(បន្ទាយមានជ័យ)៖ ផ្ទះចំនួន ១៥០ខ្នង ដែលសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា សាងសង់ជូនអតីតយុទ្ធជន និងយោ ធិនពិការស្ថិតនៅមជ្ឈមណ្ឌលអភិវឌ្ឍន៍យោធិនពិការ ៣១៧ភ្នំឆត្រ រួមនិងអគារសិក្សា ១ខ្នង ៦បន្ទប់ សាងសង់សម្រេចបាន ៨៥ភាគរយហើយ។
ដើម្បីធានាបានថាសំណង់ផ្ទះអំណោយរបស់សម្តេចតេជោ ហ៊ុន សែន ជូនអតីតយុទ្ធជន និងយោធិនពិការមានគុណភាពជាប់ល្អនោះ នៅព្រឹកថ្ងៃទី២១ ខែវិច្ឆិកា ឆ្នាំ២០១៦នេះ នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជន បានចុះពិនិត្យដោយផ្ទាល់លើសំណង់ផ្ទះទាំងអស់នេះ។
នាយឧត្តមសេនីយ៍ គន់ គីម បានប្រាប់ទៅក្រុមអ្នកសាងសង់ផ្ទះឲ្យគិតគូរទៅលើគុណភាពជាចម្បង កុំគិតតែពីបរិមាណ ពោលធ្វើយ៉ាង ណាឲ្យផ្ទះនេះមានភាពរឹងមាំសម្រាប់ការរស់នៅរបស់អតីតយុទ្ធជន និងយោធិនពិការប្រកបដោយផាសុខភាព។ នាយឧត្តមសេនីយ៍ គន់ គីម ក៏បានជំរុញឲ្យក្រុមជាងសាងសង់ឲ្យពន្លឿនការសាងសង់ធ្វើយ៉ាងណាឲ្យរាល់តាមផែនការគ្រោងទុក។
នាយឧត្តមសេនីយ៍ គន់ គីម បានថ្លែងថា ផ្ទះជាអំណោយរបស់សម្តេចតេជោ ហ៊ុន សែន បានក្លាយជាលំនៅឋានដ៏កក់ក្តៅសម្រាប់អតីត យុទ្ធជន និងយោធិនពិការ។ នាយឧត្តមសេនីយ៍ បានប្រាប់ទៅអតីតយុទ្ធជន និងយោធិនពិការថា ការសង់លំនៅឋាននេះ គឺបានបង្ហាញ ពីការយកចិត្តទុកដាក់របស់សម្តេចតេជោ ហ៊ុន សែន ចំពោះសុខអតីតយុទ្ធជន និងយោធិនពិការ ដែលសុទ្ធសឹងជាអ្នកមានគុណបំណាច់សម្រាប់ជាតិ។
តាមរយៈនាយឧត្តមសេនីយ៍ គន់ គីម អតីតយុទ្ធជន និងយោធិនពិការនៅមជ្ឈមណ្ឌលអភិវឌ្ឍន៍យោធិនពិការ ៣១៧ភ្នំឆត្រ បានគោរពថ្លែងអំណរគុណដល់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលជានិច្ចកាលតែងតែគិតគូរ និងយក ចិត្តទុកដាក់ទៅលើសុខទុក្ខ និងជីវភាពរបស់ពួកគាត់៕
