(ឧត្តរមានជ័យ)៖​ កម្លាំងអធិការដ្ឋាននគរបាលស្រុកអន្លង់វែង ខេត្តឧត្តរមានជ័យ នា​ថ្ងៃទី២៥ ខែមិថុនា ឆ្នាំ២០១៧នេះ បានចុះបង្ក្រាបបនល្បែងអាប៉ោងមួយកន្លែង នៅភូមិរហាល ឃុំលំទង ស្រុកអន្លង់វែង ក្នុងនោះបានឃាត់ខ្លួនអ្នកលេងល្បែងចំនួន ៧នាក់ ដកហូតគ្រាប់អាប៉ោង ២គ្រាប់ កម្រាល១ផ្ទាំង ប្រាក់ចំនួន ៥៣០,០០០រៀល និងម៉ូតូ ៤គ្រឿង។

មន្រ្តីនគរបាល​ស្រុកអន្លង់វែង​ បាន​ឲ្យ​ដឹង​ថា ក្នុងពេលសាកសួរ ក្រុមអ្នកលេងអាប៉ោងទាំង៧នាក់នេះ​​ បាន​សារភាព​ថា ពួកគេពិតជា​បាន​លេង​អាប៉ោងប្រាកដ​មែន​។

មន្រ្តីដដែលបានបន្តថា ការបង្រ្កាបបនល្បែងខាងលើ គឺ​ធ្វើឡើងក្រោមការសហការ រវាងកម្លាំង​សមត្ថកិច្ច​ជំនាញ​ព្រហ្មទណ្ឌ និងកម្លាំង​នគរបាល​ប៉ុស្តិ៍លំទង។ បន្ទាប់ពីឃាត់ខ្លួន និងសាកសួររួច កម្លាំង​ជំនាញបាន​កសាង​សំណុំរឿង​តាម​នីតិវិធី​ច្បាប់ ដើម្បីបញ្ជូនពួកគេទៅតុលាការខេត្តឧត្តរមានជ័យ ចាត់ការបន្ត​៕