(ភ្នំពេញ)៖ បន្ទាប់ពីទទួលជួបពិភាក្សាការងារជាមួយប្រតិភូខេត្តហឺណាន ប្រទេសចិន នាទីស្ដីការក្រសួងទេសចរណ៍ រួចមក លោក ថោង ខុន រដ្ឋមន្ត្រីក្រសួងទេសចរណ៍ បានបន្តចូលរួមជាសហអធិបតីភាព ក្នុងពិធីផ្សព្វផ្សាយសក្តានុពលទេសចរណ៍ និងវិនិយោគលើវិស័យទេសចរណ៍រវាងកម្ពុជា និងខេត្តហឺណាន សំដៅស្រូបយកកំណើនទេសចរពីគ្នាទៅវិញទៅមក។
កម្មវិធីផ្សព្វផ្សាយនេះ ធ្វើឡើងនៅថ្ងៃទី២៩ ខែវិច្ឆិកា ឆ្នាំ២០១៦ ដោយមានការចូលរួមពី លោក Zhang Guangzhi អភិបាលរងខេត្តហឺណាន និងលោក Xiong Bo ឯកអគ្គរដ្ឋទូតចិនប្រចាំកម្ពុជា គណៈប្រតិភូខេត្តហឺណាន ថ្នាក់ដឹកនាំក្រសួងទេសចរណ៍ និងប្រតិបត្តិករទេសចរណ៍។
ក្នុងកិច្ចពិភាក្សា និងកម្មវិធីផ្សព្វផ្សាយនេះ លោករដ្ឋមន្រ្តីបានលើកឡើងពីគោលដៅសំខាន់ៗមួយចំនួន រួមមាន៖
ទី១.កិច្ចសហប្រតិបត្តិការលើការជំរុញការវិនិយោគចិន ខេត្តហឺណាន ក្នុងវិស័យទេសចរណ៍កម្ពុជា, ទី២.ជំរុញការហោះហើរត្រង់ពី ខេត្តហឺណានមកកម្ពុជា និងទី៣.ជំរុញការផ្សព្វផ្សាយពីសក្តានុពលទេសចរណ៍កម្ពុជា និងខេត្តហឺណាន ប្រទេសចិន។
ភាគីខេត្តហឺណាន ប្រទេសចិន បានគាំទ្រយ៉ាងពេញទំហឹង និងសន្យាជំរុញអ្នកវិនិយោគខេត្តហឺណាន ឲ្យមកបោះទុនវិនិយោគក្នុងវិស័យទេសចរណ៍នៅកម្ពុជា និងជំរុញការតភ្ជាប់ការហោះហើរត្រង់ ខេត្តហឺណាន-កម្ពុជា ផងដែរ។
លោករដ្ឋមន្រ្តី ថោង ខុន បានឲ្យដឹងថា «យោងតាមស្ថិតិពីក្រុមប្រឹក្សាអភិវឌ្ឍន៍កម្ពុជា (CDC) ទំហំវិនិយោគិនចិននៅកម្ពុជា ក្នុងឆ្នាំ២០១៥ មានចំនួន ៨៥៦.៥២លានដុល្លារ ឈរនៅលំដាប់ទី១ ក្នុងចំណោមវិនិយោគផ្ទាល់ពីបរទេសមកកម្ពុជា (FDI)»។
សូមជម្រាបថា រយៈពេល៩ខែ ដើមឆ្នាំ២០១៦ កម្ពុជាទទួលបានទេសចរអន្តរជាតិ ជាង៣.៥លាននាក់ កើនឡើង ៤.៨ភាគរយ ក្នុងនោះមានភ្ញៀវចិនចំនួន ៥៧៧,២៨៣នាក់ កើនឡើង ១២.៥ភាគរយ។ តាមការព្យាករណ៍ទុក ក្នុងឆ្នាំ២០១៦នេះ កម្ពុជានឹងទទួលទេសចរចិនមកទស្សនាប្រមាណ ៩០ម៉ឺននាក់៕
