(ភ្នំពេញ)៖ នាយឧត្តមសេនីយ៍ ណឹម សុវត្ថិ ប្រធានក្រុមការងារសិក្សាស្រាវជ្រាវសាងសង់សំណង់វិមានឈ្នះ-ឈ្នះ និងជាអគ្គនាយក នៃអគ្គនាយកដ្ឋាននយោបាយ និងកិច្ចការបទេស នៃក្រសួងការពារជាតិ បានលើកឡើងថា វិមានឈ្នះ-ឈ្នះ នឹងក្លាយទៅជាពហុមជ្ឈមណ្ឌលសម្រាប់ផ្ទុកឯកសារប្រវត្តិសាស្ត្ររបស់កម្ពុជាទាំងមូល ខណៈសព្វថ្ងៃនេះ មានប្រជាពលជិតឆ្ងាយមកទស្សនាកាន់តែកើនឡើងពីមួយថ្ងៃទៅមួយថ្ងៃ ហើយក្នុងថ្ងៃធម្មតាមានភ្ញៀវជាតិ និងអន្តរជាតិជិត១ពាន់នាក់ និងថ្ងៃឈប់សម្រាកព្រមទាំងថ្ងៃបុណ្យទានផ្សេងៗ មានជាង៣ពាន់នាក់។
ការលើកឡើងរបស់នាយឧត្តមសេនីយ៍ ណឹម សុវត្ថិ ធ្វើឡើងនៅក្នុងសន្និសីទសារព័ត៌មាន នៅថ្ងៃទី៥ ខែកុម្ភៈ ឆ្នាំ២០១៩នេះ នៅក្នុងសំណង់វិមានឈ្នះ ឈ្នះ ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។ ឧត្តមសេនីយ៍ ណឹម សុវត្ថិ បានលើកឡើងថា បច្ចុប្បន្នមានប្រជាពលរដ្ឋខ្មែរ និងសិស្សានុសិស្សមកពីសាលា និងសសកលវិទ្យាល័យផ្សេងៗមកទស្សនា និងសិក្សាស្រាវជ្រាវជារៀងរាល់ថ្ងៃ ហើយថ្ងៃខ្លះមានរហូតដល់៧ពាន់នាក់ឯណោះ។
នៅក្នុងឱកាសនោះដែរ នាយឧត្តមសេនីយ៍ ណឹម សុវត្ថិ បានបន្តថា សម្រាប់ភ្ញៀវដែលមកទស្សនានៅក្នុងវិមានឈ្នះ-ឈ្នះ មានចំនួនពីរបែបធំៗ មួយផ្នែក គឺការស្នើ និងសំណូមពរសម្រាប់ការចូលមកទស្សនា ដោយមានការរៀបចំជាក្រុម និងវគ្គ យ៉ាងត្រឹមត្រូវទាំងអស់ ដែលមានចំនួនចាប់ពីរាប់រយនាក់ ទៅរាប់ពាន់នាក់ ព្រមទាំងមានរហូតដល់រាប់ម៉ឺននាក់ផងដែរ។ ជាមួយគ្នាមានភ្ញៀវដែលមកទស្សនាជាច្រើនពាន់នាក់ បានមកទស្សនាដោយមិនបានជូនដំណឹងដល់ក្រុមការងារជាច្រើនផងដែរ ទាំងនេះសបញ្ជាក់ឱ្យឃើញថា សំណង់វិមានឈ្នះ-ឈ្នះ កំពុងតែឆក់យកការចាប់អារម្មណ៍យ៉ាងខ្លាំងពីសំណាក់ប្រជាពលរដ្ឋគ្រប់មជ្ឈដ្ឋានផងដែរ។
វិមានឈ្នះ-ឈ្នះបានបើកការដ្ឋានសាងសង់កាលពីថ្ងៃទី២៥ ខែកុម្ភៈ ឆ្នាំ២០១៦ បន្ទាប់ពីការសាងសង់អស់រយៈពេលជាងពីរឆ្នាំ គឺវិមានមានឈ្នះឈ្នះត្រូវបានប្រារព្ធពិធីសម្ពោធជាផ្លូវការកាលពីថ្ងៃទី២៩ ខែធ្នូ ឆ្នាំ២០១៨ កន្លងទៅនេះក្រោមអធិបតីភាព សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមទាំងការប្រារព្ធទិវានយោបាយឈ្នះ-ឈ្នះ (ថ្ងៃទី២៩ ខែធ្នូ ឆ្នាំ១៩៩៨-ថ្ងៃទី២៩ ខែធ្នូ ឆ្នាំ២០១៨) ផងដែរ។
