(បន្ទាយមានជ័យ)៖ នាព្រឹកថ្ងៃ១១ ខែសីហា ឆ្នាំ២០១៧នេះ លោកលី សារី ប្រធានសាខាកាកបាទក្រហមខេត្តបន្ទាយមានជ័យ និងមន្ត្រីសាខាជាច្រើននាក់ បានចូលរួមចែកអំណោយមនុស្សធម៌កាកបាទក្រហមកម្ពុជា សាខាខេត្តបន្ទាយមានជ័យ ដល់ប្រជាពលរដ្ឋដែល រងគ្រោះដោយសារខ្យល់កន្ត្រាក់ចំនួន១០៨គ្រួសារ នៅផ្សារអូរស្ងួត ភូមិអូរស្ងួតឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
លោក លី សារី បានថ្លែងថា ដោយមានការយកចិត្តទុកដាក់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងពីរ តែងតែបានយកចិត្តទុកដាក់ គិតគូជានិច្ចនូវទុក្ខលំបាក់របស់ប្រជាជន នៅគ្រប់ទិសទី។ ទីណាដែលបងប្អូនជួបនូវការលំបាក រងគ្រោះពីទឹកជំនន់ ខ្យល់កន្ត្រាក់ផ្សេងៗ ទីនោះសម្តេចតែងបានផ្តល់អំណោយមកជួយសង្គ្រោះដល់បងប្អូនគ្រប់ពេលវេលា ដោយមិនប្រកាន់និន្នាការនយោបាយ ពណ៌សប្បុរ ឬសាសនានោះឡើយសំរាប់ជួយដល់បងប្អូនប្រជាពលរដ្ឋដែលបានរងគ្រោះពីគ្រោះមហន្តរាយទឹកជំនន់។
លោក លី សារី បានបន្តថា សូមបងប្អូនប្រជាពលរដ្ឋទាំងអស់ មេត្តាធ្វើការប្រុងប្រយ័ត្នខ្ពស់បំផុតក្នុងការថែរក្សាសុខភាព ហើយកត្តាដែលសំខាន់នោះ គឺការរស់នៅត្រូវប្រកាន់យកនៅចំនុចបីល្អគឺរស់នៅស្អាត ផឹកស្អាត ហូបស្អាត និងឆ្លើយទេចំពោះគ្រឿងញៀន ជាពិសេគោរពច្បាប់ចរាចរណ៍ ឲ្យបានខ្ចប់ខ្ចួន ។
ប្រជាពលរដ្ឋដែលរងគ្រោះដោយសារខ្យល់កន្ត្រាក់ចំនួន១០៨ គ្រួសារទទួលបានអង្ក៣០គីឡូក្រាម, ត្រីខ១០កំប៉ុង, ប្រេងឆា១ដប, ទឹកត្រី៣ដប, ទឹកស៊ីអ៊ីវ៣ដប, សាប៊ូម្សៅ១គីឡូក្រាម, មី១កេស, ដោយឡែកប្រជាពលរដ្ឋរងការខូចខាត់ខ្លាំងចំនួន១៨បន្ថែមកៅស៊ូតង់ប្លាស្ទិច១ផ្ទាំង និងសារុង១៕
