(កណ្ដាល)៖ បុរសម្នាក់ ដែលគេស្គាល់ថា ជាបុគ្គលិកសណ្ឋាគារ Naga World ត្រូវបានរថយន្តដឹកទំនិញមួយគ្រឿងបុកស្លាប់ភ្លាមៗ នៅយប់រំលងអាធ្រាត្រ ឈានចូលថ្ងៃទី៣០ ខែមេសា ឆ្នាំ២០១៧នេះ នៅចន្លោះគីឡូម៉ែត្រលេខ១៩ និង២០ ជិតផ្សារគរគី មុខសាលាស្រុកកៀនស្វាយ។
លោក ព្រំ សំណាង អធិការរងនគរបាលស្រុកកៀនស្វាយ បានឲ្យដឹងថា ជនរងគ្រោះឈ្មោះ ឌុច ផានិត អាយុ២២ឆ្នាំ ជាបុគ្គលិកសណ្ឋាគារ និងកាស៊ីណូណាហ្គាវើល មានទីលំនៅភូមិស្ដៅកន្លែង ឃុំដីឥដ្ឋ ស្រុកកៀនស្វាយ។
លោកអធិការរងបន្តថា ជនរងគ្រោះជិះម៉ូតូម៉ាកហុងដា គប់ជ្រុង ពណ៌ខៀវចាស់ ពាក់ផ្លាកលេខ ភ្នំពេញ 1N-8298 ដោយធ្វើដំណើរពីលិចទៅកើត ពោលពីភ្នំពេញ ទៅកៀនស្វាយ ក្នុងបំណងទៅលំនៅដ្ឋាននៅភូមិស្ដៅ។ លុះមកដល់ចំណុចកើតហេតុ ត្រូវរថយន្ដប្រភេទដឹកទំនិញមួយគ្រឿង ម៉ាក់ HINO ពណ៌ស ពាក់ស្លាកភ្នំពេញ 3D-9292 បើកក្នុងទិសដៅបញ្ច្រាសគ្នា ហើយជ្រុលមកបុកម៉ូតូបណ្ដាលឲ្យជនរងគ្រោះ ស្លាប់នៅកន្លែងតែម្តង ហើយភ្លាមនោះអ្នកបើកបររថយន្តបង្ក បានរត់គេចខ្លួនស្រមោល។
បច្ចុប្បន្នវត្ថុតាងទាំង២ ត្រូវជំនាញយកទៅរក្សាទុកនៅអធិការដ្ឋាន នគរបាលស្រុកកៀនស្វាយ ដើម្បីដោះស្រាយតាមច្បាប់។ រីឯសពជនរងគ្រោះ ប្រគល់ជូនសាច់ញាតិ ធ្វើបុណ្យតាមប្រពៃណី៕
