(បារាំង)៖ ស្របពេលនៅថ្ងៃអាទិត្យសប្តាហ៍ក្រោយ ប្រជាជនបារាំងជាង៤៥លាននាក់ នឹងត្រូវទៅបោះឆ្នោតជ្រើសរើសប្រធានាធិបតីរបស់ខ្លួន ស្រាប់តែនៅថ្ងៃនេះស្ថាប័នអធិការកិច្ចរដ្ឋបាលបារាំង បានប្រកាសឲ្យដឹងថា មានប្រជាពលរដ្ឋបារាំងប្រមាណចំនួន៥០ម៉ឺននាក់ មានឈ្មោះពីរកន្លែងក្នុងបញ្ជីបោះឆ្នោត ពោលគឺបានទទួលបណ្ណបោះឆ្នោតពីរ នេះបើយោងតាមសារព័ត៌មានបារាំង ចេញផ្សាយថ្ងៃទី១៦ ខែមេសា ឆ្នាំ២០១៧នេះ។
មានសំណួរថាបណ្ណបោះឆ្នោត២នេះ តើគេអាចបោះឆ្នោតបានពីរដងឬ ? ក្នុងច្បាប់របស់បារាំង បានចែងច្បាស់ថា ប្រជាជនបារាំងម្នាក់មានសិទ្ធិបោះឆ្នោតតែម្តងគត់! ជនណាល្មើសច្បាប់ ហ៊ានបោះឆ្នោតពីរដងនឹងត្រូវទទួលទោសជាប់ពន្ធនាគារ ៦ខែ និងពិន័យជាប្រាក់ជិត១៦០០០ដុល្លារអាមេរិក។
ជុំវិញបញ្ហាប្រជាជនមានឈ្មោះបោះឆ្នោតស្ទួននេះ និងស្របពេលការបោះឆ្នោតជុំទីមួយកាន់តែខិតមកដល់ គណបក្សនយោបាយបានព្រមានអំពីហានិភ័យប្រជាធិបតេយ្យ និងលទ្ធផលនៃការបោះឆ្នោត ទៅកាន់រដ្ឋមន្ត្រីក្រសួងមហាផ្ទៃ ស្នើឲ្យដោះស្រាយបញ្ហានេះឱ្យបានមុនថ្ងៃបោះឆ្នោតជុំទីមួយ ថ្ងៃទី២៣ ខែមេសា ឆ្នាំ២០១៧។
សារព័ត៌មានបារាំងជាច្រើន បានផ្សាយឱ្យដឹងថា ភាពមិនប្រក្រតីបែបនេះ ភាគច្រើនកើតឡើងនៅពេលពលរដ្ឋធ្វើការផ្លាស់ប្តូរលំនៅដ្ឋាន ពីឃុំសង្កាត់មួយទៅឃុំសង្កាត់មួយទៀត ហើយទៅចុះឈ្មោះថ្មីក្នុងបញ្ជីបោះឆ្នោតកន្លែងរស់នៅថ្មី។ តាមធម្មតាឃុំសង្កាត់នីមួយៗ គ្មានមធ្យោបាយផ្ទៀងផ្ទាត់ទេ ! ត្រូវបញ្ជូនបញ្ជីឈ្មោះថ្មីទៅឱ្យ វិទ្យាស្ថានស្ថិតិ ធ្វើការផ្ទៀតផ្ទាត់ កែនិងលុបឈ្មោះស្ទួន។ ប៉ុន្តែពេលខ្លះមានបញ្ហាបានកើតឡើងនៅពេលផ្ទេរបញ្ជូនព័ត៌មាននោះ ទើបមានសល់ឈ្មោះស្ទួនយ៉ាងដូច្នេះ៕
