(ភ្នំពេញ)៖ នៅព្រឹកថ្ងៃទី៥ ខែកុម្ភៈ ឆ្នាំ២០១៩នេះ អាវុធហត្ថខណ្ឌ៧មករា បានបញ្ជូនខ្លួនមន្ត្រីយោធាម្នាក់ទៅកាន់បញ្ជាការដ្ឋានអាវុធហត្ថរាជធានីភ្នំពេញ ដើម្បីចាត់វិធានការផ្លូវច្បាប់ ក្នុងរឿងជម្លោះជាមួយមន្ត្រីនគរបាលរហូតឈានទៅផ្ទុះអាវុធចំនួន៣ កាលពីរសៀលថ្ងៃទី០៤ ខែកុម្ភៈម្សិលមិញ។ នេះបើយោងតាមការបញ្ជាក់ របស់សមត្ថកិច្ចខណ្ឌ៧មករា ប្រាប់មកអង្គភាពព័ត៌មាន Fresh News នៅមុននេះបន្តិច។
សមត្ថកិច្ចខណ្ឌ៧មករាបានឲ្យដឹងថា កម្លាំងអាវុធហត្ថខណ្ឌ៧មករា បានបញ្ជូនខ្លួនមន្ត្រីយោធាម្នាក់ទៅកាន់បញ្ជាការដ្ឋានអាវុធហត្ថរាជធានីភ្នំពេញ ចំណែកភាគីបង្កម្ខាងទៀត ដែលគេស្គាល់ថាជាមន្ត្រីនគបាលនោះ បានរត់គេចខ្លួន ក្រោយដណ្តើមកាំភ្លើងខ្លីពីនគរបាលប៉ុស្តិ៍ហើយបានបាញ់គំរាមចំនួន០៣គ្រាប់រួចមក។ ដោយឡែក នាយរងនគបាលប៉ុស្តិ៍អូរឬស្សីវិញ ក៏ត្រូវបានគេនាំយកទៅសាកសួរ នៅអធិការដ្ឋានខណ្ឌ៧មករាដែរ ពាក់ព័ន្ធការធ្វេសប្រហែស បណ្តាលឱ្យគេដណ្តើមអាវុធ យកទៅបាញ់ចំនួន៣គ្រាប់។
សមត្ថកិច្ចខណ្ឌបានបញ្ជាក់ទៀតថា កណីទំនាស់ហើយបណ្ដាលឲ្យផ្ទុះអាវុធនេះ បានកើតឡើងកាលពីវេលាម៉ោង៣៖១០នាទី រសៀលថ្ងៃទី០៤ ខែកុម្ភៈ ឆ្នាំ២០១៩ នៅចំណុចមុខផ្ទះលេខ២១៣AEo ផ្លូវលេខ១៣៩ សង្កាត់អូរឬស្សី៣ ខណ្ឌ៧មករា រាជធានីភ្នំពេញ។ ជនដែលដណ្តើមកាំភ្លើង ពីសមត្ថកិច្ចប៉ុស្តិ៍អូរឬស្សី៣ ហើយបាញ់៣គ្រាប់នោះ មានឈ្មោះ គីវ ស៉ីថា ជាអតីតអធិការរងក្រុងតាខ្មៅ។
ចំណែភាគីម្ខាងទៀត មានឈ្មោះថា ជា ពេជ្រចន្ថា ភេទប្រុស អាយុ៣០ឆ្នាំ មុខរបរយោធា នៅក្រសួងការពារជាតិ មានទីលំនៅ ផ្ទះលេខ៧៣E1Z ផ្លូវលេខ១២៨ សង្កាត់មនោរម្យ ខណ្ឌ៧មករា រាជធានីភ្នំពេញ។
ប្រភពព័ត៌មានបន្តថា ដើមចមនៃជម្លោះរវាងមន្ត្រីយោធា និងមន្ត្រីនគបាលនេះ មុនដំបូងភាគីមន្ត្រីយោធាឈ្មោះ ជា ពេជ្រចន្ថា បើករថយន្តមកឈប់មុខផ្ទះលេខ២១៣Eo ផ្លូវ១៣៩ ក៏បានទាស់ពាក្យសម្ដីជាមួយមន្ត្រីនគរបាលឈ្មោះ គីវ ស៉ីថា។ ពេលនោះឈ្មោះ ជា ពេជ្រចន្ថា ក៏បានដកអាវុធខ្លីចេញពីកាបូប បំណងផ្ជង់ទៅលើឈ្មោះ គីវ ស៉ីថា តែមានប្រជាពលរដ្ឋឃាត់ គេក៏ឡើងទៅលើផ្ទះ។ មួយសន្ទុះក្រោយមកគេក៏ចុះមកវិញ ស្រាប់តែឈ្មោះ គីវ ស៉ីថា ឆក់អាវុធពីនគរបាលប៉ុស្តិ៍ សង្កាត់អូរឬស្សី៣ បាញ់មកលើឈ្មោះ ជា ពេជ្រចន្ថា តែមាននគរបាលឃាត់ បណ្ដាលឲ្យផ្ទុះអាវុធចំនួន៣គ្រាប់ តែមិនបណ្ដាលឲ្យមានអ្នករងរបួសម្នាក់ទេ។
ក្រោយពីធ្វើសកម្មភាពបាញ់រួច គីវ ស៉ីថា បានគេចខ្លួនបាត់ ចំណែកឯឈ្មោះ ជា ពេជ្រចន្ថា ត្រូវសមត្ថកិច្ចអាវុធហត្ថខណ្ឌ៧មករា បានហៅមកសាកសួរ។ តាមសម្តីរបស់ ជា ពេជ្រចន្ថា បានឆ្លើយថា គេពិតជាបានដកអាវុធខ្លី បម្រុងភ្ជង់ទៅលើឈ្មោះ គីវ ស៉ីថា ពិតប្រាកដមែន តែមានអ្នកឃាត់កុំឲ្យខ្លួនធ្វើអញ្ចឹង៕
