(ភ្នំពេញ)៖  នេះជាស្នាដៃទី២របស់ផលិតកម្ម «Clip Media» ធ្វើការថតរឿងថ្មីមួយទៀត ដែលមានចំណងជើងថា «ក្មេងទី៦» ដែលនឹងចំណាយដើមទុន ជិត១០ម៉ឺនដុល្លារ ប្រហាក់ប្រហែលនឹងរឿងទី១ មានចំណងជើងថា «ជួយអូនផង!» បន្ទាប់ពីរឿងនេះ​ទទួលបានជោគជ័យ និងមានអ្នកគាំទ្រយ៉ាងច្រើន។ ទាំងនេះជាកម្លាំងលើកទឹកចិត្តដល់ម្ចាស់ផលិតកម្ម លោក ពីជិត សិរីរិទ្ធ ក្នុងបន្តបង្កើតជាទស្សនិយភាព ដល់អ្នកគាំទ្របន្តទៀត

ពិធីក្រុងពាលីក្នុងរឿង «ក្មេងទី៦» នាព្រឹកថ្ងៃទី ១៨ ខែមិថុនា ឆ្នាំ២០១៧នេះ​ ស្ថិតនៅផ្លូវ៥៤២ ផ្ទះលេខ១៨ ដែលជាទីស្នាក់ការផលិតកម្ម «Clip Media» ដែលមានចូលរួមពីតារាសម្តែង សុទ្ធសឹងតែជាតារាល្បីល្បាញ ក្នុងស្រទាប់យុវវ័យ រួមមានកញ្ញា សុខ សោម៉ាវត្តី និង លោក មុំ សុទ្ធារ៉ា ដែលអ្នកទាំងពីរជាតួឯ ក្នុងរឿងនេះ។

លោក ពីជិត សិរីរិទ្ធ ម្ចាស់ផលិតកម្ម «Clip Media» បានថ្លែងថា «បន្ទាប់ពីទទួលអាជ្ញាបណ្ណ​ពីខាងក្រសួង នាសប្តាហ៍ក្រោយ យើងនឹងរៀបចំធ្វើការថត​ សាច់រឿងនេះតែម្តង ហើយរឿងនេះ​ប្រហែលជាមួយខែកន្លះ អាចនឹងថតចប់ ហើយបើសិនមិនខុសពីគម្រោងរបស់យើងទេ រឿងថ្មីនេះនឹងចាប់ចាក់បញ្ចាំងនៅចុងឆ្នាំ២០១៧ អំឡុងខែតុលា ឬវិច្ឆិកានេះ»។

លោកបន្តថា ទីកន្លែងដែលថតរឿង «ក្មេងទី៦»នេះ មិនខុសពីរឿងចាស់ទេ គឺមាននៅភ្នំពេញ និងនៅបាសិទ្ធ​ក្នុងទឹកដីខេត្តកំពង់ស្ពឺ តែផ្តោតសំខាន់ គឺនៅភ្នំពេញច្រើនជាង។ សម្រាប់ក្នុងដើមទុន ក្នុងការថតរឿងបែប «ភ័យរន្ទត់» ដែលជាវិញ្ញាណខ្មោច ដែលបានស្លាប់ទៅនេះ គឺចំណាយទឹកប្រាក់ប្រហាក់ប្រហែលនឹងរឿងចាស់ដែរ គឺខ្ទង់១០ម៉ឺនដុល្លារ។

សូមរំឭកថា ខ្សែភាពយន្តខ្នាតធំរឿង «ជួយអូនផង!» បានដាក់បញ្ចាំង កាលពីខែមីនា ឆ្នាំ២០១៧ កន្លងទៅនេះ មានការគាំទ្រយ៉ាងច្រើន ពីសំណាក់មហាជន ហើយ ទោះបីជាប្រាក់ចំណេញតិចក្តី ក៏ម្ចាស់ផលិតរូបនេះ នៅតែបន្តស្វែងរកអ្វីដែលថ្មីជូនអ្នកទស្សនា ដើម្បីបន្តការគាំទ្រដល់ខ្សែភាពយន្តថ្មីៗទៀត ផងដែរ៕