(ភ្នំពេញ)៖ លោក អៀង សុធារ៉ា ប្រធានសមាគមពាណិជ្ជកម្ម និងវិនិយោគកម្ពុជា-ជប៉ុន និងជាស្ថាបនិកគម្រោងអារ៉ាខាវ៉ា ក្នុងនាមអ្នកបទពិសោធន៍ក្នុងការរកស៊ី បានជំរុញឲ្យសហគ្រិនវ័យក្មេងរបស់កម្ពុជា ត្រូវរៀនចេះសន្សំទុន និងប្រើទុនវិនិយោគ តាមស្ថានភាពជាក់ស្ដែង ដោយការត្រៀមទុកជាមុន ព្រោះថា កូវីដមិនមែនជារឿងទី១ ឬរឿងចុងក្រោយទេ ថ្ងៃមុខអាចនឹងមានបញ្ហាធំជាងនេះទៀត។
លោក អៀង សុធារ៉ា ថ្លែងឲ្យដឹងថា កូវីដបានធ្វើតេស្តអ្នកទាំងអស់គ្នា ទាំងសុខភាពផ្លូវកាយ និងសុខភាពផ្លូវចិត្ត ហើយបើអ្នកទាំងអស់គ្នា ចង់មានសុខភាពល្អទាំងសុខភាពផ្លូវកាយ និងផ្លូវចិត្ត នោះជារឿងមួយដ៏ធំនៅពីក្រោយដូចជា ចំណីអាហារ និងការធ្វើសមាធិជាដើម។ មួយវិញទៀតកូវីដ ក៏ធ្វើតេស្តលើសមត្ថភាពលើសហគ្រិនវ័យក្មេងដែរថា តើសហគ្រិនវ័យក្មេងទាំងអស់ មានសមត្ថភាពជាបុគ្គលដល់កម្រិតណា និងសមត្ថភាពជាស្ថាប័នកម្រិតណាផងដែរ។
លោកឲ្យដឹងបន្តថា សម្រាប់អ្នកចង់ក្លាយជាសហគ្រិនវ័យក្មេង ត្រូវមានគុណធម៌ នូវធាតុសំខាន់ចំនួន៣ក្នុងខ្លួន គឺ សច្ចៈ ខន្តី និងកាត្តញូ ទាំងអស់នេះ ជាមេរៀនសម្រាប់ SMEs ឬអ្នកទើបនឹងចេញរកស៊ីត្រូវយល់ដឹង។
លោកឲ្យដឹងបន្ថែមថា កន្លងមកធ្លាប់មានអ្នករកស៊ីត្រូវការកម្ចី ហើយបានទៅរកកម្ចីនៅតាមធនាគារ ឬអ្នកស្គាល់គ្នា ប៉ុន្ដែមិនទទួលបានកម្ចីនោះទេ ប៉ុន្ដែសម្រាប់អ្នករកស៊ីខ្លះទៀត មិនបានទៅរកកម្ចីផង តែបែរជាទទួលបានកម្ចីពីធនាគារទៅវិញ ទាំងនេះគឺពាក់ព័ន្ធជាមួយនឹងកេរ្តិ៍ឈ្មោះ ដែលចំណុចនេះទាមទារឲ្យ SMEs ទាំងអស់ប្រយ័ត្ននៅពេលអនាគត។
លោកបញ្ជាក់ថា «ការសន្សំលុយក៏ជាចំណុចសំខាន់ ដែលតាមការទូន្មានរបស់ព្រះពុទ្ធ លោកក៏បានទូន្មានថា នៅពេលដែលអ្នកទាំងអស់គ្នាអាចរកស៊ីបានចំណូលមក គឺអ្នកទាំងអស់គ្នា អាចចាយវាយ២៥ភាគរយ និងយកទុកសន្សំ២៥ភាគរយ ឯចំណែក៥០ភាគរយទៀតយកទៅវិនិយោគ។ ប៉ុន្ដែមិនមែនប្រាកដ ត្រូវតែវិនិយោគ៥០ភាគរយរហូតទេ យើងត្រូវមើលពីស្ថានភាពជាក់ស្ដែង នៅពេលថាស្ថានភាពល្អ យើងអាចដំឡើងចំនួនវិនិយោគឲ្យច្រើនបន្តិចទៅ ហើយបើស្ថានភាពមិនល្អត្រូវរង់ចាំឱកាស៥ឆ្នាំ ឬ១០ឆ្នាំទៀត ដូច្នេះយើងបង្វិលចំណែកដែលមិនបានវិនិយោគនោះ មកកន្លែងសន្សំរបស់យើងវិញមក»។
លោកបន្ថែមថា សម្រាប់ SMEs ឬអ្នកទើបនឹងចេញរកស៊ីទាំងអស់ កុំបាក់ស្បាតរឿងកូវីដនេះ ព្រោះថា កូវីដមិនមែនជារឿងទី១ ឬរឿងចុងក្រោយទេ ថ្ងៃមុខអាចនឹងមានបញ្ហាធំជាងនេះទៀត។ លោកថា ខ្លួនបានឆ្លងកាត់កាលពីឆ្នាំ១៩៩៧ និងឆ្នាំ២០០៧ គឺសុទ្ធសឹងតែជាឆ្នាំដែលយ៉ាប់ ដូច្នេះទាំងលោក និងអ្នកដែលធ្លាប់ឆ្លងកាត់ស្ថានភាពទាំងពីរលើកនោះមក គឺបានដឹងច្បាស់ហើយ។
លោកលើកឡើងថា ប្រសិនបើបងប្អូនក្មួយៗ នៅតែគិតថាបញ្ហាកូវីដ១៩ ធ្ងន់ធ្ងរ និងជារឿងចុងក្រោយនោះ គឺវាមិនពិតនោះទេ ព្រោះថា ទៅថ្ងៃមុខទៀតអាចនឹងជួបបញ្ហាធ្ងន់ជាងនេះទៀត ដូច្នេះប្រសិនបើអាចត្រៀមទុកជាមុនបាន គឺត្រូវត្រៀមជាមុនដូចជាការមិនប្រមាទជាដើម៕
