(ភ្នំពេញ)៖ ចៅក្រមសាលាដំបូង រាជធានីភ្នំពេញលោក ប៊ុន ធី នៅព្រឹកថ្ងៃទី១០ ខែវិច្ឆិកា ឆ្នាំ២០១៦នេះ បានបើកសវនាការជំនុំជម្រះ លើសំណុំរឿងជនជាតិវៀតណាម៤នាក់ ធ្វើការឆ្លងដែនចូលមក​កម្ពុជា ដោយគ្មានការអនុញ្ញាត និង​នេសាទដោយប្រើឧបករណ៍ខុសច្បាប់ ប្រព្រឹត្តនៅចំណុច​សមុទ្រ ស្រុកគីរីសារគរ ខេត្តកោះកុង កាលពីថ្ងៃទី២៦ ខែមីនា ឆ្នាំ២០១៦ ដោយសម្រេចដាក់ទោស​ម្នាក់ៗ៦ខែ ហើយក្រោយអនុវត្តន៍ទោសរួច ​ត្រូវបណ្តញចេញពីកម្ពុជា។

ជនជាប់ចោទទី១-ឈ្មោះ យឿង ថាន់ហាយ ភេទប្រុស អាយុ៤១ឆ្នាំ ​បានឆ្លើយបដិសេធចម្លើយនៅមុខសមត្ថកិច្ច តំណាងអយ្យការ និងចៅក្រមស៊ើបសួរចោលទាំងអស់ ដោយសារពេលនោះអ្នក​បកប្រែនិយាយ មិនសូវច្បាស់។ ចំណែកចម្លើយនៅព្រឹកនេះជនជាប់ ចោទទទួលស្គាល់ ក៏ប៉ុន្តែ​សូមបដិសេធរឿងនេសាទ ដោយប្រើឧបករណ៍ខុសច្បាប់ ​ពីព្រោះខ្លួនមិនបានប្រព្រឹត្តទេ តែបើរឿងឆ្លងដែន ដោយខុសច្បាប់ គឺខ្លួនទទួលស្គាល់ដោយសារតែ​ចង់មកលេងនៅខ្មែរ ទើបខ្លួនជិះទូកមកតាមគេ។

​ជនជាប់ចោទទី២-ឈ្មោះ វិន យ៉ាំងនឿយ ភេទប្រុស អាយុ៣៣ឆ្នំា ជនជាប់ចោទទី៣-ឈ្មោះ ចឹង យ៉ាំងឌូ​ ភេទប្រុស អាយុ៣១ឆ្នំា ក៏បានឆ្លើយបដិសេធដូចជនជាប់ចោទ​នាក់ខាងលើដែល ដោយឡែក​ជនជាប់ចោទទី៤-ឈ្មោះ ង្វៀង យ៉ាំងមី​ ភេទប្រុស អាយុ៣៣ឆ្នំា​ បានឆ្លើយនាពេលសវនាការថា «មានគេតេទូរស័ព្ទមកខ្ញុំថាឲ្យយកបាយទឹក ទៅឲ្យពួកដែលសមត្ថកិច្ចចាប់ហូបផង ហើយចាំគេឲ្យលុយវិញ ពេលនោះ ខ្ញុំក៏បានយកបាយទឹកឲ្យពួកគេហូប តាំងពីនៅខេត្តកោះកុង រហូតដល់ភ្នំពេញ ទើបសមត្ថកិច្ចចាប់ខ្លួនខ្ញុំដែល ដោយសារតែខ្ញុំ មិនមានលិខិតឆ្លងដែន»។

យ៉ាងណាមិញ តំណាងអយ្យការលោក ងិន ពេជ​​ ធ្វើសេចក្តីសដ្ឋានថា ទោះបីជនជាប់ចោទទំាង៤នាក់ បដិសេធចម្លើយនៅ​មុខចៅក្រម ស៊ើបនិងតំណាងអយ្យការ យ៉ាងណាក្តី គឺអង្គហេតុវាស៊ីចង្វាក់គ្នាទៅហើយ ​​បើយោងទៅតាមចម្លើយឈ្មោះ ង្វៀង យ៉ាំងមី​ បានឆ្លើយថា មានេគតេមកខ្លួន ឲ្យយកបាយទឹកទៅឲ្យនោះគឺជា ថៅកែម្នាក់ «ចែង» ដែលនាក់បញ្ជាទៅហើយ ចឹងតំណាងអយ្យការនៅតែតម្កល់ បទចោទប្រកាន់ នៅដដែល៕