដល់៦០ម៉ឺនដុល្លារអាមេរិក ឬសមមូលជាប្រាក់រៀល ជាមួយអត្រាការប្រាក់ត្រឹមតែ ៦.៥% ក្នុងមួយឆ្នាំ ដែលមានរយៈពេលកម្ចី រហូតដល់៨ឆ្នាំ និងអនុគ្រោះពន្យារបង់ប្រាក់ដើម (បង់តែការប្រាក់) រហូតដល់រយៈពេល ២៤ខែដំបូង។ លក្ខខណ្ឌទាំងនេះ នឹងចាប់ផ្តើមអនុវត្តចាប់ពីថ្ងៃនេះតទៅ។
ការបង្កើនទំហំទឹកប្រាក់កម្ចី ក៏ដូចជាផ្តល់ជូននូវលក្ខខណ្ឌអនុគ្រោះផ្សេងៗ គឺដើម្បីឲ្យម្ចាស់អាជីវកម្មក្នុងវិស័យទេសចរណ៍ អាចស្តារ និងបើកដំណើរការអាជីវកម្មរបស់ពួកគេឡើងវិញ បន្ទាប់ពីទទួលរងផលប៉ះពាល់ដោយសារវិបត្តិនៃជំងឺកូវីដ-១៩ នាពេលកន្លងមក។
ជាមួយគ្នានេះដែរ គិតតាមទិន្នន័យជាក់ស្តែងត្រឹមថ្ងៃទី២២ ខែកញ្ញា ឆ្នាំ២០២២ ម្ចាស់អាជីវកម្មដែលទទួលបានប្រាក់កម្ចីក្រោមគម្រោងនេះ មានចំនួន១៨៦ ជាមួយនឹងទំហំទឹកប្រាក់កម្ចីសរុបចំនួន ២៤.៥៥លានដុល្លារអាមេរិក ដែលអាជីវកម្មទាំងនោះរួមមាន៖ សណ្ឋាគារ ២៥%, ផ្ទះសំណាក់ ២៦%, ភោជនីយដ្ឋាន ៣៧% និងអាជីវកម្មគាំទ្រវិស័យទេសចរណ៍មាន ១២%។
ម្ចាស់អាជីវកម្មក្នុងវិស័យទេសចរណ៍ដែលមានតម្រូវការហិរញ្ញវត្ថុ សូមអញ្ជើញទំនាក់ទំនងទៅកាន់សាខាធនាគារដៃគូរួមមាន៖ ធនាគារ កាណាឌីយ៉ា, ធនាគារ ស្ថាបនា, ធនាគារ អេស៊ីលីដា, ធនាគារ ជីប ម៉ុង, ធនាគារ វឌ្ឍនៈអាស៊ីចំកាត់, ធនាគារ វីង, ធនាគារព្រីនស៍, ធនាគារ ស៊ីអាយអិមប៊ី, ធនាគារ ប្រៃសណីយ៍កម្ពុជា, ធនាគារ ភ្នំពេញពាណិជ្ជ, ធនាគារ អ អេច ប៊ី, ធនាគារ សាខម, ធនាគារ ហត្ថា, ធនាគារ ហ្វីលីព, ធនាគារ អេស៊ា-ប៉ាស៊ីហ្វិក, ធនាគារ ពាណិជ្ជកម្មក្រៅប្រទេស នៃកម្ពុជា, គ្រឹះស្ថានមីក្រូហិរញ្ញវត្ថុ ប្រាសាក់, គ្រឹះស្ថាន មីក្រូហិរញ្ញវត្ថុ ខេមា, គ្រឹះស្ថានមីក្រូហិរញ្ញវត្ថុ អិលអូអិលសុី, គ្រឹះស្ថានមីក្រូហិរញ្ញវត្ថុ អម្រឹត និងធនាគារ ហុង លីអុង៕
