(បាងកក)៖ ការបោះឆ្នោតដើម្បីស្តារឡើងវិញនូវលទ្ធិប្រជាធិបតេយ្យ នៅក្នុងអំណាចយោធារបស់ថៃ នឹងធ្វើឡើងមួយឆ្នាំទៀត បើគិតពីពេលនេះតទៅ។ នេះបើតាមរដ្ឋាភិបាលថៃបានឲ្យដឹងនៅថ្ងៃពុធនេះ ហើយបានបញ្ជាក់ថា ការបោះឆ្នោតសាកលជាលើកដំបូងដែលត្រូវបានគេរំពឹងទុក ថានឹងធ្វើឡើងនៅក្នុងឆ្នាំនេះនោះ នឹងត្រូវពន្យារពេល។ នេះបើតាមសារព័ត៌មាន Channel News Asia ចុះផ្សាយនាយប់ថ្ងៃទី៨ ខែកុម្ភៈ ឆ្នាំ២០១៧នេះ។

​«មួយឆ្នាំគិតចាប់ពីថ្ងៃនេះតទៅ ការបោះឆ្នោតនឹងត្រូវធ្វើឡើង» នេះបើតាមសម្តីឧបនាយករដ្ឋមន្ត្រីថៃ លោក Wissanu Krea-ngam បានថ្លែងប្រាប់ក្រុមអ្នកសារព័ត៌មានយ៉ាងដូច្នេះ។
​
រដ្ឋាភិបាលយោធា ដែលបានឡើងកាន់អំណាច នៅក្នុងការធ្វើរដ្ឋប្រហារក្នុងឆ្នាំ២០១៤ បានលើកឡើងជាថ្មីម្តងទៀតថា ការបោះឆ្នោតសាកល គួរតែធ្វើឡើង នៅក្នុងឆ្នាំ២០១៧ ប៉ុន្តែក្រោយពីការសោយទីវង្គត របស់ព្រះអង្គ Bhumibol Adulyadej កាលពីថ្ងៃទី១៣ ខែតុលា បានធ្វើឲ្យមានការពន្យាពេល ដោយទុករយៈពេលមួយឆ្នាំ ធ្វើការកាន់ទុកចំពោះការសោយទីវង្គត របស់ព្រះអង្គ។
​
លោក Wissanu លើកឡើងថា ការកំណត់ពេលវេលានៃការបោះឆ្នោតរបស់រដ្ឋាភិបាលយោធា មិនទាន់បានកំណត់ច្បាស់នៅឡើយនោះទេ ខណៈរដ្ឋធម្មនុញ្ញថ្មី ដែលជាផ្នែកមួយយ៉ាងសំខាន់ នៃគម្រោងរបស់រដ្ឋាភិបាលយោធា ដើម្បីស្តាររបបប្រជាធិបតេយ្យ បាននឹងកំពុងធ្វើការកែសម្រួល។ រដ្ឋធម្មនុញ្ញដែលគាំទ្រដោយ យោធា ត្រូវបានអនុម័ត ក្នុងការធ្វើប្រជាមតិកាលពីឆ្នាំមុន៕