(ប៉ៃលិន)៖ អ្នកនាំពាក្យតំណាងអយ្យការអមសាលាដំបូងខេត្តប៉ៃលិន នៅរសៀលថ្ងៃទី២៩ ខែកក្កដា ឆ្នាំ២០១៧នេះ បានចេញសេចក្ដីបំភ្លឺមួយភ្លាមៗ ដោយបដិសេធ ចំពោះការផ្សព្វផ្សាយថា មានករណីចាប់ក្មេងនៅស្រុកសាលាក្រៅ។
តុលាការអះអាងថា ក្រោយពេលស្រាវជ្រាវ មិនមានករណីនោះកើតឡើងនោះទេ ដោយគ្រាន់តែជាពាក្យចចាមអារាម និងភាន់ច្រឡំតែប៉ុណ្ណោះ។
អ្នកនាំពាក្យតំណាងអយ្យការអមសាលាដំបូងខេត្តប៉ៃលិន បំភ្លឺយ៉ាងដូច្នេះថា «កាលពីវេលាម៉ោងប្រមាណ ០៩៖០០នាទី ថ្ងៃទី២៩ ខែកក្កដា ឆ្នាំ២០១៧ មានព័ត៌មានថា មានករណីចាប់កូនក្មេង នៅចំណុចសាលារៀនអនុវិទ្យាល័យផ្សារព្រំ ស្ថិតក្នុងភូមិ ផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយក្មេងសង្ស័យរងគ្រោះឈ្មោះ អ៊ុយ ស្រីលីវ ភេទស្រី អាយុ០៦ឆ្នាំ មុខរបរសិស្ស មានឪពុកឈ្មោះ ទ្រី គឹមអ៊ុយ អាយុ៥៤ឆ្នាំ និងម្តាយឈ្មោះ ទ្រី យឿន អាយុ៤០ឆ្នាំ មានទីលំនៅភូមិផ្សារព្រុំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ នគរបាលប៉ុស្តិ៍រដ្ឋបាលឃុំស្ទឹងកាច់ និងអធិការដ្ឋាន នគរបាលស្រុកសាលាក្រៅ បានសហការជាមួយកម្លាំងជំនាញសន្តិសុខ និងជំនាញប្រឆាំងភេរវៈកម្ម នៃស្នងការដ្ឋាននគរបាលខេត្តប៉ៃលិន បានធ្វើការស្រាវជ្រាវ និងឲ្យដឹងថា ក្មេងស្រីខាងលើបានចេញពីសាលារួចដើរតាមផ្លូវត្រលប់មកផ្ទះវិញ ពេលនោះមានបុរសមិនស្គាល់មុខម្នាក់ ពាក់អាវពណ៌ខ្មៅ ខោស បានដើរតាមពីខាងក្រោយ ក្មេងនោះភ័យក៏បានរត់ចូលផ្ទះប្រជាពលរដ្ឋ នៅក្បែរនោះទើបមានការឆោឡោ ថាមានករណីចាប់ក្មេងតែម្តង ទើបបណ្តាលឲ្យផ្អើលដល់ប្រជាពរដ្ឋ ឪពុកម្តាយ និងម៉ូតូឌុបជាច្រើន តាមរកមុខមនុស្សដែលដើរពីក្រោយនោះ តែរកមិនឃើញនោះទេ។ សមត្ថកិច្ចជំនាញ បានឲ្យដឹងថា ហេតុការណ៍ចាប់ក្មេងខាងលើ ពុំមានកើតឡើងដូចពាក្យចចាមអារាមនោះទេ»។
ខាងក្រោមនេះជាសេចក្តីបំភ្លឺរបស់តុលាការ៖
