(ភ្នំពេញ)៖ ដើម្បីចូលរួមអបអរសាទរ ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ១តុលា ឆ្នាំ២០១៨ ក្រោមប្រធានបទ «សមាគមមនុស្សចាស់ ជាយន្តការដ៏សំខាន់ ក្នុងការថែរក្សាវប្បធម៌គ្រួសារ និងសង្គមជាតិ» នៅព្រឹកថ្ងៃអង្គារ ៨រោច ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២ ខែតុលា ឆ្នាំ២០១៨នេះ កាកបាទក្រហមកម្ពុជា (ហៅកាត់ថា កក្រក) ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានរៀបចំពិធីជួបជុំ និងសំណេះសំណាលជាមួយព្រឹទ្ធាចារ្យ ជានិវត្តជនចំនួន៥៨នាក់ ដែលធ្លាប់បម្រើការងារមនុស្សធម៌យ៉ាងសកម្ម ជាមួយកាកបាទក្រហមកម្ពុជា នាពេលកន្លងមក ពិធីនេះប្រព្រឹត្តទៅ នៅភោជនីយដ្ឋានឡឺប្រេស៊ីដង់ រាជធានីភ្នំពេញ។
ពិធីនេះ ក៏បានអាននូវសារលិខិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ក្នុងឱកាសទិវាមនុស្សចាស់កម្ពុជា និងទិវាមនុស្សចាស់អន្តរជាតិ ១តុលា ឆ្នាំ២០១៨ ដោយលោកស្រី ម៉ែន នារីសោភ័គ អគ្គលេខាធិការរងទី១ ។ ក្រោយពីបានអាននូវសារលិខិតរួចមក លោកស្រី ពុំ ចន្ទីនី អគ្គលេខាធិការ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តាំផ្ញើសួរសុខទុក្ខ ការគិតគូរចំពោះគុណបំណាច់របស់និវត្តជនទាំងអស់ ដែលធ្លាប់មានអនុស្សាវរីយ៍ដ៏សែនកំសត់ និងការពុះពារគ្រប់ឧបសគ្គតាមដងផ្លូវដ៏សែនលំបាក ដើរឆ្លងកាត់ចម្ការមីន កាត់វាល ចូលព្រៃ និងទីជនបទដាច់ស្រយាល ក្នុងប្រតិបត្តិការមនុស្សធម៌ធំៗកន្លងមក ដើម្បីនាំយកអំណោយមនុស្សធម៌ជូនដល់ដៃជនរងគ្រោះ។
គួររំលឹកថា ការប្រារព្ធទិវានេះ គឺស្របទៅនឹងគោលនយោបាយរបស់រាជរដ្ឋាភិបាលកម្ពុជា និងស្របតាមសេចក្តីសម្រេច របស់អង្គការសហប្រជាជាតិ ដែលបានឆ្លុះបញ្ចាំងឱ្យឃើញថា មនុស្សវ័យចាស់ បានបន្សល់ទុកស្នាដៃ គុណូបការៈ និងការអប់រំប្រៀនប្រដៅ ប្រកបដោយគតិបណ្ឌិត ហើយបានធ្វើឱ្យព្រះរាជាណាចក្រកម្ពុជា យើងមានប្រពៃណី ទំនៀមទម្លាប់ដ៏ល្អ មានកេរមរតកសម្បត្តិវប្បធម៌ ដែលសម្បូណ៌បែប និងសមិទ្ធផលទាំងឡាយ ត្រូវបានរក្សាគង់វង្សរហូតដល់សព្វថ្ងៃនេះ។
ជាមួយគ្នានោះ និវត្តជនបានថ្លែងថា ទោះបីពួកគាត់បានចូលនិវត្តរ៍ហើយក្តី តែពួកគាត់មានមោទនភាព ចំពោះវឌ្ឍនភាព និងសមិទ្ធផលធំធេងរបស់កាកបាទក្រហមកម្ពុជា ក្រោមការដឹកនាំប្រកបដោយគតិបណ្ឌិតនៃ សម្តេចកិត្តិព្រឹទ្ធបណ្ឌិតប្រធាន ដែលបានធ្វើឱ្យកាកបាទក្រហមកម្ពុជា មានការទទួលស្គាល់ទាំងថ្នាក់ជាតិ និងនៅលើឆាកអន្តរជាតិ។
ជាចំណងដៃក្នុងឱកាសជួបជុំគ្នានេះ និវត្តជនទាំង ៥៨នាក់ បានទទួលអំណោយមនុស្សធម៌ក្នុងម្នាក់ៗ ថវិកា២លានរៀល មុងសុវត្ថិភាពមួយ និងការពិសារអាហារសាមគ្គីមួយពេលទៀតផង៕
