(សេអូល)៖ កូរ៉េខាងជើងបានចោទប្រកាន់ថា ការធ្វើសមយុទ្ធស្ទាក់ចាប់គ្រាប់មីស៊ីលផ្លោងរបស់សហរដ្ឋអាមេរិក ជប៉ុន និងកូរ៉េខាងត្បូងគឺមានចេតនាត្រៀមទុកវាយប្រហារមកលើរបបដឹកនាំទីក្រុងព្យុងយ៉ាង ហើយថាខ្លួននឹងចាត់វិធានការឆ្លើយតបចំពោះសកម្មភាពគំរាមកំហែងមួយនេះ។ នេះបើតាមសារព័ត៌មានរដ្ឋកូរ៉េខាងជើង Rodong Sinmun ដកស្រង់ដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃអង្គារ ទី០៧ ខែកុម្ភៈ ឆ្នាំ២០១៧។
ប្រតិកម្មរបស់ Rodong Sinmun ធ្វើឡើងបន្ទាប់ពីសម្ព័ន្ធមិត្ត ក្នុងតំបន់ទំាងបីបានដឹកនាំការធ្វើសមយុទ្ធយោធារួមគ្នា រយៈពេលបីថ្ងៃ កាលពីថ្ងៃទី២០ ខែមករា កន្លងទៅ ក្នុងគោលបំណងតាមដានការបាញ់សាកល្បងមីស៊ីលពីសំណាក់កូរ៉េខាងជើង។ Rodong Sinmun បានបញ្ជាក់ដូច្នេះថា «វាជាការមិនអាចប្រកែកបាន! ការធ្វើសមយុទ្ធយោធារវាងសហរដ្ឋអាមេរិក ជប៉ុន និងរដ្ឋាភិបាលអាយ៉ងកូរ៉េខាងត្បូង គឺជាមានចេតនាត្រៀមទុកវាយប្រហារមកលើប្រទេសរបស់យើង។ ជាងនេះទៅទៀតការធ្វើសមយុទ្ធយោធាបាញ់មីស៊ីលរបស់ពួកគេ ជាកំហុសយោធាមួយដ៏គ្រោះថ្នាក់ ដែលអាចនឹងបង្កឱ្យមានជម្លោះនៅក្នុងតំបន់ឧបទ្វីបកូរ៉េ»។
គួរបញ្ជាក់ថាបើតាម Rodong Sinmun របបដឹកនាំទីក្រុងព្យុងយ៉ាង នឹងចាត់វិធានការឆ្លើយតបជាបន្តបន្ទាប់ ដើម្បីការពារសន្តិភាពនៅក្នុងតំបន់ និងស្វ័យភាពព្រមទំាងភាពថ្លៃថ្នូររបស់កូរ៉េខាងជើងបើសិនជាសហរដ្ឋអាមេរិក មិនព្រមបញ្ឈប់ការធ្វើសមយុទ្ធយោធារបៀបនេះទេនោះ៕
