(បាត់ដំបង)៖ កម្លាំងនគរបាលការិយាល័យ ប្រឆាំងគ្រឿងញៀនខេត្តបាត់ដំបង នៅព្រឹកថ្ងៃទី២៦ ខែវិច្ឆិកា ឆ្នាំ២០១៦នេះ បានបញ្ជូន ជនសង្ស័យម្នាក់ រូមជាមួយ​ថ្នាំញៀនយ៉ាម៉ា​១៥៥គ្រាប់ ទៅសាលាដំបូងខេត្ត បន្ទាប់ពីកម្លាំងនគរបាល ជំនាញស្រុកកំរៀង បានឃាត់ខ្លួន នៅរសៀលថ្ងៃទី២៣ ខែវិច្ឆិកា ឆ្នាំ២០១៦កន្លងទៅនេះ  នៅចំណុចក្រុមទី៦​ ភូមិអូរដាលើ ឃុំបឹងរាំង ស្រុកកំរៀង។

​លោក ស៊ាន សូណាល់ នាយការិយាល័យប្រឆាំងគ្រឿងញៀនខេត្ត បានឲ្យដឹងថា ​ជនសង្ស័យដែលកម្លាំងជំនាញឃាត់ខ្លួននេះ ឈ្មោះ ម៉ៅ ម៉ុល ​អាយុ៣១ឆ្នាំ ស្នាក់នៅបន្ទប់ជួលក្នុងភូមិអូរដាលើ ឃុំបឹងរាំង​ ស្រុកកំរៀង ក្នុងនោះដកហូតបានថ្នាំញៀនយ៉ាម៉ា ១៥៥គ្រាប់ ​ទម្ងន់ស្មើនិង១៤.៧៦ក្រាម និងសម្ភារៈមួយចំនួនទៀត។

បន្ទាប់ពីកម្លាំងអធិការស្រុកកំរៀង បានបញ្ជូនមកការិយាល័យជំនាញ នៃស្នងការដ្ឋាននគរបាលខេត្ត កម្លាំងការិយាល័យជំនាញខេត្ត បានកសាងសំណុំរឿងបន្ថែម បញ្ជូនខ្លួនជនសង្ស័យ និងវត្ថុតាងទៅតុលាការខេត្ត​ ដើម្បីចាត់ការបន្តតាមច្បាប់៕