(ប៉េកាំង)៖ បណ្តាថ្នាក់ដឹកនាំជាន់ខ្ពស់ចិននាថ្ងៃសុក្រនេះ បានជួបសំណេះសំណាលគ្នា ជាមួយប្រធានាធិបតីវៀតណាមលោក Tran Dai Quang និងបានធ្វើការប្តេជ្ញាយ៉ាងមុតមាំថា នឹងរឹងបន្តឹងចំណងមិត្តភាពដ៏ស្អិតរមួតប្រៀបដូចជាបងប្អូនរវាងប្រទេសទាំងពីរ ឲ្យកាន់តែប្រសើរឡើងជាងមុនថែមទៀត។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅយប់ថ្ងៃសុក្រ ទី១២ ខែឧសភា ឆ្នាំ២០១៧។
ក្រោយជំនួបដ៏វិជ្ជមានជាមួយប្រធានាធិបតីចិនលោក Xi Jinping ប្រធានាធិបតីវៀតណាមលោក Tran Dai Quang ក៏បានធ្វើការជជែកពិភាក្សា នៅក្នុងជំនួបដាច់ដោយឡែកមួយ ជាមួយនាយករដ្ឋមន្រ្តីលោក Li Keqiang និងមន្រ្តីជាន់ខ្ពស់រដ្ឋាភិបាលចិនមួយចំនួនទៀតផងដែរ។ នាឱកាសនោះលោក Li បានថ្លែងថាភាគីទាំងពីរ គួរតែធ្វើការពង្រឹងកិច្ចសហប្រតិបត្តិការ ដើម្បីលើកកម្ពស់សន្តិភាពនិងវិបុលភាព នៅតាមខ្សែបន្ទាត់ព្រំដែនចិន-វៀតណាម ក៏ដូចជាក្នុងតំបន់ទាំងមូល។
លើសពីនេះ លោក Zhang Dejiang ប្រធានគណៈកម្មាធិការអនិច្រ្តៃយ៍នៃសភាប្រជាជនចិន បានលើកឡើងថាទំនាក់ទំនងចិន-វៀតណាម បានបង្ហាញឲ្យឃើញពីសញ្ញាដ៏វិជ្ជមានជាច្រើន ដោយសារតែប្រទេសទាំងពីរបានប្តេជ្ញា ចំពោះចំណងមិត្តភាពរយៈពេលយូរ។ ម៉្យាងវិញទៀត នៅក្នុងជំនួបរវាងលោកទាំងពីរ លោក Quang ដែលបាននិងកំពុងស្ថិតក្នុងដំណើរបំពេញទស្សនកិច្ច នៅឯប្រទេសចិន បានថ្លែងថា ប្រទេសវៀតណាម ពិតជាមានឆន្ទៈក្នុងការពង្រឹងមិត្តភាពជ បងប្អូនដ៏ស្មោះស្ម័គ្រវៀតណាម-ចិន ដើម្បីធានាឲ្យបាននូវទំនាក់ទំនងទ្វេភាគី ដែលពោពេញដោយផាសុខភាពនិងស្ថិតស្ថេរគង់វង្សបានយូរអង្វែង។
ជាមួយគ្នានេះលោក Yu Zhengsheng ប្រធានគណៈកម្មាធិការជាតិនៃក្រុមប្រឹក្សា ពិគ្រោះយោបល់របស់ប្រជាជនចិន ក៏បាននិយាយដែរថា ចិននិងវៀតណាមគឺជាអ្នកជិតខាងដ៏ល្អ និងមានប្រព័ន្ធនយោបាយក៏ដូចជា កំពុងប្រឈមជាបញ្ហាលំបាកពាក់ព័ន្ធនឹងការអភិវឌ្ឍន៍ដូចគ្នា ព្រមទាំងមានទស្សនវិស័យ នៃកិច្ចសហប្រតិបត្តិការវិជ្ជមានជានិច្ច។ លើសពីនេះមន្រ្តីជាន់ខ្ពស់រដ្ឋាភិបាលចិនមួយរូបទៀតគឺលោក Liu Yunsha បានបន្ថែមថា ចិននិងវៀតណាម មានអនាគតរួមគ្នាតែមួយ ហើយប្រទេសទាំងពីរគួរតែជួយគ្នាទៅវិញទៅមក ដើម្បីឆ្លងកាត់មិនថាគ្រោះលំបាកក៏ដូចជាពេលវេលាសុខសប្បាយនោះឡើយ។
គួរបញ្ជាក់ថា ប្រធានាធិបតីវៀតណាមលោក Tran Dai Quang កំពុងស្ថិតក្នុងដំណើរបំពេញទស្សនកិច្ច នៅឯប្រទេសចិនចាប់ពីថ្ងៃទី១២ដល់ទី១៥ ខែឧសភានេះ ហើយនឹងចូលរួមក្នុងវេទិកាស្តីពីកិច្ចផ្តួចផ្តើមផ្លូវមួយនិងខ្សែក្រវ៉ាត់មួយ សម្រាប់កិច្ចសហប្រតិបត្តិការអន្តរជាតិ ដែលគ្រោងនឹងប្រព្រឹត្តទៅនាថ្ងៃទី១៤ដល់ទី១៥ ខាងមុខនេះ នៅក្នុងទីក្រុងប៉េកាំង៕
