(ភ្នំពេញ)៖ នារសៀលថ្ងៃទី២ ខែសីហា ឆ្នាំ២០២២ នៅទីស្តីការក្រុមប្រឹក្សាអភិវឌ្ឍន៍កម្ពុជា (ក.អ.ក.) មានរៀបចំកិច្ចប្រជុំលើកទី១ របស់ក្រុមប្រឹក្សាផ្តល់យោបល់ សម្រាប់ការអភិវឌ្ឍវិស័យយានយន្ត និងអេឡិចត្រូនិក ក្រោមអធិបតីភាពរបស់លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការ ក.អ.ក.។
គោលបំណងនៃកិច្ចប្រជុំគឺ៖ (១) ការពិភាក្សា និងប្រមូលធាតុចូលពាក់ព័ន្ធនឹងតួនាទី ភារកិច្ច និងការរៀបចំការប្រព្រឹត្តទៅរបស់ក្រុមប្រឹក្សាផ្តល់យោបល់ (២) ការកំណត់វិធានការអាទិភាព សម្រាប់កិច្ចសហប្រតិបត្តិការ និង (៣) ការរៀបចំអនុវត្តវិធានការអភិវឌ្ឍកម្មវិធីធ្វើឲ្យប្រសើរឡើងនូវជំនាញនៃកម្លាំងពលកម្ម។
កិច្ចប្រជុំមានការចូលរួមពីលោក លោកស្រីតំណាងក្រសួង ស្ថាប័នពាក់ព័ន្ធ វិនិយោគិនដែលមានសកម្មភាពក្នុងវិស័យទាំងពីរនេះ អ្នកអភិវឌ្ឍតំបន់សេដ្ឋកិច្ចពិសេស គ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ សមាគមធុរកិច្ចជាតិ និងអន្តរជាតិ និងលេខាធិការដ្ឋានដឹកនាំ និងសម្របសម្រួលការអនុវត្តគោលនយោបាយ អភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ (IDP) នៃ ក.អ.ក. សរុបចំនួនប្រមាណ ៧០រូប។
លោក សុខ ចិន្តាសោភា បានរំឭកជូនអង្គប្រជុំពីសាវតារនៃការបង្កើតក្រុមប្រឹក្សាផ្តល់យោបល់ ជាវិធានការមួយក្នុងចំណោមវិធានការចំនួន២០ ដែលបានដាក់ចេញក្នុងសេចក្តីព្រាងផែនទី បង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា តាមរយៈចំណារឯកភាពដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលពីថ្ងៃទី៣ ខែឧសភា ឆ្នាំ២០២២។
លោករដ្ឋមន្រ្តី ក៏បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់តំណាងក្រសួង ស្ថាប័នពាក់ព័ន្ធ សហការជាមួយក្រុមការងារ Boston Consulting Group (BCG) ក្រោមការគាំទ្រពីរាជរដ្ឋាភិបាលនៃចក្រភពអង់គ្លេស ដែលបានខិតខំធ្វើការយ៉ាងជិតស្និទ្ធជាមួយភាគីពាក់ព័ន្ធ ដើម្បីធ្វើឲ្យផែនទីបង្ហាញផ្លូវអាចអនុវត្ត និងទទួលបាននូវលទ្ធផលជាផ្លែផ្កា បន្ទាប់ពីទទួលបានការអនុម័តនាពេលខាងមុខពីគណៈរដ្ឋមន្រ្តី។
អង្គប្រជុំបានពិភាក្សាយ៉ាងផុលផុសពាក់ព័ន្ធទៅនឹងចក្ខុវិស័យរយៈពេលវែង និងយន្តការតម្រង់ទិសជាក់លាក់ ជាមួយនឹងតម្រូវការនិងបញ្ហាប្រឈមជាក់ស្តែងរបស់អ្នកវិនិយោគ ដើម្បីធ្វើយ៉ាងណា ឲ្យសេដ្ឋកិច្ចកម្ពុជាមានសមត្ថភាពប្រកួតប្រជែងតម្លៃ ក្នុងប្រតិបត្តិការនៃវិស័យទាំងនេះ។
ក្នុងន័យនេះ អង្គប្រជុំក៏បានស្តាប់ និងពិភាក្សាលើបទបង្ហាញពីការអភិវឌ្ឍធនធានមនុស្ស ដោយមានការរៀបចំនូវវិធានការអភិវឌ្ឍកម្មវិធី ធ្វើឲ្យប្រសើរឡើងនូវជំនាញកម្លាំងពលកម្ម ដើម្បីបំពេញតម្រូវការក្នុងវិស័យយានយន្ត និងអេឡិចត្រូនិក។
គួរបញ្ជាក់ផងដែរថា សហប្រធាននៃក្រុមប្រឹក្សាផ្តល់យោបល់សម្រាប់ការអភិវឌ្ឍវិស័យយានយន្ត និងអេឡិចត្រូនិក មាន ក.អ.ក. តំណាងរាជរដ្ឋាភិបាល, ក្រុមហ៊ុន RMA Cambodia និង ក្រុមហ៊ុន Minebea Cambodia តំណាងផ្នែកឯកជន និងមានសមាជិកមកពីក្រុមហ៊ុនឯកជន, សមាគមធុរកិច្ច, អ្នកអភិវឌ្ឍតំបន់សេដ្ឋកិច្ចពិសេស, និងវិទ្យាស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (TVET)។
ក្រុមប្រឹក្សា បានឯកភាពឲ្យមានកិច្ចប្រជុំក្រុមប្រឹក្សារៀងរាល់៦ខែម្តង ដើម្បីត្រួតពិនិត្យនិងវាយតម្លៃលើវឌ្ឍនភាពនៃការអនុវត្តនូវវិធានការដែលបានដាក់ចេញ និងបញ្ហាប្រឈមនានាដែលអាចជួបប្រទះ ក្នុងអំឡុងពេលអនុវត្ត។
លោក សុខ ចិន្តាសោភា ប្រធានអង្គប្រជុំ ក៏បានថ្លែងអំណរគុណដល់ លោក លោកស្រីតំណាងក្រសួង ស្ថាប័នពាក់ព័ន្ធ និងតំណាងវិស័យឯកជន ចំពោះការចូលរួមពិភាក្សាយ៉ាងសកម្ម និងផ្តល់ធាតុចូលបន្ថែម ដើម្បីធ្វើឲ្យតួនាទី និងភារកិច្ចរបស់ក្រុមប្រឹក្សាផ្តល់យោបល់ កាន់តែមានលក្ខណៈគ្រប់ជ្រុងជ្រោយ និងអាចដាក់ចេញនូវយុទ្ធសាស្រ្តបន្ថែម ក្នុងការជំរុញឲ្យការអនុវត្តវិធានការ ដែលមានចែងក្នុងសេចក្តីព្រាង ផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកនៅកម្ពុជា អនុវត្តទទួលបានជោគជ័យដូចការរំពឹងទុក៕
