(អាមេរិក)៖ ប៉ូលិសអាមេរិកបានឱ្យដឹងថាចំនួនអ្នកស្លាប់នៅក្នុងការបាញ់ប្រហារ នៅឯទីក្រុងឡាស វេហ្គាស (Las Vegas) កាលពីយប់ថ្ងៃអាទិត្យ បានកើនដល់ ៥៨នាក់ និង៥១៥នាក់ ផ្សេងទៀតរងរបួស។​ រីឯក្រុមសកម្មប្រយុទ្ធ ISIS បានចេញមុខទទួលខុសត្រូវថា ក្រុមខ្លួនគឺជាអ្នកនៅពីក្រោយការបាញ់ប្រហារ ដ៏អាក្រក់ចុងក្រោយបំផុតនេះនៅក្នុងប្រវត្តិសាស្ត្រអាមេរិក។ នេះបើតាមការចេញផ្សាយដោយសារព័ត៌មាន BBC នៅថ្ងៃទី០២ ខែតុលា ឆ្នាំ២០១៧។

ក៏ប៉ុន្តែភ្លាមៗ អាជ្ញាធរអាមេរិកមិនទាន់ទទួលស្គាល់ការអះអាងនេះនៅឡើយទេ ខណៈលោក ដូណាល់ ត្រាំ បានចាត់ទុកការបាញ់ប្រហារនេះជាសកម្មភាពរបស់ បិសាចសុទ្ធសាធ ហើយថា លោកនឹងបំពេញទស្សនកិច្ចទៅកាន់ទីក្រុង​ឡាស វេហ្គាស នៅថ្ងៃពុធ។ យោងតាមសារព័ត៌មាននៅក្នុងស្រុក ការបាញ់ប្រហារដ៏សាហាវ ព្រៃផ្សៃនេះបានកើត ឡើងនៅអំឡុងការប្រគុំតន្ត្រី ដ៏ធំមួយក្នុងទីក្រុង ឡាស វេហ្គាស (Las Vegas) នៃរដ្ឋណេវ៉ាដា (Nevada) ភាគខាងលិចសហរដ្ឋអាមេរិក កាលពីថ្ងៃអាទិត្យ (ម៉ោងនៅសហរដ្ឋអាមេរិក) រីឯប៉ូលិសអាមេរិកក៏បានអះអាង ដែរថាជនសង្ស័យម្នាក់ ឈ្មោះ Stephen Paddock អាយុ៦៤ឆ្នាំ ត្រូវបានបាញ់សម្លាប់ បន្ទាប់ពីរូបគេបើកការបាញ់ប្រហារយ៉ាងកម្រោលទៅលើក្រុមមនុស្សយ៉ាងច្រើនកុះករ ដែលបាន នាំគ្នាទៅចូលរួមក្នុង ពិធីបុណ្យប្រគុំតន្រ្តីដ៏ធំមួយ ស្ថិតនៅក្បែរសណ្ឋាគារ-កាស៊ីណូ ម៉ាន់ដាឡាយ បេយ (Mandalay Bay)។

គួរបញ្ជាក់ថា ខណៈពេលនេះកម្លាំងប៉ូលិសអាមេរិក កំពុងធ្វើការស៊ើបអង្កេត ដើម្បីស្វែងរកមូលហេតុ នៅពីក្រោយហេតុការណ៍បាញ់ប្រហារហ្វូងមនុស្សម្នាដ៏សាហាវនេះ ដែលបានកើត ឡើងចំយប់ថ្ងៃចុងក្រោយ នៃពិធីបុណ្យប្រគុំតន្រ្តីមានឈ្មោះថា Route 91 Harvest ដែលមានរយៈពេលសរុប ០៣ថ្ងៃ។ ព្រមពេលជាមួយគ្នាអ្នកដែលបានទទួលរងរបួស ទាំងប៉ុន្មានត្រូវបាន បញ្ជូនទៅកាន់មន្ទីរពេទ្យ ដើម្បីជួយសង្រ្គោះជីវិត៕