(សៀមរាប)៖ យោងតាមតួលេខផ្លូវការ របស់គ្រឹះស្ថានអង្គរ ដែលជាគ្រឹះស្ថានរបស់រដ្ឋ គ្រប់គ្រងលើការលក់ប័ណ្ណចូលទស្សនារមណីយដ្ឋានអង្គរ ដែលអង្គភាព​ Fresh News ទើបទទួលបាននៅយប់ ថ្ងៃទី៣១ ខែឧសភា ឆ្នាំ២០១៧នេះ បានបញ្ជាក់ថា ក្នុងរយៈពេល៥ខែ ចាប់គិតពីខែមករា ដល់ខែឧសភា ឆ្នាំ២០១៧ ចំនួនភ្ញៀវទេសចរបានទិញប័ណ្ណ ចូលទស្សនារមណីដ្ឋានអង្គរ មានចំនួន១,០៩២,៣៧៧សន្លឹក កើនឡើង១២.៣០ភាគរយ បើធៀប​នឹងរយៈពេលដូចគ្នាក្នុងឆ្នាំ២០១៦។

ចំពោះចំណូលដែលប្រមូលបាន ពីការលក់ប័ណ្ណចូលទស្សនារមណីយដ្ឋានអង្គរ ក្នុងរយៈពេល៥ខែដំបូងឆ្នាំ២០១៧នេះ មានចំនួន ៤៥,៩១៣,៦០២ដុល្លារ កើនឡើង៦៤.១៣ភាគរយ។

យោងតាមតួលេខនេះ បញ្ជាក់ថា ភ្ញៀវទេសចរនៅតែសម្រុក មកទស្សនារមណីយដ្ឋានអង្គរកាន់តែច្រើនឡើង ខណៈចំណូលក៏ទទួលបានកាន់តែកើនឡើងផងដែរ។

ដោយឡែក បើគិតក្នុងរយៈពេលពេញ១ខែឧសភា ឆ្នាំ២០១៧ ចំណូលនៃការលក់ប័ណ្ណមានចំនួន ៦,៦៦១,០១២ដុល្លារ កើនឡើង៩១.៧៥ភាគរយ ដែលមានចំនួនភ្ញៀវទិញប័ណ្ណ សរុប១៤៧,០១១សន្លឹក កើនឡើង១៧.៤២ភាគរយ។

សូមជម្រាបថា ប័ណ្ណចូលទស្សនាតំបន់អង្គរត្រូវបានបែងចែកជា៣ប្រភេទ៖

* ប្រភេទប័ណ្ណចូលទស្សនា១ថ្ងៃ មានតម្លៃ ៣៧ដុល្លារ។
* ប្រភេទប័ណ្ណចូលទស្សនា៣ថ្ងៃ មានតម្លៃ ៦២ដុល្លារ និងមានសុពលភាព១០ថ្ងៃ
* ប្រភេទបណ្ណចូលទស្សនា៧ថ្ងៃ មានតម្លៃ ៧២ដុល្លារ និងមានសុពលភាព០១ខែ៕