(ព្យុងយ៉ាង)៖ ប្រទេសកូរ៉េខាងជើងនៅថ្ងៃសៅរ៍នេះ បានលើកឡើងថាការវាយប្រហារមីស៊ីល របស់សហរដ្ឋអាមេរិក ទៅលើមូលដ្ឋានទ័ព​អា​កាស ស៊ីរីនាថ្ងៃសុក្រសប្តាហ៍នេះ គឺជាទង្វើឈ្លានពានមិនអាចលើកលែងឲ្យបានដាច់ខាត ដែលបានបង្ហាញថាការសម្រេចរបស់របបដឹកនាំ​ទីក្រុងព្យុងយ៉ាង ក្នុងការបន្តអភិវឌ្ឍន៍អាវុធនុយក្លេអ៊ែរជាជម្រើសដ៏ត្រឹមត្រូវបំផុត។ នេះបើតាមការចេញផ្សាយដោយសារព័ត៌មាន Channel News Asia នៅយប់ថ្ងៃសៅរ៍ ទី០៨ ខែមេសា ឆ្នាំ២០១៧។

ការឆ្លើយតបខាងលើ របស់ក្រសួងការបរទេសកូរ៉េខាងជើង ត្រូវបានពាំនាំបន្តដោយទីភ្នាក់ងារព័ត៌មាន KCNA ហើយវាគឺជាសេចក្តីថ្លែង​ការណ៍ លើកទីមួយ របស់រដ្ឋាភិបាលទីក្រុងព្យុងយ៉ាង បន្ទាប់ពីនាវាចម្បាំងអាមេរិក បានមីស៊ីលជិត៦០គ្រាប់ចេញពីសមុទ្រមេឌីទែរ៉ាណេ ទៅលើបន្ទាយ យោធាជើងអាកាសមួយកន្លែងរបស់រដ្ឋាភិបាលស៊ីរី ដែលមន្ទីបញ្ចកោណបានអះអាងថា មានជាប់ពាក់ព័ន្ធនៅក្នុងការវាយ​ប្រហារ​​ដោយ​អាវុធ​គីមី កាលពីដើមសប្តាហ៍នេះនៅភាគពា័ព្យប្រទេស​ក្នុងតំបន់មជ្ឈឹមបូព៌ានេះ។

ទីភ្នាក់ងារព័ត៌មាន KCNA បានលើកឡើងថា «ការវាយប្រហារមីស៊ីលអាមេរិក ប្រឆាំងនឹងប្រទេសស៊ីរី ស្តែងឲ្យឃើញពីទង្វើឈ្លានពាន​យ៉ាងជាក់ច្បាស់និងពុំអាចលើកលែងឲ្យបានមួយ រំលោភទៅលើដែនអធិបតេយ្យភាពរបស់ប្រជាជាតិដទៃ ហើយយើងថ្កោលទោសដាច់​ខាតចំពោះរឿងនេះ»។ ប្រព័ន្ធផ្សព្វផ្សាយរដ្ឋកូរ៉េខាងជើងបានបន្តថា «ធាតុពិតនៃទង្វើនេះបានបញ្ជាក់ថា ការសម្រេចចិត្តរបស់យើងក្នុងការ​ពង្រឹងអានុភាពយោធារបស់យើង ដើម្បីត្រៀមតទល់ជាមួយសត្រូវ គឺជាជម្រើសដ៏ត្រឹមត្រូវជាទីបំផុត»។

គួរបញ្ជាក់ថា ការវាយប្រហារមីស៊ីលចំនួន៥៩គ្រាប់របស់អាមេរិក ទៅលើប្រទេសស៊ីរី បានបណ្តាលឲ្យមនុស្សចំនួន១៤នាក់ស្លាប់ ដោយ​នៅ​ក្នុង​ចំណោមនោះមានជនស៊ីវិល០៩នាក់ បូករួមទាំងស្រ្តីនិងកុមារ៕