(ភ្នំពេញ)៖ ក្រុមតំណាងរាស្រ្ត គណបក្សសង្រ្គោះជាតិ នៅថ្ងៃទី២៨ ខែមេសា ឆ្នាំ២០១៦នេះ បានដាក់លិខិតទូលថ្វាយ​ព្រះមហាក្សត្រកម្ពុជា ដើម្បីឱ្យជួយ​បន្ថយស្ថាន​ភាពនយោបាយ​នៅកម្ពុជា ប៉ុន្តែអ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានលើកឡើងថា ស្ថានភាពនយោបាយបច្ចុប្បន្ន មិនមានការឡើងកម្តៅ​អ្វីដូចដែល​តំណាងរាស្រ្តគណបក្សប្រឆាំង​ទូលថ្វាយនោះទេ។ អ្នកនាំពាក្យរូបនោះ​បាននិយាយថា តំណាងរាស្រ្តបក្សប្រឆាំង កំពុងភូតភរដល់អង្គព្រះមហាក្សត្រ។

លោក ផៃ ស៊ីផាន បានប្រាប់អង្គភាព Fresh News ឱ្យដឹងនៅរសៀលថ្ងៃទី២៨ ខែមេសា ឆ្នាំ២០១៦នេះថា ការធ្វើលិខិតទូលថ្វាយព្រះមហាក្សត្រ ដោយក្រុមតំណាងរាស្រ្ត គណបក្សសង្រ្គោះជាតិ នាពេលនេះ គឺជាការកេងចំណេញនយោបាយសុទ្ធសាធ ដែលមិនមានតម្លៃ អ្វីសម្រាប់នយោបាយ នៅកម្ពុជាទេ ហើយអ្វីដែលកើតឡើងគ្រាន់តែជារឿងបុគ្គលតែប៉ុណ្ណោះ មិនមានប៉ះពាល់ដ​ល់​ស្ថានភាពនយោបាយ​នោះទេ។

លោកលើកឡើង និងរៀបរាប់ថា ដូចជាករណីលោក សម រង្ស៊ី នៅតុលាការ គឺពាក់ព័ន្ធនឹងបណ្តឹង លោកឧបនាយករដ្ឋមន្រ្តី ហោ ណាំហុង ដែលជារឿងបរិហារកេរ្តិ៍រវាងបុគ្គល និងបុគ្គល ចំណែកករណី​ចាប់ខ្លួន លោក អ៊ុ សំអាន កន្លងមកនោះ គឺដោយសារតែតំណាងរាស្រ្តរូបនេះ បានប្រព្រឹត្តបទល្មើសជាក់ស្តែងតែប៉ុណ្ណោះ។ ដោយឡែកដំណឹងចំពោះការកោះហៅមន្រ្តីសង្គមស៊ីវិល ដែលធ្វើឡើង​ដោយACU នោះវិញ ក៏ជារឿងពាក់ព័ន្ធនឹងរឿងបុគ្គល ស្រីមុំ បានចោទប្រកាន់ជាមួយរឿងអាស្រូវផ្លូវភេទជាមួយលោក កឹម សុខា មិនមែនជារឿងនយោបាយ និងឡើងកំដៅដូចអ្វីដែលបានទេ។

សូមបញ្ជាក់ថា នៅថ្ងៃទី២៨ ខែមេសា ឆ្នាំ២០១៦នេះ ក្រុមតំណាងរាស្រ្តគណបក្សសង្រ្គោះជាតិ បានផ្ញើលិខិតថ្វាយព្រះមហាក្សត្រដោយរៀបរាប់ អំពីស្ថានភាពនយោបាយ នៅកម្ពុជា។ តំណាងរាស្រ្ត​ទាំងនោះបានលើកឡើងថា នាថ្មីៗនេះ មានការចាប់ខ្លួនអ្នកនយោបាយ សកម្មជនបរិស្ថាន សមាជិកព្រឹទ្ធសភា តំណាងរាស្រ្ត ហើយមានការរឹតត្បិតអង្គការសង្គមស៊ីវិល និងសហជីព ជាហេតុធ្វើឱ្យ​ស្ថានការណ៍នយោបាយ នៅកម្ពុជាបច្ចុប្បន្នមានសភាពកាន់តែធ្ងន់ធ្ងរទៅៗ។

លិខិតបានរៀបរាប់ថា «ស្ថានការណ៍ដុនដាបនាពេលបច្ចុប្បន្ននេះ បើគ្មានដំណោះស្រាយ​ទាន់ពេលវេលានោះទេ នឹងធ្វើឱ្យប្រទេសកម្ពុជាដើរថយក្រោយ វិលទៅរកអតីត​កាលជា​មិនខាន​»៕