(កំពង់ស្ពឺ)៖ ដើម្បីសោភ័ណ្ឌភាពទីក្រុង និងលំហូរទឹកប្រឡាយបានល្អនៅថ្ងៃទី១៩ ខែសីហា ឆ្នាំ២០១៨នេះ សាលាក្រុងច្បារមន ខេត្ដកំពង់ស្ពឺ បានចាត់វិធានការក្តៅដោយចុះកាយសំណង់រំលោភលើដីចំណីផ្លូវរបស់រដ្ឋមួយចំនួន និងអំពាវនាវដល់ប្រជាពលរដ្ឋឈប់សាងសង់សំណង់លើប្រឡាយទឹកតទៅទៀត។
សកម្មភាពខាងលើនេះ បានធ្វើឡើងដោយយោងតាមសេចក្តីជូនដំណឹងចុះថ្ងៃទី១១ ខែកក្កដា ឆ្នាំ២០១៨ របស់រដ្ឋបាលក្រុងច្បារមន និងក្រោមការចង្អុលបង្ហាញរបស់ លោក ហុក ម៉ារ៉ាឌី អភិបាលក្រុងច្បារមន ខេត្តកំពង់ស្ពឺ នាព្រឹកថ្ងៃទី១៩ ខែសីហា ឆ្នាំ២០១៨នេះ។
លោក ហុក ម៉ារ៉ាឌី បានបញ្ជាឲ្យគ្រឿងចក្រឈូសឆាយកំទេចចោលនូវសំណង់របង ដែលធ្វើរំលោភចូលប្រឡាយរបស់លោក ឈុន ហោ អាជីវករលក់ម៉ូតូ នៅភូមិព្រៃស្លឹកសង្កាត់ច្បារមន ក្រុងច្បារមន ខេត្តកំពង់ស្ពឺ។
បន្ទាប់មកទៀត ក្រុមការងារ ក៏បានបន្តនាំយកគ្រឿងចក្រទៅកាយប្រឡាយដែលលប់ដោយអាជីវករ លោក ខូវ ឡាយតិច ដែលស្ថិតនៅជាប់ផ្លូវជាតិលេខ៤ ភូមិញរ សង្កាត់កណ្ដាលដុំ ក្រុងច្បារមន ខេត្តកំពង់ស្ពឺ បន្ថែមទៀត ដើម្បីសម្រួលដល់ផ្លូវហូរ និងការពារបរិស្ថានក្រុងផងដែរ។
លោក ហុក ម៉ារ៉ាឌី អភិបាលច្បារមន ត្រូវបានមហាជនមើលឃើញថា ជាអ្នកប្រើកណ្តាប់ដៃព្រមានយ៉ាងខ្លាំង ចំពោះក្រុមហ៊ុនរំលោភច្បាប់ មានអ្នកផ្ញើម៉ូតូ មកដល់ពេលនេះ បន្តធ្វើក្រុមអ្នករំលោភដីចំណីផ្លូវ និងរំលោភប្រឡាយទឹករបស់រដ្ឋបន្ថែមទៀត។
ពាក់ព័ន្ធនឹងសកម្មភាពនេះ លោកអភិបាលក្រុងច្បារមន បញ្ជាក់យ៉ាងខ្លីថា ការអនុវត្តនេះ ធ្វើឡើងតាមច្បាប់ និងធ្វើឲ្យមនុស្សត្រូវតែគោរពច្បាប់៕