សំណង់វិមានឈ្នះ-ឈ្នះ ត្រូវបានសាងសង់ឡើង ដោយបានដកស្រង់ចេញពីខ្លឹមសារគោលនយោបាយឈ្នះ-ឈ្នះ របស់សម្តេចតេជោ ហ៊ុន សែន ចែកចេញជា៣ផ្នែក ដែលក្នុងនោះជាន់ទី១ មានជ្រុងទាំង៧ នៃតួវិមានឈ្នះ-ឈ្នះ គឺតំណាងឱ្យកត្តាទាំង៧ ដែលនាំឱ្យគោលនយោបាយឈ្នះឈ្នះ របស់សម្តេចតេជោ ហ៊ុន សែន ទទួលបានជ័យជំនះផ្នែកកណ្តាលមាន៥ជ្រុង ដែលជ្រុងទាំង៥ នៃតួវិមានតំណាងឱ្យយុទ្ធសាស្ត្រឌីហ្វីត (DIFID) រួមមាន៖ បំបែក, ឯកោ, បញ្ចប់, ធ្វើសមាហរណកម្ម និងទីអភិវឌ្ឍន៍ជាដើម។
ដោយឡែកផ្នែកខាងលើកំពូលវិមាន ដែលមាន៣ជ្រុង ដែលជ្រុងទាំង៣ នៃតួវិមានឈ្នះឈ្នះនេះតំណាងឱ្យទី១៖ ការធានារូបកាយ និងអាយុជីវិត, ទី២៖ ការធានាអាជីព និងមុខរបរ និងទី៣ការធានាកម្មសិទ្ធិ និងទ្រព្យសម្បត្តិ ទាំងចលនទ្រព្យ និងអចលនទ្រព្យ។ នៅតួវិមានឈ្នះ-ឈ្នះ ផ្នែកកណ្តាលនៃជ្រុងទាំង៥ ត្រូវបានកសាងជាសារៈមន្ទីរមគ្គុទេសន៍ សម្តេចតេជោ ហ៊ុន សែន ដែលបានរៀបរាប់ពីប្រវត្តិទិវាចងចាំនៃដំណើរឆ្ពោះទៅផ្ដួលរំលំរបបប្រល័យពូជសាសន៍ «ប៉ុល ពត» កាលពីថ្ងៃ២០ ខែមិថុនា ឆ្នាំ១៩៧៧ និងសកម្មភាពដឹកនាំប្រទេសជាតិរបស់សម្តេចតេជោ ចាប់តាំងពីក្រោយថ្ងៃជ័យជំនះ ៧ មករា រហូតដល់ការអនុវត្តគោលនយោបាយឈ្នះ-ឈ្នះ របស់សម្តេចតេជោ ហ៊ុន សែន ដែលបានធ្វើឱ្យប្រទេសកម្ពុជា ទទួលបានសុខ សន្តិភាព និងការអភិវឌ្ឍរីកចម្រើនមកដល់សព្វថ្ងៃនេះ។
បើតាមការអះអាងរបស់នាយឧត្តមសេនីយ៍ ណឹម សុវត្ថិ ដដែលបានឱ្យដឹងដែរថា ក្រុមគណៈកម្មការសាងសង់វិមានឈ្នះឈ្នះ នឹងបង្កើននៅសន្តិសុខ និងក្រុមអនាម័យបន្ថែមទៀត ដើម្បីរក្សាសុវត្ថិភាព និងបរិស្ថាននូវក្នុងបរិវេណសំណង់នេះ ឱ្យកាន់តែល្អប្រសើបន្ថែមទៀតខណៈប្រជាពលរដ្ឋមកកាន់តែច្រើនហើយក្រុមសន្តិសុខ និងក្រុមអនាម័យនៅមានកម្រិតនៅឡើយនោះ។
ទន្ទឹមនឹងនេះ នាយឧត្តមសេនីយ៍ ណឹម សុវត្ថិ ក៏បានធ្វើការអំពាវនាវដល់បងប្អូនប្រជាពលរដ្ឋជាថ្មីទៀត ដែលមកទស្សនា និងសិក្សាស្រាវជ្រាវនូវសំណង់ ដ៏ប្រវត្តិសាស្ត្រ នេះសូមជួយថែរក្សានៅបរិស្ថាន និងសណ្តាប់ធ្នាប់រួមគ្នា ដើម្បីឱ្យសោភ័ណភាព ក្នុងបរិវេណកាន់តែល្អប្រសើរបន្ថែមទៀត៕
