(ពោធិ៍សាត់)៖ កម្លាំងនគរបាលស្រុកភ្នំក្រវាញ បានឃាត់ខ្លួនជនសង្ស័យ៣នាក់ ជាឪពុកនិងកូន ក្រោយផ្ទុះហិង្សា ជាមួយជនរងគ្រោះ​ដែលជាអជីវករដូចគ្នា ព្រោះតែរឿងគំនុំផ្ទាល់ខ្លួន បណ្តាលឲ្យរងរបួសធ្ងន់ និងត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យបង្អែក ពោធិ៍សាត់។​

ហេតុការណ៍នេះ បានកើតឡើងនៅព្រឹកថ្ងៃទី១០ ខែកុម្ភៈ ឆ្នាំ២០១៧​នេះ នៅចំណុចផ្សារលាច ស្ថិតក្នុងភូមិពេជបាន ឃុំលាច ស្រុកភ្នំក្រវាញ ខេត្តពោធិ៍សាត់​។​

លោក វង សាវ៉េត អធិការនគរបាលស្រុក​ភ្នំក្រវាញ បានប្រាប់ភ្នាក់ងារ Fresh News ឲ្យដឹងថា ករណីហឹង្សាដោយចេតនាខាងលើនេះ បង្កដោយឈ្មោះ មាស សុខឃៀង អាយុ៥៣ឆ្នាំ ជាអាជីវករផ្សារលាច, ឈ្មោះ គាន ពេជ្រ អាយុ១៩ឆ្នាំ ត្រូវជាកូន និងឈ្មោះគាន ឆៃ អាយុ១៨ឆ្នាំ ត្រូវជាកូនដែរ ទាំង៣នាក់ឪពុកនិងកូន រស់នៅភូមិពេជបាន ឃុំលាច ស្រុកភ្នំក្រវាញ។ ជនរងគ្រោះ​ឈ្មោះ វ៉ាន់ គីម អាយុ២៣ឆ្នាំ ជាអាជីវករផ្សារលាច បច្ចុប្បន្នរស់នៅភូមិព្រៃខ្លុង ​ឃុំរកាត ស្រុកភ្នំក្រវាញ ខេត្តពោធិ៍សាត់​។​

លោកអធិការបន្តថា នៅពេលកើតហេតុខាងលើ ឈ្មោះ គីម ​វ៉ាន់ បានវាយប្រតាយប្រតប់គ្នាជាមួយ ឈ្មោះ មាស សុខឃៀង ភ្លាមនោះ មានឈ្មោះ ញឹក សុខុន ភេទស្រី ដែលជាអាជីវករដូចគ្នាបានមកឃាត់។ ពេលកំពុងឃាត់ ឈ្មោះ គាន ពេជ្រ ​និងឈ្មោះ គាន ឆៃ ដែលត្រូវជាកូនរបស់ឈ្មោះ មាស សុខឃៀង បានយកកាំបិត និងដែក ដេញកាប់ចាក់ ទៅលើឈ្មោះ គឹម វ៉ាន់ ចំកំភួនដៃស្តាំ បណ្តាលឲ្យរងរបួសធ្ងន់ ត្រូវបានឈ្មោះ តំ នាង បញ្ជូនទៅសង្គ្រោះបន្ទាន់ នៅមន្ទីរពេទ្យបង្អែកពោធិ៍សាត់។​

លោក វង សាវ៉េត បានបញ្ជាក់ថា មូលហេតុដែលនាំឲ្យកើតអំពើហិង្សានេះ ដោយសារតែរឿងគំនុំគុំគួន។ បច្ចុប្បន្នកម្លាំងនគរបាល កំពុងសួរនាំជនសង្ស័យទាំង៣នាក់ ដើម្បីកសាងសំណុំរឿងបញ្ជូនបន្តចាត់ការតាមនីតិវិធី៕