(បន្ទាយមានជ័យ)៖ ក្រុមហ៊ុន គូបូតា (ខេមបូឌា) Co., Ltd ជាក្រុមហ៊ុនបុត្រសម្ព័ន្ធរបស់ក្រុមហ៊ុន ស្យាម គូបូតា Corporation Co., Ltd បានប្រារព្ធពិធី «គូបូតាចែករំលែកក្តីសង្ឃឹម នៃអនាគតដល់កុមារឆ្នាំ 2017» សម្រាប់ឆ្នាំទី ៣ ក្រោមអធិបតីភាព លោកសួន បវរ អភិបាលខេត្តបន្ទាយមានជ័យ​ ។

លោនសួន បវរ បានថ្លែងថា ប្រទេសកម្ពុជាយើងបច្ចុប្បន្ននេះ យើងទាំងអស់គ្នាបានដឹងថា មានការរីកចម្រើន ជាបន្តបន្ទាប់ប្រកបដោយការដឹកនាំប្រទេសអភិវឌ្ឍន៍ គ្រប់វិស័យ ក្រោមការដឹកនាំដោយគតិយុទ្ធ គឺសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។ លោកក៏បានថ្លែងអំណរអគុណ ដល់ក្រុមហ៊ុន ស្យាម គូបូតា Corporation Co., Ltd បានផ្តល់ កាបូប និងសម្ភារៈសិក្សាដល់ប្អូនៗសិស្សានុសិស្សក្នុងខេត្ត។

លោក សំប៊ូន ជីនថាណាផុន អនុប្រធានក្រុមហ៊ុន ប្រធានផ្នែកលក់និងសេវាកម្ម របស់ក្រុមហ៊ុន ស្យាម គូបូតា Corporation Co., Ltd បានថ្លែងថា «គោលការណ៍អាជីវអាជីវកម្មរបស់ក្រុមហ៊ុន ស្យាម គូបូតា មិនត្រឹមតែបង្កើនទិន្នផលកសិកម្មចម្រុះ​ប៉ុណ្ណោះទេ ថែមទាំងសន្យាចូលរួមចំណែក ជួយដល់សង្គមជាបន្តបន្ទាប់ដូចជា គម្រោង គូបូតា ចែករំលែកក្តីសង្ឃឹមនៃអនាគតដល់កុមារ ដែលជាផ្នែកមួយនៃទំនួលខុសត្រូវក្នុង សង្គមរបស់សាជីវកម្មក្នុងវិស័យអប់រំ»។

គម្រោងនេះ សម្រេចបានជោគជ័យយ៉ាងធំធេង ក្នុងរយៈពេលពីរឆ្នាំកន្លងមកហើយ និងសម្ភារៈសិក្សាជាច្រើនបានផ្តល់ជូនដល់កុមារ ដែលអាចជួយផ្គត់ផ្គង់ ការសិក្សារបស់ពួកគាត់ ឲ្យកាន់តែប្រសើរឡើង ដូច្នេះ ទើបយើងបន្តរៀបចំគម្រោងនេះជា​ឆ្នាំទីបី ដែលប្រារព្ធធ្វើនៅថ្ងៃទី០៣កក្កដានេះ ដើម្បីផ្គត់ផ្គង់ដល់តំបន់ខ្វះខាតនៅក្នុងប្រទេសកម្ពុជា។ នៅឆ្នាំនេះ ក្រុមហ៊ុនបានបរិច្ចាគ កាបូបសិក្ស និងសម្ភារៈសិក្សាចំនួន ២០,០០០ ឈុត ដោយបែងចែក ៥,០០០ ឈុត ​សម្រាប់ខេត្តបន្ទាយមានជ័យតាមរយៈ លោកអភិបាលខេត្តបន្ទាយមានជ័យ និងចំនួន ១៥,០០០ ឈុតទៀត ប្រគល់ជូនភ្នាក់ងារចែកចាយស្របច្បាប់របស់ក្រុមហ៊ុនគូបូតា​ដើម្បីផ្តល់អំណោយនៅតាម​បណ្តាខេត្តជាច្រើនក្នុងខែកក្កដានេះដើម្បី ជាអំណោយសម្រាប់ឱកាសទិវាកុមារកម្ពុជា និងទិវាកុមារអន្តរជាតិ។

លោក សំ ប៊ូន បានបន្ថែមទៀតថា «ចាប់តាំងពីបានបង្កើតក្រុមហ៊ុន គូបូតា (ខេមបូឌា) បានលើកកម្ពស់ការអនុវត្តអាជីវកម្មជាចម្បង លើការធ្វើអាជីវកម្មស្របគ្នាជាមួយ នឹងការជួយ ដល់សង្គម ជាពិសេសនៅក្នុងវិស័យអប់រំ ក្នុងទម្រង់បង្កើត “មជ្ឈមណ្ឌលបណ្តុះបណ្តាលបច្ចេកវិទ្យា គូបូតា» ដោយសហការជាមួយវិទ្យាស្ថានបច្ចេកវិទ្យា នៅខេត្តបាត់ដំបង ដើម្បីអភិវឌ្ឍកម្មវិធីសិក្សា គ្រឿងយន្តកសិកម្មបន្ថែមលើគម្រោង ចែករំលែកក្តីសង្ឃឹមនៃអនាគតដល់កុមារ»។

គម្រោង ចែករំលែកក្តីសង្ឃឹមនៃអនាគតដល់កុមារនៅក្នុងឆ្នាំ២០១៧នេះ មានគោលដៅផ្តល់ អំណោយសរុបចំនួន ៤៥,០០០ ឈុត រួមមានកម្ពុជា មីយ៉ាន់ម៉ា និងឡាវ។ សម្រាប់ការផ្តល់ សម្ភារសិក្សាដល់កុមារដែលមានអាយុចូលរៀន ក្រុមហ៊ុនបានបរិច្ចាគតាមរយៈរដ្ឋាភិបាល និងភ្នាក់ងារចែកចាយស្របច្បាប់ នៅក្នុងប្រទេសនីមួយៗ ដើម្បីផ្តល់ការគាំទ្រដល់កុមារ និងយុវជនដែលមានការខ្វះខាត។

សូមបញ្ជាក់ថា សម្ភារៈសិក្សាចំនួន ២០,០០០ ឈុត ដែលសរុបជាថវិការជាង ៣លានបាត (៣៦០ លានរៀល) ដល់សិស្សានុសិស្សដែលខ្វះខាត និងកុមារក្រីក្រ នៅតាមតំបន់ដាច់ស្រយាលនៅទូទាំងប្រទេសកម្ពុជា ដើម្បីធ្វើឲ្យគុណភាពជីវិតកាន់តែប្រសើរ និងជួយអភិវឌ្ឍដល់សង្គម៕