(ភ្នំពេញ)៖ សមាគមមីក្រូហិរញ្ញវត្ថុកម្ពុជា ជំរុញឱ្យពលរដ្ឋដែលមានតម្រូវការកម្ចី គួរប្រើប្រាស់កម្ចីពីគ្រឹះស្ថានហិរញ្ញវត្ថុដែលស្របច្បាប់ ជៀសវាងការចងការប្រាក់ក្រៅផ្លូវការ ឬកម្ចីតាមអនឡាញ ដើម្បីកុំមានបញ្ហា ឬការគំរាមកំហែងផ្សេងៗ។
លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា បានបង្ហាញការគាំទ្រចំពោះការប្រកាសរបស់ធនាគារជាតិ ដែលបានក្រើនរំលឹកពលរដ្ឋឱ្យជៀសវាងកម្ចីផ្លូវការ ឬកម្ចីតាមអនឡាញ ព្រោះកម្ចីខុសច្បាប់ទាំងនេះ បង្កផលប៉ះពាល់យ៉ាងច្រើនដល់ពលរដ្ឋ ដោយសារតែកម្ចីបែបនេះ បានយកអត្រាការប្រាក់ខ្ពស់ហួសហេតុ ហើយការផ្តល់ឥណទានធ្វើឡើងដោយមិនបានសិក្សាឱ្យបានច្បាស់លាស់ពីផលប៉ះពាល់របស់អតិថិជនឡើយ។ មិនតែប៉ុណ្ណោះ នៅពេលអតិថិជនគ្មានលទ្ធភាពសង ពួកគេអាចនឹងប្រព្រឹត្តិអំពើអសីលធម៌ផ្សេងៗ ដូចជាការបរិហារផ្សេងៗ ការបង្ខិតបង្ខំ ការរឹបអូសទ្រព្យសម្បត្តិជាដើម។ លើសពីនេះទៅទៀត សូម្បីតែបងប្អូន មិត្តភក្តិរបស់អ្នកទទួលកម្ចី ក៏រងការគំរាមកំហែងផងដែរ។
ការលើកឡើងរបស់ លោក កាំង តុងងី បន្ទាប់កាលពីពេលថ្មីៗ មានពលរដ្ឋមួយចំនួនបានធ្លាក់ខ្លួនជាប់បំណុលវ័ណ្ឌ.ក ដោយសារតែកម្ចីទាំងនោះមានអត្រាការប្រាក់ខ្ពស់។ ជាមួយគ្នានេះ ក៏មានករណីអ្នកផ្តល់កម្ចីតាមអនឡាញមួយចំនួនបានបង្ហោះទារប្រាក់ពីអ្នកខ្ចីបំណុលរបស់ខ្លួន។ ចំណែកបងប្អូន សាច់ញាតិ និងមិត្តភក្តិរបស់កូនបំណុលខ្លះក៏ត្រូវម្ចាស់កម្ចីទាំងនោះហៅទូរសព្ទ ឬទាក់ទងតាមបណ្តាញសង្គម រំខាន និងគំរាមកំហែងផងដែរ។
លោក កាំង តុងងីបានថ្លែង យ៉ាងដូច្នេះថា «សមាគមមីក្រូហិរញ្ញវត្ថុ ក៏សូមអំពាវនាវដល់សាធារណជន និងបងប្អូនទូទៅ ប្រសិនបើមានតម្រូវការកម្ចី សូមងាកទៅប្រើប្រាស់កម្ចីពីគ្រឹះស្ថានផ្លូវការដែលមានអាជ្ញាប័ណ្ណ។ ទោះបីជាពេលខ្លះ ត្រូវការពេលវេលា ឯកសារអីបន្តិចមែន តែវាជាយន្តការមួយដើម្បីការពារបងប្អូន ពីព្រោះគ្រឹះស្ថានត្រូវធានាបានថា បងប្អូនយកកម្ចីទៅប្រើប្រាស់ចំគោលដៅ វាជួយឱ្យជីវភាពបងប្អូនរីកចម្រើន