(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅព្រឹកថ្ងៃទី៣០ ខែសីហា ឆ្នាំ២០១៧នេះ អញ្ជើញចុះទៅជួបសំណេះសំណាលដោយផ្ទាល់ ជាមួយកម្មករ កម្មការិនីជាង ១ម៉ឺននាក់ នៅសួនឧស្សាហកម្មវឌ្ឍនៈទី២ ស្ថិតតាមបណ្តោយផ្លូវជាតិលេខ៣ ក្នុងភូមិតាំងរនាម សង្កាត់ប្រទះឡាង ខណ្ឌដង្កោ។
ជំនួបនេះគឺជាលើកទី៤ហើយ នៅក្នុងយុទ្ធនាការជួបសំណេះសំណាលជាមួយកម្មករ កម្មការិនី ជាបន្តបន្ទាប់ ដែលបានដាក់ចេញកាលពីថ្ងៃទី២០ ខែសីហា កន្លងទៅ។ សម្តេចតេជោ បានកំណត់យកថ្ងៃពុធ ដើម្បីជួបសំណេះសំណាលជាមួយ កម្មករ កម្មការិនីទៅតាមបណ្តារោងចក្រ និងកំណត់យកថ្ងៃអាទិត្យ ដើម្បីជួបសំណេះសំណាលជាមួយនឹងកម្មករ នៅមជ្ឈមណ្ឌលពិព័រណ៍ និងសន្និបាតកោះពេជ្រ។
ក្នុងកិច្ចសំណេះសំណាលទាំងនោះ សម្តេចតេជោ ហ៊ុន សែន បានលើកបង្ហាញជាច្រើនពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការទាញអ្នកវិនិយោគមកបង្កើតរោងចក្រនានា នៅកម្ពុជាបង្កើនការងារជូនកូនចៅប្រជាពលរដ្ឋខ្មែរ។
សម្តេចតេជោ ហ៊ុន សែន ក៏បានបង្ហាញពីកិច្ចខិតខំ និងការយកចិត្តទុកដាក់ជាច្រើនទៀត ដើម្បីជំរុញដល់ការដំឡើងប្រាក់ខែជូនដល់កម្មករ និងការងារមួយចំនួនទៀតក្នុងការលើកកម្ពស់ជីវភាពរបស់កម្មករ និយោជិត ដូចជាការតបណ្តាញអគ្គិសនី និងបណ្តាញទឹកដល់បន្ទប់ស្នាក់នៅរបស់កម្មករកាត់បន្ថយការចំណាយ។
សម្តេចតេជោ ហ៊ុន សែន ក៏បានលើកបង្ហាញផងដែរពីបំណងទុច្ចរិតរបស់គណបក្សប្រឆាំង ក៏ដូចជាអតីតមេបក្សសង្រ្គោះជាតិ គឺលោក សម រង្ស៊ី ដែលតែងតែធ្វើសកម្មភាពញុះញង់ឲ្យបរទេសមិនផ្តល់ជំនួយ មិនមកវិនិយោគ និងទិញទំនិញពីកម្ពុជា ដែលសម្រេចហៅថាជានយោបាយ «៣កុំ» របស់បក្សប្រឆាំងនោះ។
លោក អ៉ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា នៅកម្ពុជានាពេលបច្ចុប្បន្នមានរោងចក្រ សហគ្រាសលើវិស័យកាត់ដេរសម្លៀកបំពាក់ និងស្បែកជើង សរុប១,១០៧ និងមានកម្មករ និយោជិត ក្នុងវិស័យកាត់ដេរសម្លៀកបំពាក់ និងស្បែកជើងជាង ៧៤ម៉ឺននាក់។ តាមរយៈវិស័យនេះ ផ្តល់ចំណូលប្រមាណជា ២ពាន់លានដុល្លារអាមេរិក ហើយផ្តល់ការងារជូនប្រជាពលរដ្ឋដោយប្រយោលជាង ៣លាននាក់ផ្សេងទៀត។
ដើម្បីចូលរួមចំណែកលើកកម្ពស់ជីវភាពរបស់កម្មករ និយោជិតឲ្យកាន់តែប្រសើរសម្តេចតេជោ ហ៊ុន សែន បានសម្រេចឲ្យកម្មករ និយោជិត មកពីគ្រប់វិស័យជិះរថយន្តក្រុងរបស់សាលារាជធានីភ្នំពេញ ដោយឥតគិតថ្លៃរយៈពេល ២ឆ្នាំ ចាប់ពីថ្ងៃទី២០ ខែសីហា ២០១៧ ដល់ ២០ សីហា ២០១៩។
ចាប់ពីខែមករា ឆ្នាំ២០១៨ សម្តេចតេជោ ហ៊ុន សែន បានសម្រេចឲ្យថៅកែរោងចក្រ សហគ្រាស ដែលបានចូលជាសមាជិកបេឡាជាតិរបបសន្តិសុខសង្គម ត្រូវទទួលរ៉ាប់រងរាល់សេវាគាំពារសុខភាពរបស់កម្មករ និយោជិត។ ការសម្រេចថ្មីនេះ ធ្វើឲ្យកម្មករ និយោជិតចំណេញប្រាក់ប្រមាណ ៨,០០០រៀល ទៅ១៣,០០០រៀលក្នុងមួយឆ្នាំ។
ចាប់ពីឆ្នាំ២០១៩ សម្តេចតេជោ ហ៊ុន សែន ក៏បានប្រកាសឲ្យកម្មករ និយោជិត មានប្រាក់សោធននិវត្តន៍ដូចមន្រ្តី រាជការផងដែរ។ ប្រាក់នេះ សម្រាប់ជួយដោះស្រាយជីវភាពកម្មករ និយោជិត នៅពេលពួកគេចាស់បម្រើការងារលែងកើត។
សម្តេចតេជោ ហ៊ុន សែន ក៏បានប្រកាសផងដែរថា កម្មករ និយោជិត មកពីគ្រប់វិស័យទាំងអស់អាចចូលពិនិត្យ និងព្យាបាលជំងឺនៅក្នុងមន្ទីរពេទ្យរដ្ឋដោយឥតគិតថ្លៃ។ តាមរយៈកញ្ចប់អត្ថប្រយោជន៍ថ្មីជាច្រើននេះ ដែលសម្តេចផ្តល់ជូនកម្មករ និយោជិតនេះ គេរំពឹងថា នឹងជួយឲ្យជីវភាព និងការរស់នៅរបស់កម្មករ និយោជិត កាន់តែល្អប្រសើរ។
សម្តេចតេជោ ហ៊ុន សែន តែងតែបានអំពាវនាវដល់ម្ចាសផ្ទះជួលទាំងអស់ កុំឲ្យដំឡើងថ្លៃផ្ទះឈ្នួលរបស់កម្មករ និយោជិត៕
