(ហាណូយ)៖ ក្រុមហ៊ុនកៅស៊ូក្នុងប្រទេសវៀតណាមកំពុងប្រឈមនឹងចក្ខុវិស័យប្រាក់ចំណេញដ៏អួរអាប់សម្រាប់រយៈពេលនៅសេសសល់ក្នុងឆ្នាំនេះ ខណៈពេលដែលតម្រូវការពិភពលោកធ្លាក់ចុះ និងការចំណាយកើនឡើង។ នេះបើយោងតាមកាសែត VN Express របស់វៀតណាម។

កាសែត VN Express បានរាយការណ៍ថា ក្រុមហ៊ុន Vietnam Rubber Group រំពឹងថា ប្រាក់ចំណេញរបស់ខ្លួននឹងមានចំនួន ៥,៣៤ពាន់ពាន់លានដុង (២២៥,១៣លានដុល្លារ) នៅឆ្នាំនេះ ហើយប្រាក់ចំណូលនឹងកើនឡើងត្រឹមតែ ៥% ប៉ុណ្ណោះដោយសារតម្លៃកៅស៊ូបានធ្លាក់ចុះដោយសារការប្រើប្រាស់ទាប ខណៈដែលការចំណាយប្រតិបត្តិការបានកើនឡើង។

ក្រុមហ៊ុន Phuoc Hoa Rubber បានមើលឃើញថា ប្រាក់ចំណេញក្នុងត្រីមាសទីពីររបស់ខ្លួនធ្លាក់ចុះមួយភាគបីមកនៅត្រឹម ៥៤,៨ពាន់លានដុង (ប្រហែល ២,៣លានដុល្លារ) ហើយប្រាក់ចំណូលបានធ្លាក់ចុះជិត ៥០% ដល់ ២៣១ពាន់លានដុង (ប្រហែល ៩,៧៣លានដុល្លារ) ខណៈដែលក្រុមហ៊ុន Da Nang Rubber Company មើលឃើញថាប្រាក់ចំណេញធ្លាក់ចុះជិត ២២% មកនៅត្រឹម ៨៣,៨៨ពាន់លានដុង (ប្រហែល ៣,៥៣លានដុល្លារ)។

ក្រុមហ៊ុនទាំងពីរបានឱ្យដឹងថា ការកើនឡើងថ្លៃដើម និងការធ្លាក់ចុះការលក់ គឺជាហេតុផលចម្បងសម្រាប់ការធ្លាក់ចុះប្រាក់ចំណេញនេះ។

កាសែត VN Express បានរាយការណ៍ថា តម្លៃកៅស៊ូសកលបានធ្លាក់ចុះមួយភាគបីមកនៅត្រឹមប្រហែល ១ ៧៥០ដុល្លារក្នុងមួយតោនដោយសារភាពតានតឹងភូមិសាស្ត្រនយោបាយ កង្វះកុងតឺន័រ ការកើនឡើងនៃការដឹកជញ្ជូន និងការបំពេញបែបបទបញ្ចេញទំនិញពីគយយឺតយ៉ាវនៅទូទាំងពិភពលោក។

តម្លៃនាំចេញកៅស៊ូរបស់វៀតណាមបានធ្លាក់ចុះ ៧,៦% នៅខែសីហាធៀបនឹងរយៈពេលដូចគ្នានៅឆ្នាំមុនមកត្រឹម ១ ៥១៦ដុល្លារក្នុងមួយតោនក្នុងខែសីហា ដែលជាការធ្លាក់ចុះបួនខែជាប់គ្នា។

ប្រទេសចិន ដែលជាប្រទេសនាំចូលកៅស៊ូធំបំផុតរបស់វៀតណាម បានទិញកៅស៊ូក្នុងតម្លៃទាបជាងឆ្នាំមុន ៩,៣% មកនៅត្រឹម ១ ៤៧៤ដុល្លារក្នុងមួយតោន។ ការធ្លាក់ចុះនៃការប្រើ ប្រាស់កៅស៊ូក្នុងប្រទេសចិនត្រូវបានលើកឡើងថាជាហេតុផលដែលបណ្តាលឱ្យកៅស៊ូធ្លាក់ចុះថ្លៃ។

ប៉ុន្តែសមាគមប្រទេសផលិតកៅស៊ូធម្មជាតិមានសុទិដ្ឋិនិយមចំពោះចក្ខុវិស័យរយៈពេលខ្លីនៃទីផ្សារកៅស៊ូ ដោយសារបានប៉ាន់ប្រមាណថា ពិភពលោកខ្វះកៅស៊ូធម្មជាតិជាង ៩៣ ០០០តោន។ នេះបើយោងតាមកាសែត VN Express៕