បន្ទាប់ពីប្រាស់ប្រាស់កម្ចី ហេតុនេះហើយបានជាយើងត្រូវការសិក្សាស៊ីជម្រៅជាងកម្ចីក្រៅផ្លូវការដែលគេមិនខ្វល់ថាបងប្អូនយកទៅធ្វើអី គឺវាស្រួលតែពេលហ្នឹងទេ តែពេលមានរឿងរ៉ាវកើតឡើងមានការបង្ខិតបង្ខំ ហើយពេលខ្វះមានការបង្ខំឱ្យអតិថិជនលក់ទ្រព្យសម្បត្តិ ឬផ្ទេរទ្រព្យសម្បត្តិទៅឱ្យម្ចាស់កម្ចីជាដើម។
លោកបន្ថែមថា សម្រាប់ពលរដ្ឋដែលរងការគំរាមកំហែង គួរតែប្តឹងទៅអាជ្ញាធរមានសមត្ថកិច្ច ជាពិសេសសម្រាប់កម្ចីតាមអនឡាញ គួរប្តឹងទៅនាយកដ្ឋានបទល្មើសបច្ចេកវិទ្យាដែលអាចមានបច្ចេកវិទ្យាក្នុងការតាមដាន និងកំណត់មុខសញ្ញា។
ធនាគារជាតិនៃកម្ពុជាកាលពីពេលថ្មីៗនេះ បានព្រមានចាត់វិធានការតាមផ្លូវច្បាប់ ចំពោះក្រុមហ៊ុន ឬបុគ្គលដែលមិនមានអាជ្ញាប័ណ្ណ តែធ្វើសកម្មភាពយ៉ាងសកម្ម ក្នុងការផ្ដល់ឥណទានជូនប្រជាពលរដ្ឋ និងស្នើដល់ប្រជាពលរដ្ឋទាំងអស់ ប្រើប្រាស់សេវាហិរញ្ញវត្ថុផ្លូវការ ដែលស្ថិតក្រោមការត្រួតពិនិត្យរបស់ធនាគារជាតិនៃកម្ពុជា ព្រោះអតិថិជនរបស់គ្រឹះស្ថានទាំងនោះ ត្រូវបានការពារដោយច្បាប់។
យោងតាមសេចក្ដីប្រកាសព័ត៌មាន របស់ធនាគារជាតិនៃកម្ពុជា បានបញ្ជាក់ថា កន្លងមកធនាគារជាតិនៃកម្ពុជា សង្កេតឃើញថា មានជនខិលខូចមួយចំនួនបានផ្សព្វផ្សាយយ៉ាងបើកចំហ ដោយផ្តល់ឥណទានដល់ប្រជាពលរដ្ឋតាមរូបភាពផ្សេងៗជាច្រើនដូចជា៖ ប្រព័ន្ធអនឡាញ, បណ្តាញសង្គម, ការផ្សព្វផ្សាយតាមខិត្តប័ណ្ណ និងការបិតផ្សាយតាមទីកន្លែងសាធារណៈនានាជាដើម។ ការផ្តល់ឥណទានដោយក្រុមហ៊ុន ឬបុគ្គលដែលគ្មានអាជ្ញាបណ្ណទាំងនេះ គឺជាសកម្មភាពល្មើសនឹងច្បាប់ជាធរមាន ជាពិសេសច្បាប់ស្ដីពីគ្រឹះស្ថានធនាគារ និងហិរញ្ញវត្ថុ។
ធនាគារជាតិនៃកម្ពុជា បានថ្កោលទោសចំពោះការផ្សព្វផ្សាយព័ត៌មាន និងការផ្តល់ឥណទានក្រៅផ្លូវការខុសច្បាប់គ្រប់រូបភាព និងសហការជាមួយអាជ្ញាធរមានសមត្ថកិច្ចពាក់ព័ន្ធ ដើម្បីចាត់វិធានការតាមផ្លូវច្បាប់ចំពោះក្រុមហ៊ុន ឬបុគ្គលដែលធ្វើសកម្មភាពល្មើសនានាតាមនីតិវិធីច្បាប់ជាធរមានផងដែរ៕
